اٹلی سے تعلق رکھنے والے مرسڈیز کے۲۰؍سالہ ڈرائیور نے سب سے کم عمر چمپئن بننے کا اعزاز حاصل کیا۔

اٹلی کے کیمی اینٹونیلی میکسیکو گراں پری میں اگرچہ تیسرے نمبر پر رہے، لیکن انہوں نے محض ۲۰؍ سال کی عمر میں فارمولا ون چمپئن شپ جیت کر ایک نئی تاریخ رقم کر دی۔ مرسڈیز کے اس ڈرائیور نے میکسیکو گراں پری کے فاتح میکس ورسٹاپین اور لوئس ہملٹن کے بعد تیسرا نمبر حاصل کیا، لیکن چمپئن شپ اپنے نام کرنے کے لئے یہ کافی تھا۔ ریس ختم کرنے کے بعد وہ خوشی سے جھوم اٹھے۔ اینٹونیلی نے کہا’’ابھی جو کچھ ہوا ہے میں اسے سمجھنے کی کوشش کر رہا ہوں۔ جب آپ اتنی سخت محنت کرتے ہیں اور آخرکار اسے حاصل کر لیتے ہیں، تو یہ واقعی بہت خاص ہوتا ہے۔‘‘

یہ بھی پڑھئے:وراٹ کوہلی ایک اور تاریخی ریکارڈ کے قریب

اینٹونیلی سے پہلے سب سے کم عمر میں چمپئن بننے کا ریکارڈ سبسٹین ویٹیل کے پاس تھا، جنہوں نے ۲۰۱۰ء میں ۲۳؍ سال کی عمر میں یہ کارنامہ انجام دیا تھا۔اینٹونیلی کے ساتھ ان کے والدین اور چھوٹی بہن بھی موجود تھیں۔انہوں نے کہا ’’جذبات کا ایک طوفان امڈ رہا ہے۔ اپنے خاندان کے ساتھ اس لمحے کا گواہ بننا ایسا لمحہ ہے جسے میں ہمیشہ یاد رکھوں گا۔‘‘

چمپئن شپ ٹیبل میں اینٹونیلی کے کُل ۳۸۰؍ پوائنٹس ہو گئے ہیں اور اس طرح انہوں نے ۴؍ ریس باقی رہتے ہوئے ہی چمپئن شپ اپنے نام کر لی ہے۔ٹیبل میں ورسٹاپین ۲۶۱؍ پوائنٹس کے ساتھ دوسرے اور ہملٹن ۲۵۹؍ پوائنٹس کے ساتھ تیسرے نمبر پر ہیں۔ ان دونوں کھلاڑیوں میں سے کوئی ایک اگر باقی چاروں ریسیں جیت بھی لے تو وہ اینٹونیلی سے آگے نہیں نکل سکے گا۔