دنیا کے معتبر ترین ٹینس ٹورنامنٹس میں سے ایک، آسٹریلین اوپن کا ۱۱۴؍ واں اور اوپن  ایرا کا ۵۸؍ واں ایڈیشن۱۸؍ جنوری سے آسٹریلیا کے ساحلی شہر ملبورن میں سجنے کیلئے تیار ہے۔ انٹرنیشنل ٹینس فیڈریشن  کے زیرِ اہتمام ہونے والے اس میگا ایونٹ کی تیاریاں اپنے آخری مرحلے میں داخل ہو چکی ہیں اور ملبورن پارک کے نیلے ہارڈ کورٹس دنیا کے بہترین کھلاڑیوں کی میزبانی کے لیے تیار ہیں۔

یہ ٹورنامنٹ۱۸؍ جنوری سے شروع ہو گا اور یکم فروری تک جاری رہے گا۔ میگا ایونٹ میں مینس اور ویمنس سنگلز، ڈبلز، مکسڈ ڈبلز کے ساتھ ساتھ جونیئر اور وہیل چیئر کھلاڑیوں کے درمیان بھی سخت مقابلے ہوں گے ۔ یہ  سال۲۰۲۶ء  کا پہلا گرینڈ سلیم ٹورنامنٹ ہے۔اس مرتبہ تمام نظریں دفاعی چمپئن کھلاڑیوں پر ہوں گی جو اپنے اعزاز کو بچانے کیلئے میدان میں اتریں گے ۔  اٹلی کے عالمی نمبر ایک کھلاڑی یانک سنر مردوں کے سنگلز مقابلوں میں اپنے ٹائٹل کا دفاع کریں گے ۔ وہ مسلسل تیسری مرتبہ یہ ٹرافی جیتنے کے لیے پرامید ہیں۔خواتین کے زمرے میں امریکی اسٹار میڈیسن کیز اپنے اعزاز کا دفاع کرنے کے لیے تیار ہیں۔۳۸؍ سالہ سربین لیجنڈ نوواک  جوکووچ کے پاس۱۱؍ ویں  مرتبہ آسٹریلین اوپن جیتنے کا نادر موقع ہے۔۲۴؍ گرینڈ سلیم  خطابات کے مالک جوکووچ اس کورٹ پر سب سے کامیاب کھلاڑی مانے جاتے ہیں اور وہ ایک نیا عالمی ریکارڈ قائم کرنے کیلئے پُرعزم ہیں۔انتظامیہ کے مطابق، اس سال شائقین کے لیے سہولیات میں اضافہ کیا گیا ہے اور میڈیسن کیز، جوکووچ اور الکاراز جیسے بڑے ناموں کی موجودگی نے ٹکٹوں کی طلب میں غیر معمولی اضافہ کر دیا ہے۔تین بار آسٹریلین اوپن کے رنر اپ ڈینیل میدویدیف سال کے پہلے گرینڈ سلیم میں ایک انڈر ڈاگ ہوں گے، لیکن روسی کھلاڑی نے خبردار کیا ہے کہ موجودہ فارم میں انہیں ہرانا مشکل ہوگا۔ واضح رہےکہ میدویدیف  برسبین انٹرنیشنل جیتنے کے بعد آسٹریلین اوپن میں شرکت کررہے ہیں ۔ یہ ان کیلئے۳؍ ماہ میں دوسری ٹورنامنٹ کی فتح تھی، جبکہ دو سال میں ان کا پہلا ٹائٹل اکتوبر میں قزاقستان میں آیا تھا۔انہوں نے کہا’ ’میں نے سیزن کے آخر میں واقعی بہت اچھا کھیل کھیلا ہے۔ مجھے لگتا ہے کہ میں نے پچھلے ۷؍ ٹورنامنٹس میں سے ۶؍ میں کوارٹرز میں جگہ بنائی،  دو ٹائٹل بھی جیتے۔‘‘