ایکٹیویٹی بکس بچوں کو کھیل کے ساتھ معلومات فراہم کرتی ہیں وہیں گرافکس کی مدد سے تخلیقی و علمی صلاحیتوں کو ابھارنے میں مدد ملتی ہے۔

انسان میں سوچنے اور سمجھنے کی صلاحیت ہوتی ہے اور سائنسداں یہ بات ثابت کرتے ہیں کہ ایک کم عمر بچہ بھی سوچنے کی صلاحیت رکھتا ہے۔ اپنی پیدائش سے سات اور آٹھ برس کی عمر تک یہ تخلیقی صلاحیتیں بہت تیزی سے پروان چڑھتی ہیں۔ ہر بچہ بہت حد تک تخلیقی دماغ کا حامل ہوتا ہے مگر شرط یہ ہے کہ اس کی درست سمت میں رہنمائی کی جائے۔ عام طور پر والدین شخصیت کے اس پہلو پر کم توجہ دیتے ہیں۔ جب کوئی بچہ اپنے طور پر کوئی کام کرتا ہے یا تخلیقی طور پر سرگرم ہوتا ہے تو اس کی حوصلہ افزائی نہیں کی جاتی۔ یہ روک ٹوک اور تنقید بچے کی شخصیت کو متحرک و فعال اور سرگرم نہیں رہنے دیتی۔
 اکثر بڑے یہ کہتے سنے جاتے ہیں کہ وہ بچپن میں کچھ اور بننا چاہتے تھے مگر والدین کی خواہش پر کچھ اور نظریے سے پڑھنے لگے اور یوں ان کا کریئر یعنی مستقبل نئی شکل میں ڈھل گیا۔ کچھ بچے بڑے ہو کر یہ بھی کہتے سنے گئے کہ والدین انہیں ڈاکٹر یا انجینئر بنانا چاہتے تھے مگر وہ گلوکار، پینٹر یا آرٹسٹ بن گئے چنانچہ ابتدائی عمر میں ہر بچے پر توجہ دینے سے بچے کی چھپی ہوئی صلاحیتیں نئے انداز سے ظاہر ہوسکتی ہیں۔
 کریئر کاؤنسلنگ میں والدین کو مشورہ دیا جاتا ہے کہ اپنے بچے کو مختلف کاموں سے روکنے کے بجائے انہیں اپنے خیالات کا اظہار کرنے کی مکمل آزادی دی جائے ورنہ اس کا بچے کی تخلیقی صلاحیتوں پر نہایت منفی اثر پڑ سکتا ہے۔ ممکن ہے کہ والدین بچے کی صلاحیتوں کو جانچنے میں ناکام رہیں جو میوزک، آرٹ یا کھیل کی شکل میں ہوسکتی ہیں۔
 آج کل بچوں کو درسی کتابوں کے ساتھ ساتھ ایکٹیویٹی بکس بھی دی جاتی ہیں اور ڈرائنگ کی کتابیں اس کے علاوہ ہوتی ہیں۔ یہ مواد تخلیقی اور تربیتی کاوشوں کو پرکھنے اور شخصیت کو منظم اور متحرک یا مستعد رکھنے میں اہم کردار ادا کرتی ہیں۔ نئی زبان سیکھنے کے لئے، سائنس کی اصطلاحات کو سمجھنے کے لئے یہ کتابیں اپنی حیثیت میں بہترین پیمانہ ہوتی ہیں۔ سوچنے سمجھنے کی صلاحیتوں کو پروان چڑھانے اور تھکے ماندے ذہن کو تازہ دم کرتے ہوئے آپ بچے کو ان کتابوں میں محو کرسکتی ہیں۔ خاص کر ایسے بچے جو بہت غصیلے ہوں انہیں آرٹ، ڈرائنگ اور دیگر فنون لطیفہ جیسی سرگرمیوں میں مصروف رکھ کر ان کے مزاج میں ٹھہراؤ اور نظم و ضبط لایا جاسکتا ہے۔ بچے کو مستعد رکھ کر اس کی پریشانیاں کم کی جاسکتی ہیں۔ آج آپ اپنے بچوں کی ایکٹیویٹی بکس نکال کر دیکھئے۔ ان میں رنگوں، نئے الفاظ، مختلف جانوروں اور اشیاء کی اشکال، مختلف خطوط کی لکیریں، نشانات، علامتیں اور مختلف پیشوں کی ابتدائی معلومات اور نصاب کے مطابق یا ہٹ کر فراہم کی جانے والی معلومات دلکش اور تخلیقی انفرادیت کے ساتھ دی گئی ہے۔ یہی وجہ ہے کہ بچے ایکٹیویٹی بکس میں دلچسپی لیتے ہیں۔ اس طرح بچوں کی ذہنی اور جسمانی نشوونما قدرے بہتر انداز میں ہوتی ہے۔ دراصل ایکٹیویٹی بکس بچوں کو کھیل کے ساتھ معلومات فراہم کرتی ہیں وہیں گرافکس کی مدد سے تخلیقی و علمی صلاحیتوں کو ابھارنے میں مدد ملتی ہے۔ انہی کتابوں کے ذریعہ بچے کی ذہنی استعداد میں اضافہ ہوسکتا ہے۔