فائنل میں موہن بگان کو ایک کے مقابلے ۴؍گول سے ہرادیا،ایڈمنڈ کی ہیٹ ٹرک۔

گزشتہ رات کولکاتا میں موہن بگان کیخلاف ایک کے مقابلے ۴؍ گول کی شاندار جیت کے ساتھ ایسٹ بنگال نے اپنا ۱۷؍ واں خطاب جیت لیا اور ڈورنڈ کپ کی تاریخ میں سب سے کامیاب ٹیموں کی فہرست میں موہن بگان سپر جائنٹ کے ریکارڈ کی برابری کر لی۔ ایسٹ بنگال کے بپن سنگھ نے ۱۰؍ویں منٹ میں گول کرکے شروعات کی، جس کے بعد ایڈمنڈ لالرنڈیکا نے ۱۱؍ویں، ۲۲؍ ویں اور ۴۴؍ویں منٹ میں شاندار کھیل کا مظاہرہ کرتے ہوئے ہیٹ ٹرک کی اور کلب کے ۲۲؍ سالہ ڈورنڈ کپ خطاب کی خشک سالی کو ختم کر دیا۔

وویکانند یووا بھارتی کریڑانگن میں کھیلے گئے اس میچ میں موہن بگان کی جانب سے واحد گول منویر سنگھ نے ۳۳؍ویں منٹ میں کیا، جس سے فرق کچھ کم ہوا۔

یہ بھی پڑھئے: ہاکی ورلڈ کپ :ارجنٹائنا سے ہار کر ہندوستانی مردوں کی ٹیم سیمی فائنل کی دوڑ سے باہر

ونگر بپن سنگھ نے ۱۰؍ویں منٹ میں گول کرکے کھاتہ کھولا۔ محمد راشد کی جانب سے باکس کے اندر دی گئی تھرو بال پر انہوں نے سکون سے گیند کو نچلے دائیں کونے میں پہنچا دیا۔ اس کے ٹھیک ۲؍منٹ بعد ایڈمنڈ لالرنڈیکا نے باکس کے باہر سے نچلی سطح کا شاٹ لگا کر ایسٹ بنگال کی برتری دگنی کر دی۔ ایڈمنڈ نے ۲۲؍ویں منٹ میں پھر گول کیا۔ انہوں نے آگے بڑھ رہے گول کیپر وشال کیتھ کو چکمہ دیا اور گیند خالی جال میں ڈال دی۔

موہن بگان نے ۳۳؍ویں منٹ میں منویر سنگھ کے ذریعے ایک گول واپس کیا۔ دائیں جانب سے گیند ملنے پر منویر اندر کی طرف آئے اور جال میں گیند ڈال دی۔ ہاف ٹائم سے ٹھیک پہلے ایسٹ بنگال نے اپنی ۳؍گول کی برتری دوبارہ حاصل کر لی۔ ایڈمنڈ لالرنڈیکا نے ۴۴؍ویں منٹ میں اپنی ہیٹ ٹرک مکمل کی اور ریڈ اینڈ گولڈ بریگیڈ کو ہاف ٹائم تک ۴۔ایک کی برتری دلا دی۔

یہ بھی پڑھئے: دھرو جوریل کی ناٹ آؤٹ سنچری، ہندوستان نے ۵۰۳؍رنز پر اننگز ڈکلیئر کردی

میچ دوبارہ شروع ہونے کے بعد بھی ریڈ اینڈ گولڈ بریگیڈ نے اپنا غلبہ برقرار رکھا اور دفاع میں مضبوطی دکھاتے ہوئے آسانی سے جیت حاصل کی۔ اس جیت نے ہیڈ کوچ انتونیو حباس کو ایسٹ بنگال کے ساتھ اپنی پہلی ٹرافی بھی دلا دی۔ انہوں نے ہی موہن بگان کو آئی ایس ایل ۲۴۔۲۰۲۳ء لیگ شیلڈ  میں کامیابی دلوائی تھی۔

یہ ڈورنڈ کپ ۲۰۲۶ء سیزن کی دوسری کولکاتا ڈربی تھی۔ ٹورنامنٹ کا آغاز بھی ایسٹ بنگال اور موہن بگان کے درمیان مقابلے سے ہوا تھا، جسے میرینرز نے ایک صفرسے جیتا تھا۔  ایسٹ بنگال موجودہ انڈین سپر لیگ چمپئن ہے اور حال ہی میں اس نے ابتدائی مرحلے میں کویت کے ال عربی ایس سی کو ۴۔ایک سے شکست دے کر اے ایف سی چمپئن لیگ ٹو ۲۷۔۲۶؍کے اہم مرحلے میں جگہ بنائی ہے۔