آئی سی سی کی تازہ رینکنگ میں بنگلہ دیش کے تیز گیند بازوں کی ۳؍ رکنی ٹیم کو زبردست فائدہ ہوا ہے۔ شریف الاسلام، مستفیض الرحمٰن اور ناہید رانا نے نیوزی لینڈ کے خلاف حالیہ سیریز میں مجموعی طور پر ۱۸؍ وکٹ حاصل کئے، جس کے بعد ان کی رینکنگ میں نمایاں بہتری آئی ہے۔

آئی سی سی کی تازہ رینکنگ میں بنگلہ دیش کے تیز گیند بازوں کی ۳؍ رکنی ٹیم کو زبردست فائدہ ہوا ہے۔ شریف الاسلام، مستفیض الرحمٰن اور ناہید رانا نے نیوزی لینڈ کے خلاف حالیہ سیریز میں مجموعی طور پر ۱۸؍ وکٹ حاصل کئے، جس کے بعد ان کی رینکنگ میں نمایاں بہتری آئی ہے۔ میزبان بنگلہ دیش نے ون ڈے سیریز ۱۔۲؍ سے جیت لی۔
شریف الاسلام ون ڈے بولرس کی رینکنگ میں ۱۱؍ درجے ترقی کرکے ۲۸؍ویں نمبر پر پہنچ گئے ہیں جبکہ مستفیض نے ۱۴؍ درجے کی بڑی چھلانگ لگا کر ۴۱؍ واں مقام حاصل کیا ہے۔ سیریز کے بہترین کھلاڑی قرار پانے والے ناہید رانا کو سب سے زیادہ فائدہ ہوا، وہ ۱۶؍ درجے ترقی کرکے ۴۸؍ویں نمبر پر پہنچ گئے ہیں۔ یہ اگلے عالمی ٹورنامنٹ سے قبل بنگلہ دیش کی تیز گیند بازی کی بڑھتی ہوئی طاقت کو ظاہر کرتا ہے۔
 ون ڈے سیریز میں کارکردگی کے بعد بنگلہ دیش کے بلے بازوں کی رینکنگ میں بھی بہتری آئی ہے۔ مسلسل اچھی کارکردگی کے باعث نجم الحسن شانتو ۱۱؍ درجے ترقی کرکے ۳۲؍ویں نمبر پر پہنچ گئے ہیں، جبکہ لٹن داس ۱۵؍ درجے ترقی کرکے ۶۵؍ویں نمبر پر آگئے ہیں۔
آل راؤنڈر مہدی حسن نے اپنی پوزیشن مزید مضبوط کرتے ہوئے ون ڈے آل راؤنڈرز کی رینکنگ میں ایک درجہ بہتری کے ساتھ مشترکہ طور پر تیسرے نمبر پر جگہ بنا لی ہے۔ ان کا اثر چٹوگرام میں سیریز کے فیصلہ کن میچ میں نظر آیا، جہاں انہوں نے بلے اور گیند دونوں سے اہم کردار ادا کیا۔

یہ بھی پڑھئے:فلم ’’پیڈی‘‘ میں ڈانس نمبر کے لیے شروتی ہاسن کو خطیر رقم ملی

 دونوں ممالک کے درمیان ٹی۲۰؍ سیریز کا پہلا میچ بنگلہ دیش نے ۶؍ وکٹوں سے جیت لیا۔ اس میچ کے بعد ٹی۲۰؍ رینکنگ میں بھی بنگلہ دیشی کھلاڑیوں کو فائدہ ہوا ہے۔ توحید ہردے نے پہلے میچ میں نصف سنچری اسکور کرکے سب کو متاثر کیا۔ وہ ٹی۲۰؍ بلے بازوں کی رینکنگ میں ۹؍ درجے ترقی کرکے ۳۹؍ویں نمبر پر پہنچ گئے ہیں۔ پرویز حسین ایمون نے بھی اپنی رینکنگ بہتر کی اور تین درجے ترقی کرکے مشترکہ طور پر ۴۰؍ویں نمبر پر آگئے ہیں۔ اس کے علاوہ گیند بازوں میں مہدی حسن تین درجے ترقی کرکے مشترکہ طور پر ۱۸؍ویں نمبر پر پہنچ گئے ہیں۔

یہ بھی پڑھئے:فیفا اور اے ایف سی نے افغان خواتین کو بین الاقوامی میچوں میں شرکت کی اجازت دی

دوسری جانب نیپال کے کھلاڑیوں کو بھی متحدہ عرب امارات کے خلاف ہوم سیریز کے بعد رینکنگ میں فائدہ ہوا ہے۔ ٹی۲۰؍ بلے بازوں کی رینکنگ میں دیپیندر سنگھ ایری ۶۰؍ویں نمبر پر پہنچ گئے ہیں۔ کُشل بھُرتیل نے ۱۸؍ درجے کی بڑی چھلانگ لگا کر مشترکہ طور پر ۶۶؍واں مقام حاصل کیا۔ اس جوڑی نے ٹی۲۰؍ آل راؤنڈرز کی رینکنگ میں بھی اپنی پوزیشن بہتر کی اور بالترتیب چوتھے اور ۲۳؍ویں نمبر پر پہنچ گئے۔ اس طرح کرکٹ کے مختصر ترین فارمیٹ میں نیپال کے لیے یہ ایک نہایت کامیاب دور ثابت ہوا۔