ایک ہائی اسکورنگ مقابلے میں ہندوستانی سینئر مردوں کی ہاکی ٹیم نے سنیچر کو کینیڈا کو۳۔۱۴؍ سے شکست دے کر پول میں سرفہرست رہتے ہوئے سلطان اذلان شاہ کپ کے فائنل میں جگہ بنا لی۔میچ کا آغاز چوتھے منٹ میں نیل کانت شرما کے گول سے ہوا جس نے ہندوستان کو برتری دلا دی۔ اس کے بعد اپنے آغاز کے بعد عمدہ فارم میں چل رہے راجندر سنگھ نے ۱۰؍ویں منٹ میں گول کیا۔ اگلے ہی لمحے کینیڈا کے برینڈن گورلیئک نے گول داغ کر جواب دیا۔اس کےبعد چند منٹوں میں جگراج سنگھ اور امت روہِداس نے بالترتیب ۱۲؍ویں اور ۱۵؍ ویں منٹ میں دو مزید گول اسکور کئے۔

یہ چار ایک کی برتری ہندوستان کو دوسرے کوارٹر میں اپنا کھیل مزید بہتر بنانے میں مددگار ثابت ہوئی۔ اس ٹورنامنٹ کیلئے ٹیم کے سینئر اسٹارز کو آرام دیا گیا تھا، اس لئے نوجوان کھلاڑیوں پر بہتر کارکردگی دکھانے کی ذمہ داری تھی اور انہوں نے اس کے مطابق کھیل پیش کیا۔ اس کوارٹر میں راجندر نے ۲۴؍ویں منٹ میں، دلپریت سنگھ نے ۲۵؍ویں منٹ میں اور جگراج نے ۲۶؍ویں منٹ میں اپنا دوسرا گول کیا۔

۷؍ایک کی برتری کے ساتھ آگے بڑھتی ہندوستانی ٹیم کو کوئی روک نہیں پا رہا تھا، لیکن کینیڈا نے تیسرے کوارٹر میں اپنے حملے میں کچھ تبدیلی کی، جس کے نتیجے میں ۳۵؍ویں منٹ میں پنالٹی اسٹروک ملا۔ میتھیو سارمینٹو نے اسے آسانی سے گول میں تبدیل کیا اور اسکور ۲۔۷؍ہوگیا۔ اس دوران جگراج نے ۳۹؍ویں منٹ میں گول کر کے اپنی ہیٹ ٹرک مکمل کی جبکہ سیلوَم کارتھی نے ۴۳؍ویں منٹ میں گول کرتےہوئے ہندوستان کی برتری کو ۲۔۹؍ تک پہنچا دیا۔

آخری کوارٹر  میں سب سے زیادہ۶؍ گول ہوئے۔ ابتدا ۴۶؍ویں منٹ میں امیت روہِداس کے پنالٹی کارنر سے ہوئی، جس کے بعد ۵۰؍ویں منٹ میں جگراج کے پنالٹی اسٹروک سے گول ہوا۔ دونوں ٹیموں کو پنالٹی کارنر ملے اور اس دوران کینیڈا نے بھی ایک اور گول کیا۔ جیوتسوروپ سدھو کے گول سے اسکور ۳۔۱۱؍ہوگیا۔ سنجے نے ۵۶؍ ویں منٹ میں پنالٹی اسٹروک سے گول کر کے اپنا نام اسکور شیٹ میں درج کرایا جبکہ ابھیشیک نے ۵۷؍ویں اور ۵۹؍ویں منٹ میں ۲؍ گول کر کے میچ کو ۳۔۱۴؍کی فتح کے ساتھ ختم کیا۔