ترکی کی پارلیمنٹ میں ترک جمہوریہ کے بانی کمال  اتاترک کی میراث پر گرما گرم بحث کے دوران حکمراں  جماعت اور اپوزیشن کے اراکین کے درمیان نوبت ہاتھا پائی تک آگئی ۔حزب اقتدار واختلاف کے اراکین  کے درمیان ۱۰؍ منٹ تک ہنگامہ جاری رہا اوراس دوران دونوں طرف کے اراکین نے ایک دوسرے پر ہاتھ بھی چھوڑے۔ اجلاس میںبجٹ ۲۰۲۶ء کی تجویز پیش کی گئی لیکن اس دوران مصطفیٰ کمال اتاترک کی سیاسی میراث پر بحث تنازع میں بدل گئی اورپھرتنازع ہاتھا پائی میں بدل گیا ۔ بعد ازاں بجٹ اور۲۰۲۴ء مالیاتی اکاؤنٹس بل دونوں کو بالآخر منظور کر لیا گیا۔

یہ واقعہ اس وقت پیش آیا جب اپوزیشن ری پبلکن پیپلز پارٹی کے پارلیمانی گروپ کے نائب سربراہ گوکان گونایدین نے خطاب کیا جس میں انہوں نےجسٹس اینڈ ڈیولپمنٹ پارٹی کے پارلیمانی گروپ کے نائب سربراہ اور صنعت تجارت توانائی قدرتی وسائل، اطلاعات اور ٹیکنالوجی کمیٹی کے سربراہ نیز بورصا سے رکن پارلیمنٹ مصطفی فارانک کی تقاریر پر تنقید کی۔ ان کا کہنا تھا کہ ان خطابات میں پنشنر یافتگان، چھوٹے کاروباری افراد اور کم از کم اجرت پر کام کرنے والوں کے مسائل کو نظر انداز کیا گیا۔

گونایدین نے اپنی پارٹی سے متعلق تنقید کا جواب دیتے ہوئے کہا کہ یہ دور مصطفیٰ کمال اتاترک کی نمائندگی کرتا ہے جسے وہ اپنے لئے اعزاز سمجھتے ہیں ۔ انہوں نے کہا کہ اس دور میں جلال بایار وزیر اعظم رہے جبکہ عدنان مندریس پارلیمنٹ کے رکن تھے۔ ان کے مطابق ان حقائق سے انکار تاریخی شعور کی کمزوری کو ظاہر کرتا ہے۔اس کے جواب میں حکمراں جماعت جسٹس اینڈ ڈیولپمنٹ پارٹی کے پارلیمانی گروپ کے سربراہ عبد اللہ گولر نے کہا کہ ری پبلکن پیپلز پارٹی کی بنیاد مصطفی کمال اتاترک نے رکھی تھی۔ انہوں نے مزید کہا کہ اتاترک کے بعد ایک اور نمایاں شخصیت عصمت انونو تھے جنہیں انہوں نے دائمی رہنما قرار دیا۔ گولر کے مطابق اینونو نے اتاترک کی وفات کے کچھ ہی عرصے بعد کرنسی نوٹوں سے ان کی تصویر ہٹانے کا حکم دیا تھا۔عبد اللہ گولر نے۱۹۴۵ء کے ایک تاریخی واقعے کا بھی حوالہ دیا جس میں بورالتان پل پر۱۹۵؍ آذربائیجانی پناہ گزینوں کو سوویت افواج کے حوالے کیا گیا تھا۔ ان کا کہنا تھا کہ ان افراد کا نامعلوم انجام تاریخی ریکارڈ میں محفوظ ہے۔بعد ازاں اجلاس کے دوران جب رکن پارلیمنٹ مصطفی فارانک نے ایسا انداز اختیار کیا جسے اشتعال انگیز سمجھا گیا تو اختلافات ایک بار پھر شدت اختیار کر گئے اور ایوان میں دوبارہ ہاتھا پائی شروع ہو گئی۔ اس صورتحال پر اسپیکر کو اجلاس ایک مرتبہ پھر معطل کرنا پڑا۔

حالات کچھ بہتر ہونے کے بعد پارلیمنٹ کی کارروائی دوبارہ شروع ہوئی اور اراکین پارلیمنٹ جنرل اسمبلی میں پہنچے۔ بعد ازاں بجٹ پر ووٹنگ کرائی گئی۔ بحث کے درمیان بل حکومت نے پاس کرا لیا۔ جنرل اسمبلی میں ہوئی ووٹنگ میں اعتراض والے۲۴۹؍ ووٹوں کے مقابلے۳۲۰؍ حمایت والے ووٹ پڑے اور اس طرح تجویز کو منظوری مل گئی۔