ہندوستان کی پہلی پروفیشنل پرو اسٹیج ایلیٹ مینس سائیکلنگ ریس (یو سی آئی۲ء۲) - ایک بین الاقوامی سائیکلنگ ایونٹ کے آفیشل لوگو اور ماسکوٹ کی بدھ کو شہریوں کی موجودگی میں نقاب کشائی کی گئی۔ اس کے ساتھ ہی ہندوستان میں پہلے عالمی سطح  کے سائیکلنگ مقابلے ’پونے گرینڈ ٹور۲۰۲۶ء‘ کا بھی اعلان کیا گیا۔ گرینڈ ٹور کو۲۰۲۸ء کے سمر اولمپکس کیلئے کوالیفائنگ ریس کے طور پر بھی تسلیم کیا گیا ہے ۔ بین الاقوامی سائیکل سواروں کو۱۹؍  اور۲۳؍جنوری ۲۰۲۶ء کے درمیان طے شدہ ۵؍ روزہ کثیر مرحلہ ریس میں حصہ لے کر ریس پوائنٹس حاصل کرنے کا موقع ملے گا۔ 

اس موقع پر مہاراشٹر کے وزیر اعلیٰ دیویندر فرنویس، نائب وزیر اعلیٰ  اجیت پوار، سائیکلنگ فیڈریشن آف انڈیا (سی ایف آئی)، کھیل اور نوجوانوں کی بہبود کے محکمے اور پونے ضلعی انتظامیہ کے نمائندے اس موقع پر موجود تھے۔

یو سی آئی کے سالانہ کیلنڈر میں ایک ایلیٹ ایونٹ کے طور پر درجہ بند کیا گیا پونے گرینڈ ٹور ہندوستان کے لیے ایک تاریخی لمحہ ہے  جو کہ عالمی سائیکلنگ اسٹیج پر ملک کی پہلی نمائش ہے۔ مقابلہ۴۳۷؍ کلومیٹر کے راستے پر محیط ہے جو پونے ضلع میں شہری علاقوں، پہاڑی علاقوں اور دیہی سڑکوں کا منفرد امتزاج پیش کرتا ہے۔ 

وزیر اعلیٰ دیویندر فرنویس نے اس موقع پر کہا’’یہ ہمارے لیے فخر کی بات ہے کہ ہندوستان کی پہلی یو سی آئی ۲ء۲؍بین الاقوامی سائیکلنگ ریس پونے میں منعقد کی جائے گی۔ یہ صرف ایک کھیل کا ایونٹ نہیں ہے، بلکہ مہاراشٹر کے کھیل کے وژن کی علامت ہے۔ ہمارا مقصد کھیلوں کے لیے ضروری بنیادی ڈھانچہ بنانا اور سائیکلنگ جیسے کھیلوں میں نئی توانائی ڈالنا ہے اور اس سے ہندوستان کے نوجوان سائیکل سواروں کی حوصلہ افزائی کریں گے۔

پونے کے ڈسٹرکٹ مجسٹریٹ اور پونے گرینڈ ٹور کے انچارج جتیندر دویدی نے کہا ’’پونے گرینڈ ٹور کے ذریعے،  ہندوستان  عالمی سائیکلنگ مرحلے پر ایک جرأت مندانہ قدم اٹھا رہا ہے۔ ہمارا مقصد ہندوستانی نوجوانوں کو پیشہ ورانہ سائیکلنگ کی طرف راغب کرنا اور اس کھیل کو ملک میں نئی بلندیوں تک لے جانا ہے۔