ٹی ۲۰؍ سیریز میں ۰۔۲؍کی ناقابل تسخیر برتری حاصل۔ دوسرا میچ۱۰؍ رن سے جیتا۔

پاکستان کی خواتین کرکٹ ٹیم نے منگل کو نیوزی لینڈ کے خلاف دوسرا ٹی۲۰؍ میچ ۱۰؍ رن سے جیت کر۳؍ میچوں کی سیریز میں ۰۔۲؍ کی فیصلہ کن برتری حاصل کرلی۔ ٹاس ہارنے کے بعد پہلے بلے بازی کرتے ہوئے پاکستانی ٹیم نے۲۰؍ اوور میں ۶؍ وکٹوں پر ۱۳۷؍ رن بنائے۔ پاکستان کو پہلا جھٹکا اس وقت لگا جب پانچویں اوور کی پہلی گیند پر شوال ذوالفقار ۷؍ رن بناکر آؤٹ ہوگئیں ۔ منیبہ علی نے۳۵، عالیہ ریاض نے۲۲؍ گیندوں پر ایک چھکے اور ۳؍ چوکوں سے سجی۳۲؍ رن کی ناٹ آؤٹ جارحانہ اننگز کھیلی، جبکہ بسمہ معروف اور کپتان ندا ڈار بالترتیب ۲۱؍اور ۱۴؍ رن بنا سکیں ۔ عالیہ ریاض کو شاندار کارکردگی پر میچ کے بہترین کھلاڑی کا انعام دیا گیا۔ پاکستان نے مقررہ۲۰؍ اوورس میں ۶؍وکٹوں کے نقصان پر۱۳۷؍ رن بنائے اور نیوزی لینڈ کو جیت کیلئے ۱۳۸؍ رن کا ہدف دیا۔نیوزی لینڈ ویمن کرکٹ کی جانب سے فرین جونز اور مولی پین فولڈ نے ۲۔۲؍ وکٹ حاصل کئے۔۱۳۸؍ رن کے ہدف کا تعاقب کرنے آئی نیوزی لینڈ کی ٹیم کا آغاز انتہائی خراب رہا اور ٹیم نے جلد ہی سوزی بیٹس اور سوفی ڈیوائن سمیت ۴؍ وکٹ گنوا دیئے۔ جارجیا پلمر نے ۲۸؍ رن کی اننگز کھیلی۔ جارجیا کے علاوہ نیوزی لینڈ کی کوئی بھی بلے باز۲۵؍ رن کا ہندسہ عبور نہ کر سکیں ۔ نیوزی لینڈ کی ٹیم مقررہ۲۰؍ اوورس میں ۷؍ وکٹوں پر صرف۱۲۷؍ رن بنا سکی اور ۱۰؍ رن سے میچ ہار گئی۔یہ پہلا موقع تھا جب پاکستان ویمن ٹیم نے ملک سے باہر سیریز جیتی ہے۔ سیریز کا تیسرا اور آخری میچ سنیچر کو کوئنس ٹاؤن میں کھیلا جائے گا۔