آسٹریلیا نے پانچویں اور آخری ٹی۔ ۲۰؍میچ میں ویسٹ انڈیز کو ۳؍ وکٹوں سے شکست دے کر دلچسپ جیت کے ساتھ اس دورے پر تمام فارمیٹ میں ۸۔صفر سے کلین سویپ کرتے ہوئے اپنے کریبیائی دورے کا شاندار اختتام کیا۔

آسٹریلیا نے پانچویں اور آخری ٹی۔ ۲۰؍میچ میں ویسٹ انڈیز کو ۳؍ وکٹوں سے شکست دے کر دلچسپ جیت کے ساتھ اس دورے پر تمام فارمیٹ میں ۸۔صفر سے کلین سویپ کرتے ہوئے اپنے کریبیائی دورے کا شاندار اختتام کیا۔ اس نتیجے کے ساتھ مہمان ٹیم نے میزبان ٹیم کو ٹیسٹ سیریز میں تین ۔صفر اور ٹی ۔۲۰؍سیریز میں پانچ۔صفر سے شکست دے کر ۸۔صفر سے مکمل صفایا کردیا۔
 ۱۷۱؍ رنوں کے ہدف کے تعاقب میں آسٹریلیا نے ۳؍ اوور باقی  رہتے۷؍وکٹ پر ۱۷۳؍  کے اسکورکے ساتھ ہدف  حاصل کر لیا۔ اس جیت میں مچل اوون (۳۷)، ٹم ڈیوڈ اور کیمرون گرین جیسے مڈل آرڈر  بلے بازوں کا کلیدی رول رہا۔ پوری ٹی۔۲۰؍ سیریز میں ان کی مسلسل آل راؤنڈ کارکردگی کے لئے گرین کو سیریز کا بہترین کھلاڑی قرار دیا گیا۔
 میچ کے بعد آسٹریلیائی کپتان مچل مارش نے کہا’’سیریز شروع ہونے سے پہلے پانچ صفر سے کامیابی کی امید نہیں تھی، لیکن ہم نے بہترین کرکٹ کھیلی۔تمام کھلاڑیوں نے اپنی ذمہ داریوں کو بوبی نبھایا۔‘‘ وہیں ویسٹ انڈیز کے کپتان شائی ہوپ نے ہار کی وجہ بلے بازی کو بتایا۔ انہوں نے کہا’’ہم نے کبھی بھی مکمل طور پر بلے بازی میں درست کارکردگی نہیں دکھائی۔ — یا تو اچھی شروعات ملی اور اختتام خراب رہا، یا پھر اس کے الٹ ہوا۔ اتنے مضبوط حریف کے سامنے آپ اس طرح جیت نہیں سکتے۔‘‘