اولی پوپ ( ناٹ آؤٹ ۱۴۸؍ رن) کی سنچری کی مدد سے انگلینڈ نے پہلے ٹیسٹ کے تیسرے دن سنیچر کو اپنی دوسری اننگز میں ۶؍ وکٹ پر۳۱۶؍ رن بنا کر ہندوستان کے خلاف۱۲۶؍ رن کی برتری حاصل کر لی

اولی پوپ ( ناٹ آؤٹ ۱۴۸؍ رن) کی سنچری کی مدد سے انگلینڈ نے پہلے ٹیسٹ کے تیسرے دن سنیچر کو اپنی دوسری اننگز میں ۶؍ وکٹ پر۳۱۶؍ رن بنا کر ہندوستان کے خلاف۱۲۶؍ رن کی برتری حاصل کر لی۔راجیو گاندھی انٹرنیشنل اسٹیڈیم میں پہلے ٹیسٹ کے چوتھے دن انگلینڈ نے۲۰۰؍ سے زائد رن کا ہدف دینے کی امیدیں بڑھا دی ہیں۔ دن کا کھیل ختم ہونے کے بعد جب پوپ میدان سے باہر نکل رہے تھے تو ہندوستانی کھلاڑیوں نے مصافحہ کیا اور ان کی اننگز کو سراہا جب کہ اسٹینڈس سے تماشائیوں نے کھڑے ہو کر انہیں مبارکباد دی۔ہندوستان بہتر کر سکتا تھا، لیکن انگلینڈ نے لنچ کے بعد  سیشن میں گراوٹ کے بعد اچھا مظاہرہ کیا۔ چائے کے وقت جسپریت بمراہ اور روی چندرن اشون نے مہمان ٹیم کو ۵؍ وکٹ پر۱۷۲؍رن  پر آؤٹ کردیا۔ پوپ نے سخت محنت کی اور ناٹ آؤٹ۱۴۸؍رن بنا کر انگلینڈ کو کھیل میں واپس لایا۔ وہ  ہندوستان کے خلاف دوسری اننگز میں سنچری بنانے والے پہلے غیر ملکی بلے باز بن گئے۔ بین فاکس نے ان کا ساتھ دیا اور دونوں نے چھٹے  وکٹ کیلئے ۱۱۲؍ رن کی شاندار شراکت کی۔ اکشر پٹیل نے۱۱۰؍رن  پر پوپ کو جان بخشی، جس کا خمیازہ ہندوستان کو بھگتنا پڑا۔
اس سے قبل ہندوستان نے اپنی پہلی اننگز جمعہ  کے اسکور۴۲۱؍ رن  ۷؍وکٹ  سے آگے شروع کی لیکن میزبان ٹیم جو روٹ کی خطرناک اسپن کا مقابلہ نہ کر سکی اور ہندوستان کی پہلی اننگز اپنے جمعہ  کے اسکور میں صرف۱۵؍ رن کے اضافے کے ساتھ ختم ہو گئی۔ جوروٹ نے۸۷؍ رن کے اسکور پر جڈیجا کو ایل بی ڈبلیو کیا جبکہ روٹ نے بمراہ کو خوبصورت بولڈ کیا۔ محمد سراج نے روٹ کو اپنی ہیٹ ٹرک اور فائیو فیر سے محروم کر دیا لیکن وہ کم گھومنے والی گیند پر ریحان احمد کے ہاتھوں آؤٹ ہو گئے۔
انگلینڈ نے اپنی دوسری اننگز کا آغاز محتاط انداز میں کیا لیکن لنچ سے چند منٹ قبل اشون جارحانہ کھیلنے والے کراؤلی (۳۱؍رن) کا وکٹ لینے میں کامیاب رہے۔ کھیل کے دوسرے سیشن میں ہندوستان نے بمراہ اور اسپنرس کی گیند بازی کے ساتھ زبردست مقابلہ کیا اور ۴؍ وکٹ لے کر چائے کے وقت انگلینڈ کا اسکور۱۷۲/۵؍ تک پہنچا دیا۔ بمراہ کو ڈکٹ (۴۷؍رن) کو کلین بولڈ کرنے میں صرف ایک اوور لگا۔ بمراہ نے دورہ کرنے والے بلے بازوں کیلئے اپنے یارکر اور رفتار کی فریب دہی سے تبدیلیوں کیلئے مشکلات پیدا کیں۔ انہوں نے انگلینڈ کے بہترین بلے باز جو روٹ کو آؤٹ کیا۔ جونی بیریسٹو (۱۰) نے بمراہ کے طوفان کا سامنا کیا، لیکن وہ جڈیجا کو چکما دینے میں ناکام رہے۔ بین اسٹوکس اشون کی اسپن کے دھوکے میں آکر اپنا وکٹ گنوا بیٹھے۔ اس کے ساتھ ہی اشون نے اسٹوکس (۳۳) کو ٹیسٹ میں۱۲؍ویں بار آؤٹ کیا اور تاریخ رقم کردی۔ ڈیوڈ وارنر۱۱؍ بار ان کی فہرست میں اگلے نمبر پر ہیں۔
اولی پوپ نے ریحان احمد کے ساتھ اچھی  بلے بازی  جاری رکھی  جو اسٹمپ پر۱۶؍ رن بنا کر ناٹ آؤٹ رہے۔ انگلینڈ کو میچ جیتنے کیلئے بڑی برتری حاصل کرنا ہو گی۔ انگلینڈ کے بلے باز اس کیلئے کوشش کررہے ہیں۔ ہندوستانی گیندباز انہیں جلد آؤٹ کرکے کم اسکور کا ہدف حاصل کرنا چاہیں گے۔