آسٹریلیا کے سابق کپتان نے کہا:روہت بہت پرسکون طبیعت کے مالک ہیں۔ وہ جو کچھ بھی کرتے ہیں اس میں بہت پرسکون رہتے ہیں۔ آپ ان کے کھیلنے کے انداز میں بھی یہ دیکھ سکتے ہیں

آسٹریلیا کے سابق کپتان رکی پونٹنگ نے کہا کہ ہندوستانی کرکٹ ٹیم کے کپتان روہت شرما گھریلو سرزمین پر آئی سی سی مینز کرکٹ ورلڈ کپ۲۰۲۳ء میں ہندوستان کیلئے مثالی کپتان ہیں۔پونٹنگ نے کہا کہ ہندوستان نے آسٹریلیا، افغانستان اور روایتی حریف پاکستان کے خلاف زبردست جیت کے ساتھ اپنی کرکٹ ورلڈ کپ مہم کا شاندار آغاز کیا ہے۔ ہندوستان ۳؍ جیت کے ساتھ پوائنٹس ٹیبل پر سرفہرست ہے۔ روہت نے میزبان ٹیم کو پرجوش شائقین کے سامنے کھیلنے کے دوران آنے والے اضافی دباؤ کی فکر سے آزاد کر دیا ہے۔
 انہوں نے ہندوستانی کپتان روہت شرما کو گھریلو حمایت کے درمیان ہندوستان کے لئے  آگے بڑھنے کی کلید قرار دیا ہے۔ پونٹنگ نے آئی سی سی کو بتایا ’’وہ (روہت) بہت پرسکون طبیعت کے مالک ہیں۔ وہ جو کچھ بھی کرتے ہیں اس میں بہت پرسکون رہتے ہیں۔ آپ ان کے کھیلنے کے انداز میں بھی یہ دیکھ سکتے ہیں۔ وہ بہت پرسکون بلے باز بھی ہیں اور میدان کے اندر اور باہر بھی وہ ایسے ہی ہیں۔‘‘
  انہوں نے کہاکہ ’’ہم خاموش بیٹھ کر یہ نہیں کہہ سکتے کہ کسی سطح پر دباؤ ان پر غالب نہیں آئے گا، یا اس کا ان پر کوئی اثر نہیں پڑے گا، کیونکہ یہ ٹورنامنٹ کی وسعت کے ساتھ ہوگا لیکن وہ اسے قبول کریں گے اور اس کا سامنا  کریں گے۔‘‘
 انہوں نے کہا کہ روہت ورلڈ کپ میں ہندوستان کی قیادت  کیلئے بہترین شخص ہیں جس سے کوہلی کو  بلے کے ساتھ اپنے کلیدی کردار پر توجہ مرکوز کرنی ہوگی۔انہوں نے کہا کہ وراٹ جیسا کوئی شخص، جو تھوڑا زیادہ دل سے کام کرتا ہے اور شاید شائقین کی بات سنتا ہے اور مداحوں کے ساتھ تھوڑا زیادہ کھیلتا ہے، ان کی شخصیت والے کسی شخص کیلئے شاید یہ تھوڑا مشکل ہوگا۔
 انہوں نے کہاکہ ’’ مجھے لگتا ہے کہ روہت کو اس سے کوئی پریشانی نہیں ہوگی۔ وہ ایک شاندار شخص ہیں اور طویل عرصے سے ایک عظیم کھلاڑی رہے ہیں اور انہوں نے ہندوستان کے کپتان کے طور پر بہت اچھا کام کیا ہے۔‘‘ آسٹریلوی ٹیم کے سابق کپتان پونٹنگ نے کہا کہ میں نے شروع سے ہی کہا تھا کہ مجھے لگتا ہے کہ ہندوستان ہرانے والی ٹیم ہوگی، ان کے پاس بہت باصلاحیت کھلاڑی ہیں۔ انہوں نے کہاکہ ان کی تیز گیند بازی، ان کی اسپن اور ان کے ٹاپ آرڈر، مڈل آرڈر کی بلے بازی میں تمام بنیادیں شامل ہیں۔ انہیں شکست دینا بہت مشکل ہوگا لیکن ہم دیکھیں گے کہ وہ انتہائی دباؤ میں بھی کیسے ڈٹے رہتے ہیں۔