۴۰؍سالہ کرسٹیانو رونالڈو نے ایک شاندار بائیسیکل کک سے دنیا کو پھر حیران کر دیا جبکہ دوسری جانب لیونل میسی نے اپنے جادو سے ایک بار پھر ثابت کیا کہ عمر صرف ایک عدد ہے۔

  ۴۰؍سالہ کرسٹیانو رونالڈو نے ایک شاندار بائیسیکل کک سے دنیا کو پھر حیران کر دیا جبکہ دوسری جانب لیونل میسی نے اپنے جادو سے ایک بار پھر ثابت کیا کہ عمر صرف ایک عدد ہے۔ رونالڈو نے النصر کی جانب سے ال خلیج  کے خلاف چوتھا گول ایک ناقابلِ یقین بائیسیکل کک کے ذریعے اسکور کیا۔ تکنیک، ٹائمنگ اور اعتماد سب کچھ اس لمحے میں نظر آیا، جیسے وہ اب بھی عروج پر ہوں۔ اس سے چند دن قبل اسکاٹ میکٹومینی نے اسکاٹ لینڈ کو ورلڈ کپ میں پہنچانے کے لیے ایک زبردست بائیسیکلکک اسکور کی تھی، مگر رونالڈو نے جیسے جواب میں کہہ دیا ہو کہ ’’اصل شو یہاں ہوتا ہے۔‘‘
میسی کا باکمال جواب:
چند گھنٹوں بعد دنیا کے دوسرے کونے میں لیونل میسی نے ایسٹرن کانفرنس سیمی فائنل میں سنسناٹی فٹبال کلب کے خلاف ایسا کھیل پیش کیا کہ دیکھنے والے دنگ رہ گئے۔ انہوں نے ایک  جرات مندانہ  ہیڈر سے میچ کا آغاز کیا اور پھر مزید تین گولز میں اہم کردار ادا کیا، جن میں ایک دلکش ٹریویلا پاس بھی شامل تھا جو دفاع کو چیرتا ہوا آگے بڑھا۔
انٹر میامی نے اپنی آخری سات میچوں میں ۲۵؍ گول کیے جن میں سے۲۲؍ میں میسی شامل رہے۔ ایم ایل ایس پلے آف میں میامی ک۱۲؍ گولز میں بھی میسی کا براہِ راست ہاتھ ہے۔ انہوں نے ایم ایل ایس کپ پلے آفز کی تاریخ میں سب سے زیادہ گول کنٹری بیوشنز کا نیا ریکارڈ بھی قائم کر دیا۔ یہ ۳۸؍ سالہ میسی ہیں اب بھی میدان کو اپنی مرضی کے مطابق جھکا رہے ہیں۔
 رونالڈو اپنے۹۵۴؍ گولز کے ساتھ ۱۰۰۰؍ گولز کے ہدف کی جانب تیزی سے بڑھ رہے ہیں  جبکہ میسی ۸۹۶؍ گولز پر موجود ہیں۔وہ شاید صرف کاغذ پر بوڑھے ہو رہے ہیں لیکن ان کا کھیل کچھ اور کہانی سناتا ہے۔دونوں نے تقریباً دو دہائیوں تک ایک دوسرے کو نئی بلندیوں تک دھکیلا۔ ان کی رقابت نے جذبات، داستانیں اور وہ یادیں پیدا کیں جو ہمیشہ زندہ رہیں گی۔ کچھ کے لیے رونالڈو سب سے مقبول ہیں، کچھ کے لیے میسی، مگر جب وہ رخصت ہوں گے تو کھیل میں ایک خلا ضرور محسوس ہوگا۔ فٹبال آگے بڑھ جائے گا۔مگر ایسا باب دوبارہ کبھی نہیں لکھا جائے گا۔