جین زی کی بھی حمایت، رسد وخوراک کے ذخیرہ کے ساتھ پولیس کی رکاوٹیں توڑ کر شہر میں  داخل ہوئے، مطالبات کی منظوری تک ڈٹے رہنے کا اعلان۔

اناج کی بوریاں، لپٹا ہوا بستر، کھانا پکانے کے برتن اور کم از کم  ایک ہفتے کا راشن ساتھ لے کر تقریباً ۲؍ہزار کسان منگل کو  بھوپال  میں داخل ہو گئے۔ انہوں نے شہر کے جنوبی حصے میں پولیس کی رکاوٹیں عبور کرتے ہوئے اپنی پیش قدمی جاری رکھی، جس کے بعد فصل کی خریداری سے متعلق تنازع اس سال وزیر اعلیٰ موہن یادو کی حکومت کیلئے ایک بڑے سیاسی چیلنج میں تبدیل ہو گیا۔

سمیوکت کسان مورچہ (ایس کے ایم) کے بینر تلے۱۹؍کسان تنظیموں کی نمائندگی کرنے والے کسانوں نے اعلان کیا ہے کہ وہ اس وقت تک واپس نہیں جائیں گے جب تک حکومت ریاست کی مونگ کی۱۰۰؍ فیصد فصل کم از کم امدادی قیمت (ایم ایس پی) پر خریدنے اور کھاد کی تقسیم سے متعلق دیرینہ مسائل حل کرنے پر آمادہ نہیں ہو جاتی۔منگل کی رات کسانوں کا قافلہ بھوپال کے مضافاتی علاقوں تک پہنچ گیا جہاں پولیس کی بھاری نفری تعینات تھی اور انہیں روکنے کیلئے متعدد مقامات پر بیریکیڈ لگائے گئے تھے۔ اہم بات یہ ہے کہ جین زی نے بھی کسانوں کا ساتھ دیا اور وہ بیرکیڈ توڑتے ہوئے  شہر میں داخل ہوگئے۔ 

یہ بھی پڑھئے: ’’امیت شاہ یاتوقصوروار ہیں یا پھر نااہل ، استعفیٰ دیں‘‘