ڈیزرٹ وائپرز نے دبئی انٹرنیشنل اسٹیڈیم میں کھیلے گئے فائنل میں ایم آئی ایمریٹس کو۴۶؍ رنز سے شکست دے کر اپنی تاریخ کا پہلا ڈی پی ورلڈ آئی ایل ٹی ۲۰؍ ٹائٹل اپنے نام کر لیا۔

ڈیزرٹ وائپرز نے دبئی انٹرنیشنل اسٹیڈیم میں کھیلے گئے فائنل میں ایم آئی ایمریٹس کو۴۶؍ رنز سے شکست دے کر اپنی تاریخ کا پہلا ڈی پی ورلڈ آئی ایل ٹی ۲۰؍ ٹائٹل اپنے نام کر لیا۔ اس فیصلہ کن معرکے میں کپتان سیم کرن کی آل راؤنڈر کارکردگی اور نسیم شاہ کی تباہ کن بولنگ نے وائپرز کی فتح میں کلیدی کردار ادا کیا۔
فائنل میں وائپرز کے کپتان سیم کرن نے شاندار قیادت کا مظاہرہ کرتے ہوئے ناٹ آؤٹ ۷۴؍ رنز کی اننگز کھیلی۔ انہوں نے ۵۱؍ گیندوں پر ۸؍ چوکے اور دو چھکے لگائے اور ٹیم کو ۲۰؍ اوورز میں ۴؍ وکٹوں کے نقصان پر۱۸۲؍ رنز کے مضبوط اسکور تک پہنچایا۔ میکس ہولڈن نے۴۱؍ رنز کی عمدہ اننگز کھیلی جبکہ ڈین لارنس نے ۱۵؍ گیندوں پر تیز رفتار ۲۳؍ رنز بنا کر اختتامی اوورز میں اسکور کو مزید تقویت دی۔

Everything an athlete dreams of! 🏆
The peak of success! 😍

DESERT VIPERS etch their name in history!#Final #DVvMIE #DPWorldILT20 #WhereTheWorldPlays #AllInForCricket pic.twitter.com/jPHB81ST6Q

— International League T20 (@ILT20Official) January 4, 2026

ہدف کے تعاقب میں ایم آئی ایمریٹس کی بیٹنگ ابتدا ہی سے دباؤ کا شکار رہی۔ نسیم شاہ نے شاندار بولنگ کرتے ہوئے ۱۸؍رنز کے عوض۳؍ وکٹ حاصل کئے  جبکہ عثمان طارق (۲/۲۰) اور خضیمہ تنویر (۲/۲۲) نے بھی مؤثر کردار ادا کیا۔ ڈیوڈ پین نے ۱۸؍ویں اوور میں ۳؍ کھلاڑیوں کو آؤٹ کر کے ایم آئی ایمریٹس کی امیدوں پر پانی پھیر دیا۔ پوری ٹیم  ۳ء۱۸؍اوورز میں ۱۳۶؍ رنز پر ڈھیر ہو گئی۔ ایم آئی ایمریٹس کی جانب سے شکیب الحسن نے ۳۶؍ اور کیرون پولارڈ نے۲۸؍ رنز بنائے، تاہم ابتدائی وکٹ جلد گرنے کے باعث ٹیم بڑا ہدف حاصل کرنے میں ناکام رہی۔

یہ بھی پڑھئے:ریزرو بینک نے ۵۰؍ہزار کروڑ روپے کی سرکاری سیکیورٹیز خریدی

میچ سے قبل شاندار آتش بازی اور ڈرون شو نے دبئی کی فضاؤں کو روشن کر دیا، جس سے فائنل کا ماحول مزید یادگار بن گیا۔اس کامیابی کے ساتھ ڈیزرٹ وائپرز نے ۷؍ لاکھ ڈالر انعامی رقم اور بلیک بیلٹ حاصل کی، جبکہ رنر اپ ایم آئی ایمریٹس کو ۳؍ لاکھ ڈالر دیے گئے۔ سیم کرن نے شاندار آل راؤنڈ کارکردگی کی بدولت ریڈ بیلٹ (بہترین کھلاڑی) اور گرین بیلٹ (بہترین بلے باز) بھی اپنے نام کی۔ انہوں نے ٹورنامنٹ میں ۳۹۷؍ رنز اسکور کیے، ۷؍ وکٹ حاصل کئے اور۱۰؍ کیچز بھی پکڑے۔بہترین بولر (وائٹ بیلٹ) وقار سلام خیل (۱۸؍ وکٹ)۔بہترین یو اے ای پلیئر (بلیو بیلٹ) محمد وسیم (مسلسل چوتھی بار)۔

یہ بھی پڑھئے:نوواک جوکووچ کا اپنی ہی بنائی ہوئی اسوسی ایشن سے علیحدگی کا اعلان

میچ کے بعد گفتگو کرتے ہوئے سیم کرن نے کہا کہ فائنل سے قبل وہ خاصے نروس تھے، تاہم ٹیم کی مستقل مزاجی اور گہرائی نے فرق ڈال دیا۔ دوسری جانب ایم آئی ایمریٹس کے کپتان کیرون پولارڈ نے اعتراف کیا کہ فیلڈنگ میں غلطیوں اور ابتدائی وکٹوں کے نقصان نے میچ کو مشکل بنا دیا۔