جیو ہاٹ اسٹار پر ۱۷؍ کروڑ سے زیادہ ناظرین نے میچ دیکھا جو ڈیجیٹل پلیٹ فارم پر ٹیسٹ میچ دیکھنے کا اب تک کا سب سے بڑا ریکارڈ ہے۔

ہندوستان اور انگلینڈ کے درمیان کھیلی گئی سب سے یادگار ٹیسٹ سیریز کے اختتام کے ساتھ ہی ۱۷؍کروڑ سے زیادہ شائقین نے جیو ہاٹ اسٹار پر لاگ اِن کیاجس سے یہ ڈیجیٹل پلیٹ فارم پر کسی بھی ٹیسٹ سیریز کی اب تک کی سب سے بڑی ناظرین تک رسائی بن گئی۔ جیسے جیسے سیریز ایک شاندار اورسنسنی خیز انجام کی طرف بڑھ رہی تھی، اووَل میں کھیلے گئے پانچویں ٹیسٹ میچ کے پانچویں دن جیو ہاٹ اسٹار  پر۱ء۳؍ کروڑ سے زیادہ ناظرین نے میچ دیکھا  جو ڈیجیٹل پر کسی بھی ٹیسٹ میچ دیکھنے کا اب تک کا سب سے بڑا ریکارڈ ہے۔ دلچسپ مقابلوں اور سنسنی خیز موڑ کے ساتھ ہند انگلینڈ سیریز نے جیو ہاٹ اسٹار پر۶۵؍ ارب منٹ کے زبردست ویو ٹائم کے ساتھ ہندوستان کی توجہ اپنی طرف مبذول کرائی ۔ اس سیریز نے نہ صرف آئی سی سی ورلڈ ٹیسٹ چمپئن شپ (ڈبلیو ٹی سی) ۲۷-۲۰۲۵ء کے سائیکل کیلئے ہندوستان کی مہم کی شروعات کی، بلکہ سرخ گیند والے کرکٹ میں غلبہ حاصل کرنے کی نئی امنگ اور قیادت میں تبدیلی کو بھی ظاہر کیا۔ اسے جیو ہاٹ اسٹار پر۵ ؍ زبانوں انگریزی، ہندی، تمل، تلگو اورکنڑ میں پیش کیا گیا۔ جیو ہاٹ اسٹار کے اسپورٹس کنٹینٹ کے سربراہ سدھارتھ شرما نے کہا ’’ ہندوستان کے انگلینڈ دورے کو ملنے والا غیر معمولی ردعمل اس خیال کو مستحکم کرتا ہے کہ ٹیسٹ کرکٹ کی دلچسپی اوراس کے سنسنی خیز پہلو ختم نہیں ہوسکتے۔۱۷؍کروڑ سے زائد ناظرین تک رسائی اور بیک وقت نئے ریکارڈ ٹیسٹ کرکٹ کی دلچسپ کہانی اور نیا تجربہ فراہم کرنے کے ہمارے عزم کا بھی ثبوت ہے۔‘‘