• Fri, 20 November, 2026
  • EPAPER

Inquilab Logo Happiest Places to Work

بمراہ نے۳؍ وکٹ لئے، نکولس اور فلپس نے اننگز سنبھالی

Updated: November 20, 2026, 1:11 PM IST | Agency | Wellington

جسپریت بمراہ کی شاندار گیندبازی کے باوجود نیوزی لینڈ نے ویلنگٹن ٹیسٹ کے پہلے دن اچھا کھیلتے ہوئے کھیل ختم ہونے تک ۵؍ وکٹ پر ۲۴۳؍ رن بنا لیے۔

 Jasprit Bumrah. Photo: INN
جسپریت بمراہ۔ تصویر: آئی این این

ہندوستانی تیز گیندباز جسپریت بمراہ کی شاندار گیندبازی کے باوجود نیوزی لینڈ نے ویلنگٹن ٹیسٹ کے پہلے دن مضبوط واپسی کرتے ہوئے کھیل ختم ہونے تک ۵؍ وکٹ پر ۲۴۳؍ رن بنا لیے۔ ایک وقت میزبان ٹیم کا اسکور ۷۰؍ رن پر ۵؍ وکٹ تھا، لیکن ہینری نکولس اور گلین فلپس نے چھٹی وکٹ کے لیے ناٹ آؤٹ ۱۷۳؍ رن کی شراکت کرکے ٹیم کو مشکل صورت حال سے نکال لیا۔ نکولس ۱۱۳؍رن اور فلپس ۹۴؍ رن بنا کر کریز پر موجود تھے۔بیسن ریزرو کی ہری گھاس والی پچ پر ہندوستان نے ٹاس جیت کر پہلے گیندبازی کا فیصلہ کیا۔ کپتان شبھ من گل کا یہ فیصلہ ابتدا میں درست ثابت ہوا۔ بمراہ نے پہلے ہی اوور میں ٹام لیتھم کو بولڈ کرکے ہندوستان کو پہلی کامیابی دلائی۔ اس کے بعد انشول کمبوج نے ڈیون کونوے کو وکٹ کے پیچھے کیچ آؤٹ کرایا۔ کونوے نے اس سے پہلے ریویو کے ذریعے بمراہ کی گیند پر اپنے خلاف دیا گیا کیچ آؤٹ کا فیصلہ تبدیل کرا لیا تھا۔نکولس نے راچن رویندر کے ساتھ اننگز کو سنبھالنے کی کوشش کی اور دونوں نے تیسری وکٹ کے لیے۹۵؍ گیندوں پر۳۹؍ رن جوڑے۔ تاہم آکاش دیپ نے رویندر کو وکٹ کے پیچھے کیچ آؤٹ کراکے اس شراکت کا خاتمہ کردیا۔ اس کے بعد بمراہ نے ڈیرل مچل کو یشسوی جیسوال کے ہاتھوں کیچ آؤٹ کرا دیا۔ لنچ تک نیوزی لینڈ کا اسکور چار وکٹ پر ۶۰؍ رن تھا۔

یہ بھی پڑھئے:کیمرون بینکرافٹ کے انکشافات کے باوجودپیٹ کمنز اپنے موقف پر قائم

دوسرے سیشن میں بھی بمراہ نے اپنی عمدہ گیندبازی جاری رکھی اور ٹام بلنڈل کو سلپ میں شبھ من گل کے ہاتھوں کیچ آؤٹ کرا دیا۔ اس وقت نیوزی لینڈ کا اسکور پانچ وکٹ پر۷۰؍ رن تھا۔ تاہم اس کے بعد فلپس اور نکولس نے ہندوستانی گیندبازوں کو مزید کوئی کامیابی حاصل نہیں کرنے دی۔ دونوں بلے بازوں نے محتاط اور جارحانہ انداز کا امتزاج پیش کرتے ہوئے رن بنانے کی رفتار بڑھائی۔ فلپس نے ٹیسٹ کرکٹ میں اپنے ایک ہزار رن مکمل کیے، جبکہ نکولس نے بیسن ریزرو میں اپنی پانچویں ٹیسٹ سنچری مکمل کی۔ وہ اس میدان پر ۱۵؍اننگز میں پانچ سنچریاں بنانے والے نمایاں بلے باز بن گئے ہیں۔ہندوستانی گیندبازوں کو بمراہ کی غیر موجودگی میں وکٹ حاصل کرنے میں دشواری کا سامنا کرنا پڑا۔ پرسدھ کرشنا، آکاش دیپ اور انشول کمبوج زیادہ اثر نہیں چھوڑ سکے جبکہ رویندر جڈیجہ کی کمی بھی محسوس ہوئی۔ جڈیجہ کی جگہ واشنگٹن سندر کو ٹیم میں شامل کیا گیا تھا۔

یہ بھی پڑھئے: آئی پی ایل ۲۰۲۷ء کیلئے تمام۱۰؍ فرنچائزوں نے۱۸۴؍ کھلاڑیوں کو برقرار رکھا

سراج اور جڈیجہ کو ٹیم سے باہر رکھنے کے فیصلے کا کوٹک نے دفاع کیا

ویلنگٹن(ایجنسی):ہندوستانی کرکٹ ٹیم کے بیٹنگ کوچ ستانشو کوٹک نے محمد سراج اور رویندر جڈیجہ کو پہلے ٹیسٹ کی پلیئنگ الیون میں شامل نہ کیے جانے کے فیصلے کا دفاع کرتے ہوئے کہا ہے کہ ٹیم مینجمنٹ نے اس میچ کیلئے بہترین ممکنہ ٹیم کا انتخاب کیا ہے۔ویلنگٹن میں پہلے ٹیسٹ سے ایک روز قبل ہندوستان کے گیندبازی کوچ مورنے مورکل نے محمد سراج کی پلیئنگ الیون میں شمولیت کے بارے میں کوئی واضح اشارہ نہیں دیا تھا، بلکہ انہوں نے ہندوستانی گیندبازی کی گہرائی پر زور دیا تھا۔ آخرکار ہندوستان نے چار تیز گیندبازوں کے ساتھ میدان میں اترنے کا فیصلہ کیا، لیکن جمعرات کو ٹاس کے بعد اعلان کردہ ٹیم میں سراج کا نام شامل نہیں تھا۔
ابتدائی مرحلے میں نیوزی لینڈ کے۷۰؍رن پر پانچ وکٹ گرنے کے بعد یہ فیصلہ درست دکھائی دیا، لیکن جیسے جیسے بیسن ریزرو کی پچ ہموار ہوتی گئی، جسپریت بمراہ کے علاوہ ہندوستانی گیندبازوں میں وکٹ حاصل کرنے کی وہ دھار نظر نہیں آئی۔ دن کے اختتام تک ہنری نکولس اور گلین فلپس نے نیوزی لینڈ کی پوزیشن مضبوط کر دی۔بظاہر ایسا لگ سکتا ہے کہ ہندوستان کو سراج کے تجربے کی کمی محسوس ہوئی، لیکن کوٹک نے ٹیم کے انتخاب کا دفاع کیا۔ ہندوستان نے پرسدھ کرشنا کے ساتھ آکاش دیپ اور انشول کمبوج کو بھی موقع دیا۔ انہوں نے واضح کیا کہ سری لنکا دورے پر سراج کی کارکردگی کا موجودہ ٹیسٹ کے لیے ان کے انتخاب سے کوئی تعلق نہیں تھا۔ اگست میں سری لنکا کے خلاف دو ٹیسٹ میچوں میں سراج نے چار وکٹ لئے تھے، تاہم اس دوران ان کی گیندبازی کی رفتار معمول سے کافی کم رہی تھی۔پہلے دن کا کھیل ختم ہونے کے بعد صحافیوں سے بات کرتے ہوئے کوٹک نے کہاکہ سراج کے ساتھ کوئی مسئلہ نہیں ہے۔ میرا مطلب ہے کہ مجھے کوئی دقت نظر نہیں آتی۔ ٹیم مینجمنٹ کو لگا کہ یہی بہترین الیون ہے اور اسی ٹیم نے اس میچ میں میدان سنبھالا ہے۔ سری لنکا کے حالات یقیناً مختلف تھے اور سراج نے وہاں دونوں ٹیسٹ کھیلے تھے۔جب ان سے پوچھا گیا کہ کیا ہندوستان کا انتخاب غلط ثابت ہوا، تو کوٹک نے اس سے اتفاق نہیں کیا۔ انہوں نے سراج کو عالمی معیار کا گیندباز قرار دیتے ہوئے کہا کہ میدان میں اتارے گئے ہندوستانی گیندبازی کے شعبے میں کافی تنوع موجود تھا۔ ہندوستانی ٹیم کے بیٹنگ کوچ  کے کوٹک نے کہاکہ دو گیندباز سیم موومنٹ پیدا کرنے میں ماہر ہیں جبکہ دو سوئنگ کرانے کی صلاحیت رکھتے ہیں۔ 

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK