اسرائیلی وزارتِ خزانہ کے ابتدائی جائزے کے مطابق بن گوریون ہوائی اڈے پر مزدوروں کی ہڑتال سے ۲؍ کروڑ ۵۰؍ لاکھ سے ۳؍ کروڑ شیکل، یعنی تقریباً ۸۳؍ لاکھ سے ایک کروڑ امریکی ڈالر، کا معاشی نقصان ہوا۔ ہڑتال کے دوران تمام چیک اِن کاؤنٹرز بند ہونے سے ہوائی اڈے کی سرگرمیاں تقریباً ایک گھنٹے تک متاثر رہیں، متعدد پروازوں کو راستے سے واپس لوٹنا پڑا، جبکہ ایئرلائنز، کارگو، سپلائی چین، سیاحت اور ہوٹلنگ کے شعبے بھی متاثر ہوئے۔

اسرائیلی میڈیا نے جمعرات کو یہ اطلاع دی ہے کہ اسرائیلی وزارتِ خزانہ نے اندازہ لگایا ہے کہ بن گوریون ہوائی اڈے پر ہونے والی مزدوروں کی ہڑتال سے ۲؍ کروڑ ۵۰؍ لاکھ سے ۳؍ کروڑ شیکل (تقریباً ۸۳؍ لاکھ سے ایک کروڑ امریکی ڈالر) کا معاشی نقصان ہوا ہے۔ اسرائیلی اخبار وائی نیٹ (Ynet) نے وزارتِ خزانہ کے ابتدائی جائزے کا حوالہ دیتے ہوئے بتایا کہ اس نقصان میں مسافروں کے ضائع ہونے والے وقت، ایئرلائنز کے براہِ راست اور آپریشنل اخراجات، اسرائیل ایئرپورٹس اتھارٹی اور ہوائی اڈے کے آپریٹرز کی آمدنی میں کمی، کارگو اور لاجسٹکس میں خلل، سپلائی چین کو پہنچنے والا نقصان اور سیاحت و مہمان نوازی کے شعبے کو ہونے والے نقصانات شامل ہیں۔

CHAOS at Israel’s Ben Gurion Airport as workers go on STRIKE

They literally have a CLOWN SHOW

The cause is apparently anger with the U.S. Air Force refuelers at the airport for the War on Iran pic.twitter.com/ckdqfQ6bM8

— Ryan Rozbiani (@RyanRozbiani) August 20, 2026

بن گوریون ہوائی اڈے پر پروازوں کی کارروائیاں بعد میں دوبارہ شروع ہو گئی تھیں۔ اس سے قبل مزدوروں کے تنازع کے باعث تمام چیک اِن کاؤنٹرز بند ہونے کی وجہ سے ہوائی اڈے کی سرگرمیاں تقریباً ایک گھنٹے کے لیے رک گئی تھیں۔ وائی نیٹ کے مطابق وزارتِ خزانہ نے کہا کہ نقصان کی بنیادی وجوہات میں اسرائیل کے ہوا بازی کے بنیادی ڈھانچے کی انتہائی محدود گنجائش، قومی ہوابازی کے بنیادی ڈھانچے کا صرف ایک آپریٹر پر انحصار، اور ورکرز کمیٹی کی جانب سے کارکردگی، لچک اور ہوائی اڈے کی ترقی میں رکاوٹ شامل ہیں۔ چیک اِن کاؤنٹرز بند ہونے اور ہوائی اڈے کی سرگرمیاں محدود کیے جانے کے باعث تل ابیب جانے والی کئی پروازوں کو راستے سے ہی واپس اپنے ممالک کی جانب لوٹنا پڑا۔

یہ بھی پڑھئے: میٹا نے بچوں کی حفاظت پر’’آنکھیں بند رکھنے‘‘ کی پالیسی اپنائی ہے

اطلاعات کے مطابق ہوائی اڈے پر گراؤنڈ سروسز فراہم کرنے والی چار کمپنیوں کے ملازمین نے بھی کام روک دیا تھا۔ یہ خلل سال کے مصروف ترین اوقات میں پیش آیا، جب بن گوریون ہوائی اڈہ روزانہ تقریباً ایک لاکھ مسافروں اور ۶۰۰؍ پروازوں کا انتظام و اہتمام کرتا ہے۔