آئیوری کوسٹ (کوٹ ڈی آئیوری) کے مایہ ناز فارورڈ نکولس پیپے نے فیفا ورلڈ کپ ۲۰۲۶ء کے ایک اہم میچ میں کیوراساؤ کے خلاف دو شاندار گول کر کے اپنی ٹیم کو۰۔۲؍گول سے فتح دلائی۔

آئیوری کوسٹ (کوٹ ڈی آئیوری) کے مایہ ناز فارورڈ نکولس پیپے نے جمعرات کے روز کھیلے گئے فیفا ورلڈ کپ ۲۰۲۶ء کے ایک اہم میچ میں کیوراساؤ کے خلاف دو شاندار گول کر کے اپنی ٹیم کو۰۔۲؍گول  سے فتح دلائی۔ اس تاریخی جیت کے ساتھ ہی دی ایلیفینٹس  (آئیوری کوسٹ کی ٹیم) نے پہلی بار فیفا ورلڈ کپ کے ناک آؤٹ مرحلے (راؤنڈ آف ۳۲) کے لیے کوالیفائی کر لیا ہے۔ پیپے نے اس کامیابی کا سہرا ٹیم کی یکجہتی اور بہترین ٹیم ورک کو دیا ہے۔

C’EST TERMINÉ ! 🇨🇮🐘 VICTOIRE ✅😁
Curaçao 🇨🇼 0-2 Côte d’Ivoire 🇨🇮
Cette victoire est synonyme de qualification pour le prochain tour de la Coupe du monde, une première dans l’histoire de la Côte d’Ivoire. 🇨🇮🏆

Venez dire merci aux joueurs dans les commentaires!

®️©️SAE #civ pic.twitter.com/Eonsdm7Fa0

— SOUTIENAUXELEPHANTS🇨🇮 (@saedeciv) June 25, 2026

نکولس پیپے نے میچ کے ۷؍ ویں اور۶۴؍ ویں منٹ میں گول اسکور کیے۔ اس فتح کی بدولت آئیوری کوسٹ نے گروپ ای میں جرمنی کے بعد دوسرے نمبر پر رہتے ہوئے اگلے مرحلے میں جگہ پکی کی ہے۔ اس سے قبل ۲۰۰۶ء، ۲۰۱۰ء اور۲۰۱۴ء کے ورلڈ کپ مقابلوں میں آئیوری کوسٹ کی ٹیم گروپ مرحلے سے آگے بڑھنے میں ناکام رہی تھی۔

یہ بھی پڑھئے:۷۱؍فیصد ہندوستانی شہریوں کی فٹبال ورلڈ کپ وزیٹر ویزا درخواست مسترد

میچ کے بعد پیپے نے خوشی کا اظہار کرتے ہوئے کہاکہ ’’یہ ہماری تاریخ میں پہلی بار ہے کہ ہم ناک آؤٹ مرحلے میں پہنچے ہیں۔ لیکن یہ کامیابی کسی ایک کی نہیں بلکہ تمام کھلاڑیوں، کوچنگ اسٹاف اور ٹیم سے جڑے ہر شخص کی محنت کا نتیجہ ہے۔‘‘ ہیڈ کوچ ایمرس فائے نے اسے آئیورین فٹ بال کے لیے ایک تاریخی لمحہ قرار دیا اور وطن واپس مداحوں سے اپیل کی کہ وہ ٹیم کی اسی طرح حمایت جاری رکھیں۔ کوچ نے کہا کہ اگرچہ کھیل میں اب بھی سدھار کی گنجائش ہے، لیکن بغیر کوئی گول کھائے ۰۔۲؍گول  سے جیتنا ناک آؤٹ مرحلے سے پہلے ٹیم کے اعتماد کے لیے بہت اہم ہے۔

یہ بھی پڑھئے:رتیک روشن نے رجنی کانت کے ساتھ ’’جیلر ۲‘‘ کی شوٹنگ مکمل کی

۳۱؍ سالہ پیپے نے اس فتح کو انفرادی کامیابی ماننے سے انکار کرتے ہوئے کہا کہ ان کے ساتھی کھلاڑیوں نے ان کے لیے مواقع پیدا کیے، جس کی وجہ سے وہ گول کرنے میں کامیاب رہے۔ کوچ ایمرس فائے نے بھی ٹیم کے اتحاد کی تعریف کی اور کہا کہ یہ ایک نوجوان ٹیم ہے جس میں زیادہ تر کھلاڑیوں کا یہ پہلا ورلڈ کپ ہے۔ انہوں نے گزشتہ سال افریقہ کپ آف نیشنز سے باہر رہنے کے بعد ٹیم میں شاندار واپسی کرنے پر پیپے کی کارکردگی کو بھی سراہا۔ راؤنڈ آف ۳۲؍میں آئیوری کوسٹ کا مقابلہ فرانس یا ناروے میں سے کسی ایک ٹیم سے ہوگا، تاہم پیپے اور کوچ دونوں کا کہنا ہے کہ اگر آپ کو آگے بڑھنا ہے تو آپ کو کسی بھی حریف کا سامنا کرنے کے لیے تیار رہنا ہوگا۔