ہندوستانی فاسٹ بولر محمد سمیع آسٹریلیا کے خلاف ون ڈے اور ٹی ۲۰؍ سیریز سے باہر ہو گئے ہیں۔ سمیع آخری بار ۲۰۲۵ء کی چمپئن ٹرافی میں ہندوستان کے لیے کھیلے تھے جس کے بعد وہ فٹنیس مسائل کی وجہ سے بین الاقوامی کرکٹ سے باہر ہو گئے تھے۔ سمیع نے حال ہی میں اپنی فٹنیس کے حوالے سے خاموشی توڑ دی۔

ہندوستان کے تیز گیند باز محمد سمیع کو آسٹریلیا کے خلاف ون ڈے اور ٹی ۲۰؍ سیریز میں شامل نہیں کیا گیا ہے۔ اجیت اگرکر کی سربراہی میں سلیکشن کمیٹی نے انہیں ویسٹ انڈیز کے خلاف ٹیسٹ سیریز اور آسٹریلیا کے خلاف ون ڈے اور ٹی۲۰؍ ٹیم میں جگہ نہیں دی تھی۔ حال ہی میں سمیع نے آسٹریلیا کے خلاف منتخب نہ ہونے پر اپنا ردعمل دیا ہے۔ سمیع نے کہا کہ وہ سلیکٹرس کے فیصلے کا احترام کرتے ہیں لیکن میدان میں واپسی کے لیے ہمیشہ تیار ہیں۔
 سمیع  طویل عرصے سے انٹرنیشنل کرکٹ سے دور ہیں۔ وہ آخری بار چمپئن  ٹرافی۲۰۲۵ء میں ہندوستان کے لیے کھیلے تھے۔ تب سے، فٹنیس کے مسائل نے انہیں قومی ٹیم میں واپسی سے روک دیا۔

یہ بھی پڑھیئے:بیتھ مونی کی سنچری ،آسٹریلیا نے پاکستان کو شرمناک شکست دی

سمیع نے خاموشی توڑی  
سمیع نے اپنے یوٹیوب چینل پر کہا کہ ’’ٹیم میں میرے غیر منتخب ہونے کے بارے میں بہت سی افواہیں اور میمز گردش کر رہے ہیں، ٹیم میں منتخب ہونا میرے ہاتھ میں نہیں ہے، یہ مکمل طور پر سلیکشن کمیٹی، کوچ اور کپتان کا فیصلہ ہے، اگر انہیں لگتا ہے کہ مجھے ٹیم میں ہونا چاہیے تو میں تیار ہوں  اور اگر انہیں لگتا ہے کہ مجھے کچھ اور وقت درکار ہے تو میں اس فیصلے کا احترام کروں گا، جب بھی موقع ملے گا تو میں اس فیصلے کا احترام کروں گا۔ 
سمیع نے کیا کہا
سمیع  نے کہا کہ ان کی فٹنیس کے بارے میں کئی سوالات اٹھائے گئے ہیں۔ انہوں نے یہ بھی کہا کہ سلیکٹرس نے انہیں ٹیم میں شامل نہیں کیا کیونکہ انہوں نے حال ہی میں زیادہ ڈومیسٹک کرکٹ نہیں کھیلا تھا۔ چیف سلیکٹر اجیت اگرکر نے بھی یہی وجہ بتاتے ہوئے کہا کہ انتخاب میں گھریلو کارکردگی کو ترجیح دی گئی۔ اپنی فٹنیس کے حوالے سے سمیع کا کہنا تھا کہ وہ خود کو مکمل طور پر فٹ محسوس کر رہے ہیں اور پہلے کی طرح اسی رفتار سے بولنگ کر رہے ہیں۔
 میں مکمل طور پر فٹ ہوں 
 سمیع نے مزید کہا کہ میری فٹنیس بالکل ٹھیک ہے اور میں مسلسل بہتری کی کوشش کر رہا ہوں۔ جب آپ کچھ وقت کے لیے میدان سے دور ہوتے ہیں تو خود کو متحرک رکھنا بہت ضروری ہوتا ہے۔ میں نے حال ہی میں دلیپ ٹرافی کھیلی تھی، جہاں میں بہت آرام دہ محسوس کر رہا تھا۔ میں اچھے فارم  میں تھا اور ۳۵؍اوورس کے قریب بولنگ کر رہا تھا۔ مجھے فٹنیس کے مسائل کا سامنا نہیں ہے۔  بنگال کی آنے والی رنجی ٹرافی مہم محمد سمیع کی ریڈ بال کرکٹ میں واپسی کی نشاندہی کرتی ہے۔ سمیع ایشان پورل اور آکاش دیپ کے ساتھ ٹورنامنٹ میں اہم بولر کے طور پر ٹیم کے حملے کی قیادت کریں گے۔