چنئی کا ایم اے چدمبرم اسٹیڈیم بگ بیش لیگ (بی بی ایل) ۲۷۔۲۰۲۶ء سیزن کے افتتاحی میچ کی میزبانی کرے گا۔ سیزن کا آغاز ۱۲؍ دسمبر کو میلبورن رینیگیڈز اور دفاعی چیمپئن پرتھ اسکارچرز کے درمیان مقابلے سے ہوگا۔

چنئی کا ایم اے چدمبرم اسٹیڈیم بگ بیش لیگ (بی بی ایل) ۲۷۔۲۰۲۶ء سیزن کے افتتاحی میچ کی میزبانی کرے گا۔ سیزن کا آغاز ۱۲؍ دسمبر کو میلبورن رینیگیڈز اور دفاعی چیمپئن پرتھ اسکارچرز کے درمیان مقابلے سے ہوگا۔ کرکٹ آسٹریلیا کو امید ہے کہ یہ اقدام مستقبل میں انڈین پریمیئر لیگ (آئی پی ایل) کے کسی میچ کی آسٹریلیا میں میزبانی کی راہ ہموار کر سکتا ہے، بشرطیکہ ہندوستانی کرکٹ کنٹرول بورڈ مستقبل میں آئی پی ایل کے کسی میچ کو بیرونِ ملک منعقد کرنے کا فیصلہ کرے۔

یہ بھی پڑھئے:محمود عباس نے۲۰؍ سال بعد پہلے فلسطینی قانون ساز انتخابات کی تاریخ مقرر کی

آئی پی ایل میں چنئی سپر کنگز کے ہوم گراؤنڈ ایم اے چدمبرم اسٹیڈیم میں یہ میچ مقامی وقت کے مطابق دوپہر   ۲؍بجکر ۴۰؍ منٹ اور آسٹریلوی وقت کے مطابق رات ۸؍ بجکر۱۰؍ منٹ پر شروع ہوگا۔ اس کا شیڈول اس طرح ترتیب دیا گیا ہے کہ یہ پرتھ میں نیوزی لینڈ کے خلاف پہلے ٹیسٹ کے چوتھے دن کے کھیل کے فوراً بعد شروع ہو، تاہم اگر ٹیسٹ میچ اس وقت بھی جاری رہا تو دونوں مقابلوں کے اوقات ایک دوسرے سے متصادم ہو سکتے ہیں۔ یہ میچ میلبورن رینیگیڈز کا ہوم میچ تصور کیا جائے گا۔
اس کا باضابطہ اعلان جمعہ کو میلبورن کرکٹ گراؤنڈ میں منعقدہ ایک تقریب کے دوران کیا گیا، جس میں آسٹریلیا کے وزیر اعظم انتھونی البانیز اور ہندوستان کے وزیر اعظم نریندر مودی نے شرکت کی۔ اس میچ کے انعقاد میں دونوں حکومتوں نے اہم کردار ادا کیا ہے جبکہ اسے ’’سینٹر آف آسٹریلیا-انڈیا ریلیشنز‘‘کی جانب سے جزوی مالی معاونت بھی فراہم کی گئی ہے۔ یہ مقابلہ دونوں ممالک کے تعلقات کو فروغ دینے کے لیے ہفتہ بھر جاری رہنے والی سرگرمیوں کا حصہ ہوگا۔ کرکٹ آسٹریلیا بھی اس ایونٹ کے لیے مالی تعاون فراہم کرے گا اور اس سے متعلق تجارتی مواقع سے فائدہ اٹھانے کی کوشش کرے گا۔

یہ بھی پڑھئے:آرین خان: شاہ رخ خان کے بیٹے کو مداحوں کے ہجوم نے گھیر لیا

بی بی ایل کے ایگزیکٹیو جنرل منیجر ایلسٹیر ڈوبسن نے کہا’’ریاستی حکومت، میزبان مقام اور ہمارے بعض کلبوں کی سطح پر وقتاً فوقتاً اس بات میں دلچسپی ظاہر کی جاتی رہی ہے کہ اگر آئی پی ایل کا کوئی میچ یہاں منعقد ہو تو وہ کیسا ہوگا۔ آئی پی ایل اپنی نوعیت میں ایک منفرد ٹورنامنٹ ہے اور اس سے دونوں ممالک کے درمیان کھیلوں کے تعلقات کو مزید تقویت ملے گی۔ ہم نے پہلے ہی میلبورن میں این ایف ایل میچ کے حوالے سے شائقین کا غیرمعمولی جوش دیکھا ہے۔ ضروری نہیں کہ یہ مستقبل کا منصوبہ اسی ایونٹ سے وابستہ ہو، لیکن جب مناسب وقت آئے گا تو اس بارے میں سنجیدہ بات چیت ضرور ہوگی۔ مجھے یقین ہے کہ آسٹریلوی کرکٹ اس کے لیے پوری طرح تیار ہوگی، کیونکہ آسٹریلیا میں آئی پی ایل کی مقبولیت پہلے ہی بہت زیادہ ہے۔‘‘