آسٹریلیائی کرکٹ ٹیم کے لیگ اسپنر ایڈم زمپا اور وکٹ کیپر بلے باز جوش انگلس ہندوستان کے خلاف پرتھ میں ہونے والے پہلے ایک روزہ میچ سے باہر ہو گئے ہیں۔

آسٹریلیائی کرکٹ ٹیم کے لیگ اسپنر ایڈم زمپا اور وکٹ کیپر بلے باز جوش انگلس  ہندوستان  کے خلاف پرتھ میں ہونے والے پہلے ایک روزہ میچ سے باہر ہو گئے ہیں۔ کرکٹ ویب سائٹ کے مطابق ٹیم انتظامیہ نے ان کی جگہ اسپنر میتھیو کوہنین اور وکٹ کیپر بلے باز جوش فلپے کو اسکواڈ میں شامل کر لیا گیا ہے۔ایڈم زمپا گھریلو مصروفیات کی وجہ سے دستیاب نہیں ہوں گے کیونکہ ان کی اہلیہ عنقریب دوسرے بچے کی ماں بننے والی ہیں۔

یہ بھی پڑھئے: ہندوستان دوسرے ٹیسٹ میچ میں ونڈیز کیخلاف فتح سے۵۸؍رن دور

ایڈم زمپا نے پرتھ کا سفر نہ کرنے کا فیصلہ کیا ہے کیونکہ وہاں سے واپسی میں وقت لگتا ہے۔ وہ ممکنہ طور پر ایڈیلیڈ اور سڈنی میں ہونے والے دوسرے اور تیسرے ون ڈے میچوں میں ٹیم کو دستیاب ہوں گے۔دوسری جانب جوش انگلس اب بھی پنڈلی کی تکلیف سے مکمل طور پر صحتیاب نہیں ہو سکے ہیں اور وہ نہ صرف پہلابلکہ دوسرا میچ بھی نہیں کھیل سکیں گے۔ امید ہے کہ وہ ۲۵؍ اکتوبر کو سڈنی میں شیڈول تیسرے ون ڈے سے قبل فٹ ہو جائیں گے۔ خیال رہے کہ اس وقت آسٹریلیائی کھلاڑیوں کی فٹنیس کا مسئلہ جاری ہے۔ اس سے قبل  ٹیسٹ کپتان پیٹ کمنس کے تعلق سے بھی فٹنیس کے مسائل کی خبریں گردش کررہی تھیں۔ 
جوش فلپے کو ایلکس کیری کی غیر موجودگی میں وکٹ کیپنگ کی ذمہ داری سونپی گئی ہے۔ ایلکس کیری ایڈیلیڈ میں شیفیلڈ شیلڈ میچ کھیلیں گے تاکہ ایشیز سیریز کے لیے تیاری کر سکیں۔ جوش فلپے جنہوں نے آخری بار۲۰۲۱ء میں ون ڈے انٹرنیشنل کھیلا تھا، حالیہ دنوں میں آسٹریلیا اے کے لیے شاندار فارم میں نظرآئے ہیں۔میتھیو کوہنین جنہوں نے آخری بار۲۰۲۲ء میں سری لنکا کے خلاف ون ڈے کھیلا تھا، تین سال بعد ٹیم میں واپسی کر رہے ہیں۔ 
یہ ان کا پہلا موقع ہو گا جب وہ آسٹریلوی سرزمین پر ایک روزہ میچ کھیلیں گے۔آسٹریلوی سلیکٹرز ایشیز سے قبل تینوں فارمیٹس کے کھلاڑیوں کو متوازن طریقے سے سنبھالنے کی کوشش کر رہے ہیں۔ کیمرون گرین ابتدائی۲؍ون ڈے میچوں میں شرکت کریں گے لیکن تیسرے میچ کے لیے ان کی دستیابی مشکوک ہے تاکہ وہ شیفیلڈ شیلڈ میں حصہ لے سکیں۔