بارسلونا نے اپنے تاریخی کیمپ ناؤ اسٹیڈیم میں واپسی کے موقع پر جشن کو ۴؍ چاند لگا دیے، جب ٹیم نے  ایتھلیٹک بلباؤ کوچار صفر سے شکست دے کر شاندار آغاز کیا۔ کیمپ ناؤ، جو گزشتہ ۲؍ سال سے زائد عرصے تک تعمیرِ نو کیلئے بند تھا، تقریباً ۴۵؍ ہزار شائقین کے ساتھ جزوی گنجائش پر دوبارہ کھولا گیا۔ یورپ کے سب سے بڑے اسٹیڈیم کی تعمیر نو کا مقصد کلب کی آمدنی میں اضافہ کرنا ہے۔

میچ کی شروعات ہی میں رابرٹ انڈووسکی نے چوتھے منٹ میں پہلا گول کرکے ٹیم کی فتح کی بنیاد رکھ دی۔فیران ٹوریس نے لامین یمل کی شاندار ۲؍ اسسٹ سے ۲؍ گول اسکور کئے جبکہ فرمین لوپیز نے کیمپ ناؤ میں اپنے پہلے ہی میچ میںگول کیا۔ایتھلیٹک بلباؤ کے اویہان سانسیٹ کو ۵۳؍ویں منٹ میں لوپیز پر خطرناک فاؤل کرنے پر ریڈ کارڈ دکھایا گیا، اس وقت بارسلونا تین صفرسے آگے تھا۔میچ کے بعد رابرٹ لیونڈووسکی نے کہا کہ ’ہم نے آغاز سے ہی اچھا کھیل پیش کیا، لیکن آج کی اصل خوشی کیمپ ناؤ واپسی ہے۔ یہاں کھیلنا ہی کچھ اور بات ہے۔ مجھے لگتا ہے کہ ہم کیمپ ناؤ میں تھوڑے اور مضبوط ہو جاتے ہیں۔‘‘

بارسلونا کے شائقین نے سرد موسم کے باوجود گانے اور نعروں سے ماحول کو جشن میں بدل دیا۔  یاد رہے کہ آخری بار کیمپ ناؤ میں  مئی ۲۰۲۳ء میں میچ کھیلا گیا تھا۔ اس دوران بارسلونا نے اپنے ہوم میچز شہر کے اوپر پہاڑی پر واقع اولمپک اسٹیڈیم میں کھیلے جو پہنچنے میں مشکل بھی تھا اور جذباتی طور پر گھر جیسا احساس نہیں دیتا تھا۔