سلمان خان اور پربھاس کی فلموں کے درمیان ۲۰۲۷ء میں بڑے باکس آفس تصادم کی راہ ہموار ہوگئی ہے، ٹی سیریز نے واضح کردیا ہے کہ سندیپ ریڈی وانگا کی ہدایتکاری میں بننے والی فلم ’’اسپرٹ‘‘ کی ریلیز ملتوی نہیں کی گئی، فلم ۵؍ مارچ ۲۰۲۷ء کو ہی سینما گھروں میں پیش کی جائے گی۔

سلمان خان نے ۲۰۲۷ء میں عید کے موقع پر اپنی فلم کی ریلیز کا اعلان کیا ہے، تب سے یہ قیاس آرائیاں جاری ہیں کہ اسی عرصے میں ریلیز کیلئے مقرر پربھاس کی فلم ’’اسپرٹ‘‘ کیا اپنی تاریخ تبدیل کرے گی یا نہیں۔ حالیہ رپورٹس میں دعویٰ کیا گیا تھا کہ سندیپ ریڈی وانگا کی فلم کو بعد کی تاریخ تک ملتوی کردیا گیا ہے، جس سے سلمان خان کی آنے والی فلم کیلئے راستہ صاف ہوسکتا ہے۔ تاہم فلم ’’اسپرٹ‘‘ کے میکرز نے اب باضابطہ طور پر ان رپورٹس کی تردید کردی ہے۔

یہ بھی پڑھئے: ٹام ہالینڈ ۲۰۲۶ء کے سب سے مہنگے اداکار، ۱۰۵۲؍ کروڑ فیس، رابرٹ دوسرے نمبر پر

فلم ’’اسپرٹ‘‘ ۲۰۲۷ء میں ریلیز سے پیچھے نہیں ہٹی

سندیپ ریڈی وانگا کی ہدایتکاری میں بننے والی فلم ’’اسپرٹ‘‘ میں پربھاس مرکزی کردار ادا کر رہے ہیں، جبکہ ترپتی ڈمری اور وویک اوبرائے بھی فلم کا حصہ ہیں۔ بھوشن کمار کی ٹی سیریز کے بینر تلے پروڈیوس ہونے والی یہ فلم فی الحال ۵؍ مارچ ۲۰۲۷ء کو ریلیز کیلئے مقرر ہے۔ دلچسپ بات یہ ہے کہ یہی تاریخ سلمان خان اور وامشی پیڈی پلی کی بغیر عنوان والی فلم کیلئے بھی مقرر کی گئی ہے۔ فلم ’’اسپرٹ‘‘ کی ریلیز ملتوی ہونے کی رپورٹس کے بعد ٹی سیریز کے ترجمان نے زوم کو صورتحال واضح کرتے ہوئے کہا، ’’ہم فلم ’’اسپرٹ‘‘ کی ریلیز کے حوالے سے مکمل طور پر اپنے شیڈول کے مطابق آگے بڑھ رہے ہیں۔ فلم ۵؍ مارچ ۲۰۲۷ء کو ریلیز ہونے والی ہے اور اعلان کردہ ریلیز تاریخ میں بالکل کوئی تبدیلی نہیں کی گئی۔ ہم شیڈول کے مطابق کام کر رہے ہیں اور ۵؍ مارچ ۲۰۲۷ء کو دنیا بھر کے ناظرین کیلئے فلم پیش کرنے کی تیاری کر رہے ہیں۔‘‘

یہ پہلی مرتبہ نہیں ہے کہ میکرز کو فلم کی ریلیز سے متعلق قیاس آرائیوں کی وضاحت کرنا پڑی ہو۔ رواں سال مئی میں بھی ایسی رپورٹس سامنے آئی تھیں کہ فلم ’’اسپرٹ‘‘ کی ریلیز ممکنہ طور پر ملتوی کردی جائے گی۔ اس وقت بھی پروڈکشن ہاؤس نے واضح کیا تھا کہ فلم اعلان کردہ تاریخ پر ہی ریلیز کیلئے تیار کی جارہی ہے۔ اس وضاحت کے بعد فی الحال فلم ’’اسپرٹ‘‘ اور سلمان خان کی آنے والی فلم ایک ہی تاریخ پر ریلیز کیلئے مقرر ہیں، جس سے ۲۰۲۷ء میں بالی ووڈ کے سب سے بڑے باکس آفس مقابلوں میں سے ایک ہونے کا امکان پیدا ہوگیا ہے۔

یہ بھی پڑھئے: سیف علی خان اور فرحان اختر ۲۵؍ سال بعد دوبارہ ایک ساتھ، سپر نیچرل فلم بنائیں گے

فلم ’’اسپرٹ‘‘ کے بارے میں 

فلم ’’اسپرٹ‘‘ پربھاس اور ہدایتکار سندیپ ریڈی وانگا کی پہلی مشترکہ فلم ہے۔ سندیپ ریڈی وانگا اس سے قبل رنبیر کپور کی فلم ’’اینیمل‘‘ کی ہدایتکاری کرچکے ہیں۔ ہدایتکار نے گزشتہ اکتوبر میں پربھاس کی سالگرہ کے موقع پر فلم کی پہلی ’’ساؤنڈ اسٹوری‘‘ جاری کرکے مداحوں کو اس ایکشن ڈراما کی ابتدائی جھلک دکھائی تھی۔ ایک منٹ کے اس آڈیو ٹیزر میں ایک جیلر اور اس کا معاون ایک سابق پولیس افسر کے بارے میں گفتگو کرتے ہوئے دکھائی دیتے ہیں، جسے ریمانڈ پر رکھا گیا ہے۔ اس آڈیو نے پربھاس کے کردار اور فلم کی دنیا کے حوالے سے ایک پراسرار اشارہ دیا تھا۔

سلمان خان کی فلم کے بارے میں

سلمان خان اور ہدایتکار وامشی پیڈی پلی پہلی بار اس بغیر عنوان والے پروجیکٹ کیلئے ایک ساتھ کام کر رہے ہیں۔ فلم کو سری وینکٹیشورا کریئیشنز کے بینر تلے دل راجو پروڈیوس کر رہے ہیں۔ فی الحال ورکنگ ٹائٹل SVC63 کے نام سے جانی جانے والی اس فلم میں سلمان خان پہلی بار نین تارا کے ساتھ مرکزی اداکار کے طور پر نظر آئیں گے۔ ابھیمنیو سنگھ بھی اہم کردار میں فلم کا حصہ ہیں۔ فلم ۲۰۲۷ء میں عید کے موقع پر سینما گھروں میں ریلیز کیلئے تیار کی جارہی ہے، تاہم میکرز نے ابھی تک ریلیز کی حتمی تاریخ کا اعلان نہیں کیا ہے۔