ہندوستان کے ون ڈے فارمیٹ میں پہلی پسند وکٹ کیپر بلے باز کے ایل راہل کو جنوبی افریقہ کے خلاف آنے والی ون ڈے سیریز کیلئے اسٹینڈ اِن کپتان بنایا گیا ہے۔ باقاعدہ کپتان شبھ من گل اور نائب کپتان شریاس ایر کے زخمی ہونے کی وجہ سے سلیکشن کیلئے دستیاب نہ ہونے کے سبب۳؍ میچوں کی سیریز میں قیادت کی ذمہ داری راہل کو سونپی گئی ہے۔ تینوں میچ رانچی (۳۰؍ نومبر)، رائے پور (۳؍ دسمبر) اور وِشاکھا پٹنم (۶؍ دسمبر) میں ہوں گے۔

تلک ورما، رشبھ پنت، رویندر جڈیجہ اور رتوراج گائیکواڑ کو حال ہی میں آسٹریلیا دورے میں شامل کیا گیا تھا جبکہ اس بار اکشر پٹیل اور محمد سراج اسکواڈ میں جگہ نہیں بنا سکے انہیں آرام دیا گیا ہے۔ تاہم ایک اہم تبدیلی کے طور پر رشبھ پنت کی ون ڈے ٹیم میں واپسی ہوئی ہے۔پنت کی واپسی کے باوجود نوجوان وکٹ کیپر دھروو جوریل بھی ٹیم میں برقرار رہیں گے۔ اکشر پٹیل، جنہیں آسٹریلیا سیریز میں پہلی پسند لیفٹ آرم اسپنر کے طور پر منتخب کیاگیا تھا، جڈیجہ کی واپسی کے بعد اپنی جگہ برقرار نہ رکھ سکے۔

گل اورایئر دونوں کی غیر موجودگی میں، سلیکٹرز نے ۱۵؍ رکنی اسکواڈ میں تلک ورما اور رتوراج گائیکواڑ کو شامل کیا ہے۔ تجربہ کار روہت شرما اور وراٹ کوہلی بلے بازی لائن اپ کی قیادت کریں گے اور دونوں توجہ کا مرکز رہیں گے  جبکہ یشسوی جیسوال کو بھی ایک اور موقع ملنے کا امکان ہے۔

ہاردک پانڈیا کی دستیابی نہ ہونے کی وجہ سے نتیش ریڈی ٹیم میں برقرار رہیں گے۔ ہندوستان کے پاس صرف ۳؍ فرنٹ لائن فاسٹ بولرزعرشدیپ سنگھ، ہرشت رانا اور پرسِدھ کرشنا ہوں گے کیونکہ دو ٹیسٹ میچوں کے بعد سراج اور بمراہ کو اس یکروزہ  سیریز میں آرام دیا گیا ہے۔ اسپن گیندبازی کے شعبہ میں کلدیپ یادو، واشنگٹن سندر اور رویندر جڈیجہ شامل ہوں گے۔

ہندوستانی ٹیم (اسکواڈ):روہت شرما، یشسوی جیسوال، وراٹ کوہلی، تلک ورما، کے ایل راہل (کپتان، وکٹ کیپر)، رشبھ پنت (وکٹ کیپر)، واشنگٹن سندر، رویندر جڈیجہ، کلدیپ یادو، نتیش کمار ریڈی، ہرشت رانا، رتوراج گائیکواڑ، پرسِدھ کرشنا، عرشدیپ سنگھ اوردھروو جوریل۔