عالمی پاپ اسٹار Rihanna ہندوستان میں اپنے برانڈ Fenty Beauty کے ایونٹس کے دوران ایک وائرل ویڈیو کے بعد سوشل میڈیا پر تنقید کی زد میں آ گئیں۔ ویڈیو میں وہ گائے کو چارا کھلاتی نظر آئیں، تاہم ان کے ہاتھ میں موجود Dior بیگ کی تفصیلات سامنے آنے کے بعد صارفین نے رویے میں تضاد کا سوال اٹھایا۔

عالمی شہرت یافتہ گلوکارہ اور کاروباری شخصیت Rihanna حالیہ دنوں میں ہندوستان میں اپنے بیوٹی برانڈ Fenty Beauty کی تشہیری سرگرمیوں کے سلسلے میں موجود تھیں، جہاں ان کے کئی ویڈیوز اور عوامی لمحات نے سوشل میڈیا پر تیزی سے توجہ حاصل کی۔ انہی میں سے ایک ویڈیو، جس میں وہ ایک گائے کو چاراکھلاتی دکھائی دیتی ہیں، وائرل ہو گیا۔ابتدائی طور پر اسے مثبت انداز میں لیا گیا۔ کئی صارفین نے اس عمل کو مقامی ثقافت کے احترام سے تعبیر کیا، کیونکہ ہندو مذہب میں گائے کو چارا کھلانا نیک عمل سمجھا جاتا ہے۔ تاہم، ویڈیو کے وائرل ہونے کے چند ہی گھنٹوں بعد بحث نے ایک نیا رخ اختیار کر لیا جب کچھ صارفین نے ویڈیو میں نظر آنے والے ایک اہم عنصر کی نشاندہی کی، Dior کا وہ بیگ جو ریحنہ اپنے ہاتھ میں اٹھائے ہوئے تھیں۔

Rihanna lands in India for her "Cruelty free" brand Fenty Beauty promo!!🤡

To butter up Indian buyers, she goes full desi cosplay; doing aarti and feeding calves like some enlightened saint.

Peak hypocrisy from this serial offender: She’s literally feeding one calf while… https://t.co/ofYuKfnXFH pic.twitter.com/Qpw0SI5ASP

— Saynotolibrandu (@saynotolibrandu) April 27, 2026

آن لائن شیئر کی گئی تفصیلات کے مطابق، یہ ’’Medium Dior Crunchy Bag‘‘ ہے جس کی قیمت تقریباً ۳ء۴؍ لاکھ روپے ہے۔ برانڈ کی ویب سائٹ کے مطابق، اس بیگ کی تیاری میں بچھڑے کی کھال (calfskin) اور بھیڑ کی کھال جیسے مواد استعمال کیے گئے ہیں۔ یہی پہلو سوشل میڈیا پر تنازع کی بنیاد بنا۔ کچھ صارفین نے اس صورتحال کو واضح تضاد قرار دیتے ہوئے کہا کہ ایک طرف جانور کو کھانا کھلانا اور دوسری طرف جانوروں سے بنی مصنوعات کا استعمال ایک اخلاقی سوال پیدا کرتا ہے۔ ایک صارف نے لکھا کہ ’’ریحنہ ایک گائے کو کھانا کھلا رہی ہیں جبکہ بچھڑے کی کھال سے بنا بیگ پکڑے ہوئے ہیں۔‘‘

ایک اور تبصرے میں کہا گیا کہ ’’یہ لمحہ ستم ظریفی کی مثال بن گیا ہے، ہمدردی اور فیشن ایک دوسرے کے برعکس نظر آ رہے ہیں۔‘‘ دوسری جانب، متعدد صارفین نے اس تنقید کو غیر متوازن قرار دیتے ہوئے کہا کہ عالمی لگژری فیشن انڈسٹری میں لیدر مصنوعات عام ہیں اور کسی ایک واقعے کو بڑھا چڑھا کر پیش کرنا درست نہیں۔ ایک صارف نے لکھا کہ’’تقریباً تمام پریمیم برانڈز لیدر استعمال کرتے ہیں، اس لیے یہ بحث یکطرفہ ہو رہی ہے۔‘‘

یہ بھی پڑھئے: شاہ رخ نے سیف علی سے ہاتھ ملایا، اگلی فلم ریلیز کے لیے تیار، بیٹی سارہ کو ٹکرملے گی!

کچھ سوشل میڈیا صارفین نے اس واقعے کو ۲۰۲۱ءمیں کسانوں کے احتجاج کے دوران ریحنہ کے بیان سے بھی جوڑنے کی کوشش کی، تاہم ان دعوؤں کی کوئی تصدیق نہیں ہوئی اور انہیں محض آن لائن قیاس آرائیاں سمجھا جا رہا ہے۔ یہ بھی قابل ذکر ہے کہ Fenty Beauty کو عمومی طور پر ’’cruelty-free‘‘ برانڈ کے طور پر پیش کیا جاتا ہے، جس کی وجہ سے کچھ صارفین نے اس معاملے کو مزید حساس انداز میں دیکھا۔ تاہم ماہرین کے مطابق ’’cruelty-free‘‘ کا تعلق عموماً جانوروں پر مصنوعات کی ٹیسٹنگ سے ہوتا ہے، نہ کہ ہر قسم کے خام مال سے۔ تاحال ریحنہ یا ان کی ٹیم کی جانب سے اس معاملے پر کوئی باضابطہ ردعمل سامنے نہیں آیا ہے۔