اپوزیشن پارلیمنٹ میں آج اس معاملہ کو پوری شدت سےاٹھائےگا، امیت شاہ نشانہ پر ہوںگے، ذمہ داروں  کےخلاف کارروائی اور وزیراعظم سے طلبہ سے معافی مانگنے کا مطالبہ۔

وزارت تعلیم سے دھرمیندر پردھان  کے استعفیٰ  کے بعد اپوزیشن  کے  اعتماد میں غیر معمولی اضافہ ہوا ہے اور    اس بڑی کامیابی کےبعد وہ احتجاج کرنےوالے طلبہ پر ۲۰؍ جولائی کو دہلی کی سڑکوں پر ڈھائے گئے مظالم کی جوابدہی  طے کرنے کیلئے پیر کو پارلیمنٹ میں پوری شدت سے آواز بلند کریگا۔ کانگریس کی قیادت  میں اپوزیشن اتحاد نے پولیس کریک ڈاؤن کا معاملہ بھرپور انداز میں اٹھانے کی تیاری کرلی ہے۔   وہ ان  زیادتیوں کے ذمہ دار افراد کے خلاف کارروائی اور وزیر اعظم نریندر مودی سے طلبہ سے معافی مانگنے  کے  مطالبہ پر اٹل ہے۔ 

وزیرداخلہ سے جوابدہی کی مانگ

اپوزیشن اتحاد’’انڈیا‘‘ کی پارلیمانی حکمت عملی، جس میں دو سال قبل بنائے گئے اینٹی پیپر لیک قانون میں مجوزہ ترمیمی بل پر مؤقف بھی شامل ہے، پیر کی صبح پارلیمنٹ میں راجیہ سبھا میں قائد حزب اختلاف ملکارجن کھرگے کے چیمبر میں ہونے والی میٹنگ میں طے کی جائے گی۔اس ضمن میں راہل گاندھی  پہلے ہی وزیر داخلہ امیت شاہ کو خط لکھ کر پوچھ چکے ہیں کہ لاٹھی چارج کی اجازت کس نے دی تھی ۔ کانگریس کے جنرل سیکریٹری جے رام رمیش نے خط شیئر کرتے ہوئے کہا ہے کہ راہل گاندھی نے امیت شاہ سے ۲؍اہم سوال پوچھے ہیںکہ’’کیا وزیر داخلہ کی حیثیت سے آپ نے طلبہ کے خلاف پیلٹ گن سمیت ہلاکت خیز طاقت کے استعمال کی منظوری دی تھی؟ اگر نہیں، تو یہ اجازت کس نے دی؟ جو افراد سادہ لباس میں طلبہ کو لاٹھیوں سے مارتے ہوئے نظر آئے، وہ پولیس اہلکار تھے یا رضاکار؟ اور ان کی تعیناتی کی منظوری کس نے دی تھی؟‘‘

رمیش نے کہا کہ وزیر داخلہ کو پیر کو پارلیمنٹ میں ان اہم سوالات کا جواب دینا چاہیے اور وزیر اعظم کو طلبہ سے معافی مانگنی چاہیے۔کانگریس نے مرکزی وزیر تعلیم دھرمیندر پردھان کے استعفے کو طلبہ کی فتح قرار دیا ہے، تاہم اس کا کہنا ہے کہ وزیر اعظم کو بھی طلبہ سے معافی مانگنی چاہیے۔

’’وزیراعظم کو معافی مانگنی ہوگی‘‘

ملکارجن کھرگے نے کہا ہے کہ اب نریندر مودی کی باری ہے کہ وہ معافی مانگیں اور احتجاجی طلبہ پر لاٹھیاں، ڈنڈے اور پیلٹ گن استعمال کرنے والوں کے خلاف سخت کارروائی کریں۔جے رام رمیش نے کہاکہ’’یہ اختتام نہیں ہے۔ ہمیں اب بھی وزیر اعظم کی جانب سے طلبہ سے معافی کا انتظار ہے۔‘‘