سنسناٹی اوپن میں اپنی شروعات خراب ہونے کے بعد، رافیل جوڈار نے پیر کی دوپہر کو اپنا بہترین کھیل پھر سے دکھایا۔ ۱۹؍ سالہ اسپینیارڈ نے الیجینڈرو ٹیبیلو کو ۱۔۶، ۲۔۶؍ سے شکست دے کر اور اے ٹی پی ماسٹرز ۱۰۰۰؍ ایونٹ کے چوتھے راؤنڈ میں پہنچنے کے دوران کئی شاندار ونرز لگائے-

سنسناٹی اوپن میں اپنی شروعات خراب ہونے کے بعد، رافیل جوڈار نے پیر کی دوپہر کو اپنا بہترین کھیل پھر سے دکھایا۔ ۱۹؍ سالہ اسپینیارڈ نے الیجینڈرو ٹیبیلو کو ۱۔۶، ۲۔۶؍ سے شکست دے کر اور اے ٹی پی ماسٹرز ۱۰۰۰؍ ایونٹ کے چوتھے راؤنڈ میں پہنچنے کے دوران کئی شاندار ونرز لگائے، جس سے ان کا ۲۰۲۶ء کا شاندار سیزن جاری رہا۔ ۷۵؍ منٹ کی اس جیت کے ساتھ، جوڈار اس دہائی میں سنسناٹی میں راؤنڈ آف ۱۶؍ میں پہنچنے والے کارلوس الکاراز اور بین شیلٹن کے ساتھ شامل ہو گئے۔
اپنے پہلے میچ میں ڈینس شاپووالوو کے خلاف آخری سیٹ میں ۱۔۵؍ سے پچھڑنے کے بعد ایک میچ پوائنٹ بچایا اور مسلسل چھ گیمز جیتے، اس کے بعد جوڈار، ٹیبیلو کے خلاف اپنے بہترین فارم میں لوٹ آئے۔ انہوں نے ۲۶؍ ونرز لگائے اور ٹیبیلو کے خلاف اپنی ہیڈ ٹو ہیڈ سیریز میں ریکارڈ ۱۔۲؍ کر لیا؛ انہوں نے ۱۵؍دن پہلے واشنگٹن میں بھی چلی کے اس کھلاڑی کو ہرایا تھا۔
جوڈار نے کہا’’ڈینس کے خلاف اس میچ نے مجھے بہت اعتماد دیا۔ میں نے خود کو اپنی حدوں تک دھکیلا اور جیتنے کے لیے بہت محنت کی۔ لیکن ہر میچ مشکل ہوتا ہے۔ ایسا نہیں ہے کہ اگر نتیجہ تھوڑا آسان لگ رہا ہے تو میچ بھی آسان تھا۔ یہاں ہر کوئی بہت اچھا کھیلتا ہے، اس لیے ٹیبیلو کو ہرانے کے لیے مجھے آج اپنا بہترین دینا پڑا، اور مجھے تمام میچوں میں اپنا بہترین معیار دکھانا ہوگا۔‘‘

یہ بھی پڑھئے:نکھل اڈوانی کی تاریخی ڈرامہ سیریز ’’دی ریوولوشنریز‘‘ ۱۱؍ ستمبر کوریلیز ہوگی

پچھلے سال اگست کے شروع میں، جوڈار دنیا کے ٹاپ ۵۰۰؍ کھلاڑیوں میں بھی شامل نہیں تھے۔ اب، ۲۰۲۶ء میں ٹور لیول پر۳۶؍جیت کے ساتھ، یہ ہسپانوی کھلاڑی اے ٹی پی رینکنگ میں ۱۱؍ویں نمبر پر ہے اور ٹاپ ۱۰؍ میں جگہ بنانے کے بہت قریب ہے۔ ۶؍ فٹ ۳؍انچ قد والے اس باصلاحیت کھلاڑی نے اے ٹی پی لائیو ریس ٹو ٹیورن  میں بھی ساتواں مقام حاصل کر لیا ہے اور وہ ٹور پر اپنے پہلے ہی سیزن میں باوقار نِٹو ای ٹی پی فائنلز میں جگہ بنانے کی کوشش کر رہے ہیں۔جوڈار کا اگلا مقابلہ دنیا کے نمبر۱۰؍ کھلاڑی فلیویو کوبولی سے ہوگا، جنہوں نے الیگزینڈر بلاککس کو۵۔۷، ۶۔۴، ۵۔۷؍  سے ہرانے کے لیے میچ کے آخر میں زبردست واپسی کی تھی۔ ۲۴؍ سال کے اس اطالوی کھلاڑی نے فائنل سیٹ میں ۳۔۵؍سے پچھڑنے کے بعد مسلسل چار گیمز جیتے اور اپنے کریئر میں چوتھی بار ماسٹرز ۱۰۰۰؍ ایونٹ کے چوتھے راؤنڈ میں جگہ بنائی۔ جوڈار کے ساتھی ہسپانوی کھلاڑی، ۲۰؍ سال کے مارٹن لینڈالوس، آخری ۱۶؍ میں جگہ نہیں بنا سکے۔ لینڈالوس کو نوواک جوکووچ کو ہرانے والے تھیاگو آگسٹن ٹیرنٹے نے۶۔۷، ۶۔۷؍ سے ہرا یا۔
ایلیکس ایلا تین سیٹ کے مقابلے میں امینڈا انیسیمووا سے ہار گئیں
 فلپائن کی ٹینس اسٹار ایلیکس ایلا نے ایک سیٹ کی برتری گنوادی اور پیر کو۲۰۲۶ء سنسناٹی اوپن سے باہر ہوگئیں۔ انہیں امریکہ کی نویں سیڈ امینڈا انیسیمووا نے تین سیٹ میں۶۔۴، ۲۔۶، ۴۔۶؍  سے شکست دی۔ اس شکست کے ساتھ ہی ٹاپ ۱۰؍ رینکنگ والی کھلاڑیوں کے خلاف ایلا کی مسلسل پانچ فتوحات کا سلسلہ بھی ٹوٹ گیا۔

یہ بھی پڑھئے:رشبھ پنت ٹیسٹ کرکٹ میں ۱۰۰؍ چھکے لگانے والے پہلے ہندوستانی کرکٹر بن گئے

میچ کے بعد انیسیمووا نے ایلا کی تعریف کرتے ہوئے کہا کہ وہ ایک بہترین کھلاڑی اور زبردست فائٹر ہیں اور انہیں اندازہ تھا کہ مقابلہ سخت ہوگا۔ انہوں نے کہا کہ انہیں تماشائیوں کی حمایت سے بہت حوصلہ ملا، کیونکہ اس میچ کے لیے انہیں اضافی توانائی درکار تھی۔ ایلا کا سنسناٹی اوپن میں سفر ملا جلا رہا۔ دوسرے راؤنڈ میں ان کی رومانیہ کی حریف ایلینا-گیبریلا روس ٹانگ کی چوٹ کے باعث اس وقت مقابلے سے دستبردار ہوگئیں جب وہ ۱۔۶، ۰۔۳؍ سے پیچھے تھیں۔ سنسناٹی اوپن سے باہر ہونے کے بعد ۲۱؍ سالہ ایلا اب یو ایس اوپن پر توجہ مرکوز کریں گی۔انیسیمووا کا اگلا مقابلہ کوارٹر فائنل میں جگہ بنانے کے لیے جمہوریہ چیک کی لنڈا نوسکووا سے ہوگا۔