انگلش کرکٹر نے کہاکہ سراج نے بین الاقوامی کرکٹ میں ایک مکمل گیندبازبننے کی سمت بڑی ترقی کی ہے

انگلینڈ کے سابق کرکٹر اور آل راؤنڈرمعین علی نے حال ہی میں انگلینڈ کے خلاف مکمل ہونے والی سیریز میں ہندوستان کے محمد سراج کی شاندار کارکردگی کی تعریف کرتے ہوئے کہا کہ  اس گیندباز نے بین الاقوامی کرکٹ میں ایک مکمل گیندبازبننے کی سمت  بڑی  ترقی کی ہے۔
جی ایف ایس ڈیولپمنٹس کے لندن دفتر کے حالیہ دورے کے دوران معین علی نے کہاکہ ’’محمد سراج نے انگلینڈ کے خلاف سیریز میں شاندار کارکردگی کا مظاہرہ کیا۔ گیند کے ساتھ ان کی توانائی، جارحیت اور تسلسل عالمی معیار کا ہے۔ وہ ہندوستان کے لیے ایک سچے میچ ونر بن چکے ہیں اور بلے بازوں کے لیے ان کا سامنا کرنا ہمیشہ ایک چیلنج ہوتا ہے۔‘‘

یہ بھی پڑھیئے:درجہ بندی:سراج کو انگلینڈ میں شاندار کارکردگی کا فائدہ

  انگلش کرکٹر نے کہاکہ ’’مجھے سب سے زیادہ ان کی گیند پر قابو پانے کی صلاحیت متاثر کرتی ہے۔ ان کا دل بڑا ہے اور وہ کبھی پیچھے نہیں ہٹتے — یہی بات انہیں خاص بناتی ہے۔ ان کے اثر کا پورا کریڈٹ انہیں جاتا ہے۔‘‘   محمد سراج نے انگلینڈ کے خلاف پانچوں ٹیسٹ میچ کھیلے اور کوئی میچ نہیں چھوڑا۔ انہوں نے ۵؍ میچوں میں۲۳؍ وکٹ لے کر سیریز کے سب سے زیادہ وکٹ لینے والے  گیندباز کے طور پر اختتام کیا۔
معین علی نے بین الاقوامی کرکٹ سے ریٹائرمنٹ لے لیا ہے اور دبئی میں اپنی کرکٹ صلاحیتوں کو آگے بڑھا رہے ہیں، جہاں وہ اب رہتے ہیں اور اس شہر کو دنیا کی محفوظ ترین جگہوں میں سے ایک سمجھتے ہیں۔ معین علی نے حالیہ ختم ہونے والے ’ورلڈ چمپئن  آف لیجنڈز‘ میں انگلینڈ  چمپئن  کی طرف سے کھیلا تھا اور  اگلے  ٹی۲۰؍ ٹورنامنٹ میں بھی اپنی بہترین کارکردگی جاری رکھنا چاہیں گے۔