یکروزہ کرکٹ پر توجہ مرکوز کرنے کا فیصلہ۔ روہت نے کہا: سفید جرسی میں ملک کی نمائندگی کرنا میرے لئے اعزاز رہا

روہت شرما نے ٹیسٹ کرکٹ سے ریٹائرمنٹ کا اعلان کردیا ہے ۔ انہوں نے اپنے انسٹاگرام اکاؤنٹ پر ایک اسٹوری پوسٹ کرکے اپنی ریٹائرمنٹ کی اطلاع دی۔ روہت جو پہلے  ہی ٹی ۲۰؍  انٹرنیشنل  سے ریٹائر ہو چکے ہیں۔ روہت شرما  یکروزہ کھیلنا جاری رکھیں گے۔ بدھ کی شام یہ رپورٹس سامنے آئیں کہ انہیں دورہ انگلینڈ پر ٹیسٹ کپتانی سے ہٹا دیا جائے گا جس کے بعد انہوں نے ریڈ بال کرکٹ کو الوداع کہہ دیا۔
 حمایت کیلئے شکریہ ادا کیا 
 روہت شرما نے اپنے انسٹاگرام ہینڈل پر ایک کہانی شیئر کرتے ہوئے لکھا’’ `ہیلو، میں سب کو بتانا چاہتا ہوں کہ میں ٹیسٹ کرکٹ سے ریٹائر ہو رہا ہوں۔ ریڈ بال کرکٹ میں ملک کی نمائندگی کرنا میرے لئے قابل فخر لمحہ تھا۔ محبت اور حمایت کیلئے سب کا شکریہ۔ میں ون ڈے فارمیٹ کھیلنا جاری رکھوں گا۔‘‘
روہت  نے ۱۲؍ٹیسٹ سنچریاں اسکور کیں
 روہت شرما نے ۲۰۱۳ء میں ہندوستان کیلئے ٹیسٹ ڈیبیو کیا تھا ۔ وہ ۲۰۲۱ء  میںپلیئنگ۱۱؍ میں اپنی جگہ بنانے میں کامیاب رہے اور ۲۰۲۲ء  میں کپتان  بھی بنے ۔ہندوستان کیلئے ۶۷؍ ٹیسٹ میں انہوں نے۴۰ء۵۷؍ کے اوسط  سے ۴۳۰۱؍رن بنائے لیکن  بیرون ملک ان کا اوسط ۳۱ء۰۱؍ رہا۔
 روہت شرما کا آسٹریلیا میں اوسط۲۴ء۳۸؍ اور جنوبی افریقہ میں ۱۶ء۶۳؍  تھا۔ تاہم انگلینڈ میں انہوں  نے۴۴ء۶۶؍ کےاوسط سے رن بنائے۔ انہوں نے گزشتہ دورے پر اوپننگ کرتے ہوئے سنچری بھی بنائی تھی۔ روہت  کے ریٹائرمنٹ کے بعد اب یشسوی جیسوال اور کے ایل راہل انگلینڈ میں اوپننگ کرتے ہوئے دیکھے جا سکیں گے۔
روہت نیوزی لینڈ اور آسٹریلیا کے خلاف فلاپ رہے  تھے
روہت نیوزی لینڈ اور آسٹریلیا کے خلاف آخری ٹیسٹ سیریز میں بھی بلے سے بری طرح فلاپ ہوئے تھے۔ وہ نیوزی لینڈ کے خلاف ۱۵ء۱۶؍  اور آسٹریلیا کے خلاف ۶ء۲۰؍ کے اوسط سے رن بنائے تھے ۔  رپورٹ کے مطابق سلیکٹرز نے فیصلہ کیا تھا کہ روہت کی اس فارم کو دیکھتے ہوئے انہیں کپتانی کی ذمہ داری نہیں دی جا سکتی۔ اب ٹیم انڈیا دورہ انگلینڈ کے لیے نئے ٹیسٹ کپتان کا انتخاب کرے گی۔
 آسٹریلیا کے آخری دورے پر روہت نے ابتدائی میچوں میں اوپننگ نہیں کی تھی۔ یشسوی جیسوال اور کے ایل راہل نے سیریز میں بطور سلامی بلے باز شاندار کارکردگی کا مظاہرہ کیا تھا ۔ روہت پہلا ٹیسٹ نہیں کھیل سکے تھے۔ وہ دوسرے ٹیسٹ میں آخری ۱۱؍کھلاڑیوں  میں شامل ہوئےلیکن مڈل آرڈر میں بیٹنگ کے لیے آئے۔ ہندوستان نے اس کے بعد جسپریت بمراہ کی کپتانی میں پہلا ٹیسٹ جیتا تھا لیکن روہت کی کپتانی میں ۲؍میچ ہارے۔ روہت نے سڈنی میں آخری ٹیسٹ نہیں کھیلا تھا اور اب وہ ریٹائرمنٹ بھی لے چکے ہیں۔
روہت کپتان برقرار رہنا چاہتے تھے 
 روہت شرما نے آسٹریلیا کے سابق کپتان مائیکل کلارک کے ساتھ پوڈ کاسٹ میں کپتانی جاری رکھنے کی خواہش ظاہر کی تھی۔ روہت نے کہا تھا کہ وہ انگلینڈ میں بمراہ، سمیع اور سراج کے تیز رفتار حملے کی قیادت کرنے کیلئے پُرجوش ہیں۔ خیال کیا جاتا ہے کہ سلیکٹرز سے بات کرنے کے بعد انہوں نے اس فارمیٹ کو الوداع کہہ دیا۔
گمبھیر نے کہا تھا کہ روہت کا فیصلہ سلیکٹرز پر ہے
 ہیڈ کوچ گوتم گمبھیر نے بھی۶؍ مئی کو کہا تھا کہ سلیکشن کمیٹی روہت کے مستقبل کا فیصلہ کرے گی۔ انہوں نے اے بی پی نیوز کے `انڈیا ایٹ۲۰۴۷ء سمٹ میں کہا تھا کہ `میرا کام ٹیم کا انتخاب کرنا نہیں ہے ۔ کوچ کو صرف پلیئنگ۱لیون کو منتخب کرنے کا حق ہے۔ کسی بھی سیریز یا ٹورنامنٹ کے لیے ٹیم کا انتخاب سلیکشن کمیٹی کے ہاتھ میں رہتا ہے۔