ٹم ڈیوڈ اور کیمرون گرین کی بدولت آسٹریلیا نےقریبی مقابلے میں جنوبی افریقہ کو ۱۷؍رن سے شکست دے۔ ٹی ۲۰؍ سیریز میں برتری حاصل کرلی۔

ٹم ڈیوڈ(۸۳؍رن) اور کیمرون گرین(۳۵؍رن) کی شاندار اننگز کے بعد جوش ہیزل ووڈ اور بین ڈوارشیئس (۳۔۳؍ وکٹ) کی شاندار گیندبازی کی بدولت آسٹریلیا نے اتوار کو پہلے ٹی۲۰؍میچ میں جنوبی افریقہ کو۱۷؍رن سے شکست دے دی۔ اس کے ساتھ ہی آسٹریلیا نے ۳؍ میچوں کی سیریز میں۰۔۱؍ کی برتری حاصل کر لی ہے۔
۱۷۹؍ رن کے ہدف کے تعاقب میں جنوبی افریقہ کی شروعات اچھی نہیں رہی اور اس نے  پہلے ہی اوور میں کپتان ایڈن مارکرم (۱۲) کا وکٹ گنوا دیا۔ انہیں جوش ہیزل ووڈ نے  وکٹ کیپر کیمرون گرین کے ہاتھوں کیچ آؤٹ کروایا۔ اس کے بعد بیٹنگ کے لیے آنے والے لوان ڈرے پریٹوریس کو گلین میکسویل نے اووین کے ہاتھوں کیچ آؤٹ کروا کر پویلین بھیج دیا۔ لوان ڈرے پریٹوریس نے ۹؍ گیندوں پر ۱۴؍ رن  بنائے۔

یہ بھی پڑھیئے:الہلال: الہلال کو نیمار کا متبادل مل گیا ،نیونیز ٹیم میں شامل

ڈیولڈ بریوس تیسرے وکٹ کی شکل میں ۲؍ رن بنانے کے بعد آؤٹ ہوئے۔ ٹرسٹن اسٹبس نے ریان رکلیٹن کے ساتھ  اننگز کو سنبھالا اور تیزی کے ساتھ رن بنائے۔ دونوں بلے بازوں کے درمیان چوتھے وکٹ کے لیے۷۲؍ رن کی شراکت ہوئی۔ ۱۵؍ویں اوور میں ہیزل ووڈ نے ٹرسٹن اسٹبس کو آؤٹ کرکے اس شراکت کو توڑا۔ ٹرسٹن اسٹبس نے ۲۷؍ گیندوں پر۵؍ چوکوں کی مدد سے۳۵؍ رن  بنائے۔ اسی اوور میں ہیزل ووڈ نے جارج لنڈے (صفر) کو بھی اپنا شکار بنایا۔ اگلے اوور میں ایڈم زمپا نے کوربن بوش (۲) اور سینوران متھوسامی (صفر) کو آؤٹ کرکے میچ کا رخ اپنی ٹیم کے حق میں کردیا۔ ۲۰؍ویں اوور کی دوسری گیند پر بین ڈوارشیئس نے ریان رکلیٹن کو میکسویل کے ہاتھوں کیچ آؤٹ کروا کر آسٹریلیا کی جیت کو یقینی بنادیا۔ جنوبی افریقہ کی ٹیم مقررہ۲۰؍ اوورس میں ۹؍ وکٹ پر۱۶۱؍ رن ہی بنا سکی اور۱۷؍ رن سے میچ ہار گئی۔  آسٹریلیا کی جانب سے جوش ہیزل ووڈ اور بین ڈوارشیئس نے ۳۔۳؍ وکٹ حاصل کئے۔ ایڈم زمپا کو ۲؍ وکٹ ملے۔ گلین میکسویل نے ایک بلے باز کو آؤٹ کیا۔ ٹم ڈیوڈ کو ان کی شاندار اننگز کے لئے پلیئر آف دی میچ کا ایوارڈ ملا۔
اس سے قبل اتوارکو یہاں جنوبی افریقہ نے ٹاس جیت کر پہلے گیند بازی کا فیصلہ کیا۔ بلے بازی کرنے اتری آسٹریلیا کی شروعات اچھی نہیں رہی اوراس نے ۳۰؍رن  کے اسکور پر اپنے ۳؍ وکٹ گنوا دیئے۔ ٹریوس ہیڈ (۲)، جوش انگلس (صفر) اور کپتان مشیل  مارش  ۱۳؍ رن بنانے کے بعد آؤٹ ہوئے۔ اس کے بعد کیمرون گرین اور ٹم ڈیوڈ نے دھماکہ خیز بلے بازی کا مظاہرہ کرتے ہوئے چوتھے وکٹ کے لیے ۴۰؍ رن جوڑے۔
چھٹے اوور میں لونگی  اینگیڈی نے کیمرون گرین کو آؤٹ کر کے آسٹریلیا کو چوتھا جھٹکا دیا۔ کیمرون گرین نے ۱۳؍گیندوں پر ۴؍ چوکے اور ۳؍ چھکے لگا کر۳۵؍ رن  بنائے۔ اس کے بعد مشیل اووین (۲) اور گلین میکسویل (ایک) جلد پویلین لوٹ گئے۔ ٹم ڈیوڈ نے ۵۲؍ گیندوں پر ۸؍ چھکے اور ۴؍ چوکے لگا کر۸۳؍ رن  بنائے۔ آسٹریلیا کی ٹیم مقررہ۲۰؍ اوورس میں ۱۷۸؍رن کے اسکور پر آل آؤٹ ہوگئی۔ آسٹریلیا کا آخری وکٹ ناتھن ایلس ۱۲؍ رن آؤٹ کے طورپر گرا۔ جنوبی افریقہ کی جانب سے وینا مفاکا نے ۴؍ اوورس میں۲۰؍ رن دے کر ۴؍ وکٹ حاصل کئے۔ کگیسو ربادا کو ۲؍ وکٹ ملے۔