اس معاہدہ کے تحت کمرشیل گاڑیاں بنانے والی مشہور کمپنی اشوک لے لینڈ کا لوگو ٹیم کی جرسی پر نظر آئے گا۔

ہندوجا گروپ کی کمرشل گاڑیاں بنانے والی مشہور کمپنی اشوک لے لینڈنے پانچ بار کی آئی پی ایل چمپئن چنئی سپر کنگز کے ساتھ بطور آفیشل اسپانسر اسٹریٹجک شراکت داری کا اعلان کیا ہے۔ اس اشتراک کے تحت، آئندہ سیزن کے لیے سی ایس کے کی روایتی زرد جرسی کے سامنے دائیں جانب اشوک لے لینڈکا لوگو نمایاں طور پر نظر آئے گا۔ یہ شراکت داری سی ایس کے اور ہندوجا گروپ کے درمیان دیرینہ تعلقات کا تسلسل ہے، جو گروپ کی ایک اور کمپنی گلف آئل کے ساتھ ۱۵؍ سال سے زائد عرصے سے جاری کامیاب تعاون پر مبنی ہے۔ 

یہ بھی پڑھئے: ایران کی خواتین فٹ بال ٹیم کو وطن واپسی پر خطرہ: آسٹریلیائی حکومت سے اپیل

اس شراکت داری کا باضابطہ اعلان یہاں ایک پریس کانفرنس میں اشوک لے لینڈ کے چیئرمین دھیرج ہندوجا اور ایم ڈی شینو اگروال نے سی ایس کے کے کپتان رتوراج گائیکواڈ اور ہندوستان کی انڈر ۱۹؍ ورلڈ کپ جیتنے والی ٹیم کے کپتان آیوش مہاترے کی موجودگی میں کیا۔ 
اس موقع پر سی ایس کے کی نئی آفیشل جرسی کی نقاب کشائی بھی کی گئی، جو چنئی کی بہترین کارکردگی اور وراثت سے جڑے دو بڑے اداروں کے اتحاد کی علامت ہےکمپنی نے مداحوں کیلئے خاص طور پر ڈیزائن کی گئی ایک فین بس بھی متعارف کرائی۔