کسان کی بیٹی پوجا سنگھ ایشین ایتھلیٹکس چمپئن شپ میں ہائی جمپ مقابلے میں چمپئن بننے والی دوسری ہندوستانی خاتون کھلاڑی ہیں۔

پوجا سنگھ ایشین ایتھلیٹکس چمپئن شپ میں ہائی جمپ میں  چمپئن بننے والی دوسری ہندوستانی خاتون کھلاڑی ہیں۔ کیا آپ جانتے ہیں کہ کسان کی یہ بیٹی کافی جدوجہد کے بعد اس مقام تک پہنچی ہے۔ ۱۸؍ سالہ پوجا سنگھ نے جمعہ کو ایشین ایتھلیٹکس چمپئن  شپ میں ہندوستان کا۲۵؍ سال کا انتظار ختم کیا۔
  پوجا نے خواتین کے ہائی جمپ مقابلے میں ۱ء۸۹؍ میٹر کی چھلانگ لگا کر طلائی تمغہ جیتا۔ وہ ایشین چمپئن شپ کے اس ایونٹ  میں چمپئن  بننے والی دوسری ہندوستانی خاتون کھلاڑی بن گئی ہیں۔ ان سے پہلے، بوبی الائیسس نے ۲۰۰۰ء میں یہ خطاب جیتا تھا۔ تاہم، پوجا کیلئے یہاں تک پہنچنے کا راستہ آسان نہیں تھا۔ ایک کسان خاندان کی بیٹی پوجا شروع میں بھوسے کی بوریوں سے میٹ بنا کر اونچی چھلانگ کی مشق کرتی تھیں۔ جمناسٹک چھوڑ کر ایتھلیٹکس کا انتخاب کیا۔
 طلائی تمغہ جیتنے کے بعد پوجا سنگھ نے بتایا کہ میں نے اپنے اسپورٹس کریئر کا آغاز۲۰۱۷ء میں کیا تھا لیکن۲۰۱۹ء تک میں یوگا اور جمناسٹک کرتی تھی۔۲۰۱۹ء میں میں نے کھیل کو تبدیل کیا اور ایتھلیٹکس کا انتخاب کیا۔ میں نے اپنے فارم پر بھوسے سے بھری بوریوں پر مشق شروع کی اور انڈر۱۶؍ کا قومی ریکارڈ توڑنے میں کامیاب رہا۔ دو تین سال کے بعد مجھے ایک پرانی میٹ  ملی اور میں نے۱ء۷۶؍ میٹر تک چھلانگ لگا دی۔ پوجا نے اس سے قبل۲۰۲۳ء میں ایشین انڈر۲۳؍  چمپئن  شپ میں کانسہ کا تمغہ جیتا تھا۔