ملیالم سپر ہیرو فلم ’’لوکاہ چیپٹر وَن: چندرا‘‘ کی زبردست کامیابی کے بعد اس کے سیکوئل کا باضابطہ آغاز ہو گیا ہے۔ اداکارہ کلیانی پریہ درشن نے تصدیق کی ہے کہ وہ مرکزی کردار دوبارہ ادا کریں گی اور شوٹنگ ستمبر ۲۰۲۶ء میں شروع ہونے کی امید ہے۔

۲۰۲۵ء میں ریلیز ہونے والی ملیالم سپر ہیرو فلم ’’لوکاہ چیپٹروَن: چندرا‘‘ نے باکس آفس پر شاندار کامیابی حاصل کی اور اسے ناقدین و شائقین دونوں کی جانب سے بھرپور سراہا گیا۔ فلم اب تک کی سب سے زیادہ کمائی کرنے والی ملیالم فلموں میں شامل ہو چکی ہے۔ فلم کی مرکزی اداکارہ کلیانی پریہ درشن نے حالیہ انٹرویو میں سیکوئل کے بارے میں اہم اپڈیٹ دیتے ہوئے بتایا کہ وہ ’’چندرا‘‘ کا کردار دوبارہ ادا کریں گی۔ ان کے مطابق اس وقت اسکرپٹ پر کام جاری ہے اور شوٹنگ ستمبر ۲۰۲۶ء میں شروع ہونے کی توقع ہے۔ گزشتہ سال فلم سازوں نے ایک پرومو جاری کیا تھا جس میں ٹووینو تھامس اور ذوالقر سلمان کو نمایاں کیا گیا۔ ویڈیو میں ٹووینو اپنے کردار ’’مائیکل‘‘ کے طور پر واپس آتے دکھائی دیے، جبکہ ذوالقر سلمان ’’چارلی‘‘ کے روپ میں نظر آئے۔

یہ بھی پڑھئے: ’’کاک ٹیل ۲‘‘ کی کہانی افشاں ، شاہد نہیں،کریتی اور رشمیکا مرکزی کردار نبھائیں گی

’’مائیکل اینڈ چارلی: لیجنڈز چل‘‘ کے عنوان سے جاری کلپ میں ایک نئے خطرے کی آمد کا اشارہ بھی دیا گیا، جس نے شائقین کے تجسس کو مزید بڑھا دیا۔ فلم کے پہلے حصے کی ہدایت کاری اور تحریر ڈومینک ارون نے کی، جبکہ اسے ذوالقر سلمان نے اپنے بینر ویفریر فلمز کے تحت پروڈیوس کیا۔ خیال رہے کہ کہانی ایک نوجوان خاتون کے گرد گھومتی ہے جو ذاتی مشکلات کے درمیان پراسرار طاقتوں کا انکشاف کرتی ہے۔ جیسے جیسے برائی ابھرتی ہے، اسے اپنی صلاحیتوں اور تقدیر کو قبول کرنا پڑتا ہے۔ فلم میں نسلین، سینڈی ماسٹر، ارون کورین، چندو سلیم کمار اور رگھوناتھ پالیری نے بھی اہم کردار ادا کیے۔

یہ بھی پڑھئے: کینیڈی پر سینسر بورڈ کی قینچی، ڈونالڈ ٹرمپ کو’پمپ ٹرمپ‘، داؤد ابراہیم کو’پاکستان ڈان‘ سے بدلا

تکنیکی ٹیم میں نمیش روی (سنیماٹوگرافی)، چمن چکو (ایڈیٹنگ) اور جیکس بیجوئے (موسیقی) شامل تھے۔ فلم کو تیلگو، ہندی، تمل اور کنڑ زبانوں میں بھی ڈب کر کے ریلیز کیا گیا۔ فلم کو مختلف ریاستوں میں بڑے ڈسٹری بیوشن نیٹ ورکس کے ذریعے ریلیز کیا گیا۔ آندھرا پردیش اور تلنگانہ میں سیتھارا انٹرٹینمنٹ، تامل ناڈو میں اے جی ایس انٹرٹینمنٹ، کرناٹک میں لائٹر بدھا فلمز اور شمالی ہندوستان میں پین اسٹوڈیوز نے اسے تقسیم کیا۔ سپر ہیرو صنف میں ملیالم سنیما کی اس بڑی پیش رفت نے نہ صرف جنوبی ہند بلکہ قومی سطح پر بھی توجہ حاصل کی۔ سیکوئل کی تیاری کی خبر کے بعد سوشل میڈیا پر مداحوں کا جوش عروج پر ہے، اور سب کی نظریں اب ستمبر ۲۰۲۶ء میں شروع ہونے والی شوٹنگ پر مرکوز ہیں۔