اس مشہور مقام کو اگلے سال میکسیکو، ریاستہائے متحدہ اور کنیڈاکی میزبانی میں ۴۸؍ ٹیموں کے مقابلے سے قبل تزئین و آرائش کے لیے گزشتہ مئی میں بند کر دیا گیا تھا

ورلڈ کپ ۲۰۲۶ءکے لئے ایزٹیکا اسٹیڈیم کی نئی خصوصیات میں ایک ہائبرڈ فیلڈ، اپڈیٹ شدہ لاکر روم، ایلیویٹرس اور مہمان نوازی کے مراکزشامل ہیں۔ اولمانی، کھیلوں کی تفریحی کمپنی جو اسٹیڈیم کی مالک ہے، نے بھی تصدیق کی ہے کہ ایزٹیکا ورلڈ کپ شروع ہونے سے۷۵؍ دن پہلے۲۶؍ مارچ کو دوبارہ کھل جائے گا، جیسا کہ میکسیکو سٹی کی میئر کلارا بروگاڈا نے حال ہی میں اعلان کیا ہے۔ اسٹیڈیم کے ڈائریکٹر فیلکس ایگوئیر نے ایک بیان میں کہا کہ’’اسٹیڈیم کی تزئین و آرائش کا بنیادی مقصد وہ لوگ ہیں جو اسے دیکھنے آتے ہیں۔ ہمارا بنیادی مقصد ہر طرح سے ان کے تجربے کو بہتر بنانا ہے۔‘‘ مشہور مقام کو اگلے سال میکسیکو، ریاستہائے متحدہ اور کنیڈا کی میزبانی میں۴۸؍ ٹیموں کے مقابلے سے قبل تزئین و آرائش کے لیے گزشتہ مئی میں بند کر دیا گیا تھا۔
۸۳؍ہزارنشستوں پر مشتمل ایزٹیکا، جس کا حال ہی میں نام تبدیل کیا گیا ہے، ٹورنامنٹ کے افتتاحی میچ سمیت ۵؍ میچوں کی میزبانی کرے گا۔ اس نے ۱۹۷۰ء اور۱۹۸۶ء کے ورلڈ کپ کے افتتاحی میچوں کی میزبانی بھی کی تھی۔ میکسیکو کے سب سے بڑے ٹیلی ویژن نیٹ ورک گروپو ٹیلیویسا سے وابستہ اولمانی نے بھی کہا کہ اسٹیڈیم کی گنجائش زیادہ ہوگی لیکن انہوں نے یہ نہیں بتایا کہ اس میں کتنی اضافی نشستیں ہوں گی۔ یہ دوسرا موقع ہوگا جب ایزٹیکا میں ہائبرڈ پچ ہو گی ، ایک۲۰۱۸ء میں نصب کی گئی تھی لیکن ایک سال بعد قدرتی گھاس واپس آگئی۔ نومبر۲۰۱۸ء میں، کنساس سٹی چیفس اور لاس اینجلس ریمز کے درمیان این ایف ایل گیم کے لئے  آخری لمحات میں مقام کو تبدیل کرنا پڑا کیونکہ زمینی حالات خراب تھے۔ اولمانی نے ایک بیان میں کہا کہ ’’زیادہ استعمال کی وجہ سے، پچ کو نئے وینٹیلیشن اور سکشن سسٹم سے لگایا جائے گا، جو بہتر بحالی، استحکام اور مزاحمت کی اجازت دے گا۔
نئے لاکر روم اسٹیڈیم کے وسط میں لگژری بکسوں کے نیچے واقع ہوں گے اور ان میں سرنگیں ہوں گی جو پچ کی طرف جاتی ہیں۔ پہلے یہ لاکر روم اسٹیڈیم کے شمالی اور جنوبی حصوں میں تھے۔ کمپنی نے کہا کہ اس پروجیکٹ میں نئی ​​سہولیات شامل ہیں، جو دنیا کے جدید ترین اسٹیڈیمزکے مطابق کھلاڑیوں، شائقین اور میڈیا کے تجربے کو بہتر بنائے گی۔ اس منصوبے میں اسٹیڈیم کے اندر اور باہر بڑی ایل ای ڈی اسکرین نصب کرنا شامل ہے۔ تزئین و آرائش سے پہلے اسٹیڈیم میں صرف دو بڑی اسکرین تھیں جو۲۰۱۵ء میں لگائی گئی تھیں۔ اولمانی نے ایلیویٹرز یا ایسکلیٹرز کے بارے میں کوئی خاص تفصیلات نہیں بتائیں۔ پہلے، نچلے اور اوپری حصوں کے درمیان جانے کا واحد راستہ پرانا ریمپ استعمال کرنا تھا۔
مہمان نوازی کا مرکز بھی ایک ضرورت تھا۔ پرانے اسٹیڈیم میں پنڈال کے باہر ایک چھوٹا ساکھلا علاقہ تھا، لیکن اندر کوئی فوڈ کورٹ نہیں تھا اور شائقین بیٹھنے کی جگہوں پر گھومنے والے دکانداروں سے کھانا خریدنے پر مجبور تھے۔ دیگر تزئین و آرائش کے کاموں کے علاوہ اسٹیڈیم کے مالک نے ایک نئے پریس باکس ایریا، بہتر بیت الخلاء،۲۰۰؍ یونٹ کے سی سی ٹی وی نگرانی کے نظام اور ایک نئے ساؤنڈ سسٹم کا بھی اعلان کیا۔ اولمانی نے کہا کہ ’’اسٹیڈیم کی خوبصورتی کو برقرار رکھنے‘‘ کے لیے اسٹیڈیم کے اگلے حصے اور چھت کی تزئین و آرائش کی جائے گی۔ اس سال کے شروع میں پچ اور نچلی نشستوں پر کیے گئے کام کی تصاویر جاری کی گئی تھیں۔ لگژری بکسوں کو ایسے ہی چھوڑ دیا گیا، ممکنہ طور پر اس لئے کہ کچھ مالکان نے انہیں فیفا کے حوالے کرنے سے انکار کر دیا۔