فیفا کے صدر جیانی انفنتینو کا کہنا ہے کہ غزہ میں جنگ بندی کے بعد فٹ بال کی تمام سہولتیں دوبارہ فراہم کی جائیں گی۔ جیانی انفنتینو  نے یہ اعلان غزہ میں امن کیلئے مصر میں منعقد ہونے والے بین الاقوامی سربراہی اجلاس میں شرکت کے دوران کیا۔امریکی صدر ٹرمپ اور مصری صدر عبدالفتاح السیسی کی مشترکہ صدارت میں ہونے والے اس اجلاس کا مقصد غزہ میں ۲؍ سال سے جاری جنگ کو روکنا اور غزہ میں طویل مدتی استحکام اور تعمیر نو کی بنیاد رکھنا تھا۔ اس اجلاس میں عرب دنیا اور یورپ سمیت دنیا بھر کے لیڈروں کے علاوہ اقوام متحدہ کے سربراہ انتونیو غوطریس سمیت دیگر نے شرکت کی۔ 

جیانی انفنتینو کی اس اجلاس میں شرکت اجلاس کے سب سے قابل ذکر پہلوؤں میں سے ایک کے طور پر سامنے آئی ہے۔ اُنہوں نے اجلاس میں کہا کہ ہم غزہ میں یقیناً فٹ بال کی تمام سہولتوں کی تعمیر نو میں مدد کریں گے۔ فیفا کے صدر نے کہا ’’ ہم فلسطینی فٹ بال ایسوسی ایشن کے ساتھ مل کر ملک کے کونے کونے میں فٹ بال کو بحال کرنے میں مدد کریں گے۔ فیفا غزہ میں فٹ بال کو دوبارہ لائے گا، پچیں بنائے گا، انسٹرکٹرز لائے گا اور مقابلوں کے انعقاد میں مدد کرے گا۔ ‘‘جیانی انفنتینو نے کہا کہ ہم فلسطین میں فٹ بال کے بنیادی ڈھانچے کی تعمیر نو میں مددکیلئے ایک فنڈ شروع کریں گے۔ اُنہوں نے یہ بھی کہا کہ ہم چاہتے ہیں کہ غزہ میں فٹ بال کو  دوبارہ زندہ کرنے کیلئے پوری دنیا اپنا حصہ ڈالے کیونکہ فٹ بال بچوں کے لیے امید لاتا ہے، یہ بہت اہم ہے۔ واضح رہے کہ فیفا پر اسرائیل کی فٹبال سرگرمیوں پر پابندی عائد کرنے کیلئے بھی دباؤ ڈالا جا رہا ہے۔