ہندوستانی بلے بازوں کی عمدہ کارکردگی کی بدولت ویمنز ورلڈ کپ کے اہم میچ میں ہندوستان نے آسٹریلیا کے خلاف۳۳۱؍رنوں کا بڑا  ہدف دیا۔رن مزید بن  سکتے تھےلیکن آسٹریلیا نے آخری اووروں میں اینابیلا سدرلینڈ (۵؍ وکٹ) اور سوفی مولینیو (۳؍ وکٹوں) کی شاندار گیند بازی کی بدولت  ہندوستان کو ۳۳۰؍تک محدود کردیا۔

آسٹریلیا نے ٹاس جیت کر پہلے گیند بازی کا فیصلہ کیا۔ بلے بازی کرتے ہوئے  ہندوستانی اوپننگ جوڑی پرتیکا راول اور اسمرتی مندھانا نے اچھی شروعات کی، پہلی وکٹ کیلئے۱۵۵؍رنوں کی شراکت داری قائم کرتے ہوئے، ایک بڑے اسکور کی بنیاد رکھی۔ ۲۵؍ویں اوور میں سوفی مولینیو نے اسمرتی مندھانا کو آؤٹ کرکے ہندوستان کو پہلا جھٹکا دیا، جو سنچری کے راستے پر تھیں۔ اسمرتی مندھانا نے ۶۶؍گیندوں میں ۹؍چوکے اور ۳؍ چھکے لگا کر ۸۰؍ رن بنائے۔ 

اس کے بعد اینابیلا سدرلینڈ نے ۳۱؍ویں اوور میں پرتیکا راول کو ۷۵؍ رنوں پر آؤٹ کیا۔ راول نے اپنی اننگز میں ۱۰؍چوکے اور ایک چھکا لگایا۔ کپتان ہرمن پریت کور (۲۲)، ہرلین دیول (۳۸)، جمائمہ روڈریگس (۳۳)، ریچا گھوش (۳۲) اور امنجوت کور ۱۶؍ رن بنا کر آؤٹ ہوئیں۔ سدرلینڈ نے شاندار بولنگ کرتے ہوئے ہندوستان کو ۴۸ء۵؍اوور میں ۳۳۰؍رنوں تک محدود کردیا۔آسٹریلیا کی جانب سے اینابیلا سدرلینڈ نے ۵؍  وکٹیں حاصل کیں۔ سوفی مولینو کو ۳؍ وکٹیں ملیں جبکہ میگن شٹ اور ایشلے گارڈنر نے ایک ایک بلے باز کو آؤٹ کیا۔