ہندوستانی موسیقی کی دنیا میں چند گلوکار ایسے ہیں جنہوں نے اپنی منفرد آواز، توانائی سے بھرپور پرفارمنس اور عوامی مقبولیت کے ذریعے ایک الگ شناخت بنائی۔ میکا سنگھ انہی فنکاروں میں شامل ہیں۔وہ صرف ایک پلے بیک سنگر نہیںبلکہ ایک کمپوزر، لائیو پرفارمر اور تفریحی شخصیت کے طور پر بھی جانے جاتے ہیں۔ ان کے گیت شادیوں، تقریبات، کلبوں اور عوامی محفلوں کا مستقل حصہ بن چکے ہیں، اور گزشتہ دو دہائیوں سے وہ انڈی پاپ اور فلمی موسیقی کے نمایاں ناموں میں شمار ہوتے ہیں۔

میکا سنگھ کا اصل نام امرِک سنگھ ہے۔وہ ۱۰؍جون ۱۹۷۷ءکومغربی بنگال کےشہر درگاپور میں پیدا ہوئے۔ ان کا تعلق ایک موسیقی سے وابستہ پنجابی خاندان سے ہے۔ ان کے والد اجمیرسنگھ ایک مذہبی اور موسیقی سے وابستہ شخصیت تھے، جبکہ ان کے بڑے بھائی دلیر مہندی پہلے ہی موسیقی میں ایک معروف نام بن چکے تھے۔ اسی ماحول نے میکا میں بچپن ہی سے موسیقی کے شوق کو پروان چڑھایا۔

میکا نے رسمی موسیقی کی تعلیم حاصل کرنے کے ساتھ مختلف ساز بجانا بھی سیکھا۔ وہ گٹار، کی بورڈ اور دیگر آلاتِ موسیقی میں دلچسپی رکھتے تھے، جس کا اثر بعد میں ان کے اسٹیج شوز اور موسیقی میں بھی نظر آیا۔

اگرچہ میکا نے ابتدا میںاپنے بھائی دلیرمہندی کے ساتھ کام کیا، لیکن جلد ہی انہوں نے اپنی الگ شناخت بنانے کی کوشش شروع کر دی۔ ۱۹۹۸ءمیں ان کا البم ’ساون میں لگ گئی آگ‘ریلیز ہوا، جس نےانہیں نوجوان سامعین میں بے حد مقبول بنا دیا۔ یہ گانا آج بھی ان کی پہچان سمجھا جاتا ہے۔اس کامیابی کے بعد میکا کو بالی ووڈ میں گانے کے مواقع ملنے لگے۔ ان کی آواز میں ایک مخصوص کھردرا پن، پنجابی انداز اور اسٹیج انرجی تھی، جس نے انہیں روایتی پلے بیک سنگرز سے مختلف بنا دیا۔

 

 

۲۰۰۰ءکی دہائی کے وسط سے میکا سنگھ بالی ووڈ کے سب سے زیادہ پسند کئےجانے والے گلوکاروں میں شامل ہو گئے۔ انہوں نے متعدد سپرہٹ گانے گائے، جن میں فلم’جب وی میٹ‘ کیلئے موجا ہی موجا،’شوٹ آئوٹ ایٹ لوکھنڈوالا‘کیلئے گنپت،’ہائوس فل‘ کیلئے دھنو، ’بجرنگی بھائی جان‘ کیلئے آج کی پارٹی، ’دیسی بوائز‘ کیلئے صبح ہونے نہ دے، ’ایجنٹ ونود‘ کیلئے پنگی شامل ہیں۔ان گانوں نے انہیں پارٹی اور ڈانس نمبرز کے بادشاہ کے طور پر مشہور کر دیا۔

میکا سنگھ کی سب سے بڑی طاقت ان کی لائیو پرفارمنس سمجھی جاتی ہے۔ وہ ہندوستان کے علاوہ دنیا بھر میں کنسرٹس کرتے رہے ہیں۔ان کے شوز میں توانائی، مزاح، حاضر جوابی اور سامعین سے براہِ راست رابطہ نمایاں ہوتا ہے۔ یہی وجہ ہے کہ انہیں محض اسٹوڈیو گلوکار کے بجائے ایک مکمل اسٹیج انٹرٹینر سمجھا جاتا ہے۔

 

 

میکا سنگھ کا انداز روایتی پلے بیک سنگرز سے مختلف رہا ہے۔ وہ اکثررنگین ملبوسات، بڑے اسٹیج سیٹ اپ اور پرجوش انداز میں نظر آتےہیں۔ ان کی پنجابی جڑیں ان کی موسیقی میں واضح محسوس ہوتی ہیں، اور وہ اکثر بھنگڑا، پاپ اور فلمی موسیقی کو ملا کر پیش کرتے ہیں۔

میکا سنگھ نے صرف گلوکاری تک خود کو محدود نہیں رکھا۔ وہ مختلف ریئلٹی شوز میں جج، مہمان اور میزبان کے طور پر بھی نظر آئے۔ ان کی شخصیت ٹی وی اسکرین پر بھی ناظرین کو متوجہ کرتی رہی ہے۔