کرسٹیانو رونالڈو کی ایک ایوارڈ تقریب میں کی گئی مختصر سی بات نے سوشل میڈیا پر نئی بحث چھیڑ دی۔ ان کے ایک’’ان شاء اللہ‘‘کہنے پر شائقین چونک گئے اور انٹرنیٹ پر قیاس آرائیوں کا سلسلہ شروع ہو گیا۔

کرسٹیانو رونالڈو جو کچھ بھی کرتے یا کہتے ہیں، وہ خبروں کی زینت بن جاتا ہے۔ جہاں ان کی گول اسکورنگ کا سلسلہ ہر جگہ بحث کا موضوع بنا رہتا ہے، وہیں ایوارڈ تقریب کے دوران ان کا حالیہ ایک جملہ انٹرنیٹ پر ہلچل مچا گیا۔ ایک فٹبال لیجنڈ، جنہوں نے تقریباً دو دہائیوں تک یورپ بھر میں کھیل کر بے مثال کامیابیاں حاصل کیں، اب سعودی پرو لیگ میں النصر کی نمائندگی کر رہے ہیں۔ تاہم، دبئی میں منعقد ہونے والے۲۰۲۵ء گلوب ساکر ایوارڈز کے دوران ان کے ایک لفظ نے لوگوں کو یہ سوچنے پر مجبور کر دیا کہ آیا وہ مسلمان ہو گئے ہیں یا نہیں۔
اتوار (۲۸؍ دسمبر) کو رونالڈو نے مسلسل تیسری بار مڈل ایسٹ پلیئر آف دی ایئر کا ایوارڈ جیتا۔ اس موقع پر انہوں نے اپنے ایک ہزار گول کرنے کے ہدف کا بھی اعلان کیا اور ایسا کرنے والے تاریخ کے پہلے کھلاڑی بننے کی خواہش ظاہر کی۔۴۰؍ سالہ رونالڈو نے اس ایوارڈ کیلئے سالم الدوسری، ریاض محرز اور اپنے سابق ریئل  میڈرڈ کے ساتھی کریم بنزیما جیسے نمایاں ناموں کو پیچھے چھوڑا، جبکہ انہوں نے سعودی کلب کیلئے تمام مقابلوں میں۴۰؍ سے زائد گول اسکور کئے۔

Cristiano Ronaldo says if there is no injury, he will, IN SHA ALLAH, reach the targeted 1,000 goals. pic.twitter.com/KRtVAkhmfl

— Bashir Ahmad, OON (@BashirAhmaad) December 29, 2025

ایوارڈ وصول کرتے ہوئے رونالڈو نے ایک جذباتی تقریر کی اور کہا:’’مزید کھیلنا بہت مشکل ہے، لیکن میرا جذبہ ابھی بھی بہت بلند ہے اور میں مزید کھیلنے کیلئے تیار ہوں۔ چاہے میں مشرقِ وسطیٰ میں کھیلوں یا یورپ میں، مجھے فٹبال کھیلنا، گول کرنا اور ٹرافیاں جیتنا بہت پسند ہے۔‘‘اس کے بعد رونالڈو نے اپنا حتمی ہدف بیان کیا۔’’آپ سب جانتے ہیں کہ میرا مقصد کیا ہے۔ میں مزید ٹرافیاں جیتنا چاہتا ہوں اور ایک ہزار گول اسکور کرنا چاہتا ہوں۔ اگر مجھے کوئی چوٹ نہیں لگی تو میں ضرور ایک ہزار گول کروں گا، ان شاء اللہ۔‘‘ان کے اس جملے نے سوشل میڈیا پر طوفان برپا کر دیا اور بے شمار صارفین یہ سوال کرنے لگے کہ آیا رونالڈو نے اسلام قبول کر لیا ہے۔ اسٹیج پر مسکراتے ہوئے یہ بات کہنے کے باوجود، سوشل میڈیا صارفین نے اپنے اپنے اکاؤنٹس پر اس پر خوب تبصرے کئے۔

یہ بھی پڑھئے: اگر انجری نہ ہوئی تو میں ایک ہزار گول ضرور کروں گا: کرسٹیانو رونالڈو کا عزم

سوشل میڈیا کے چند ردعمل کچھ یوں تھے:
’’ان شاء اللہ؟ کیا وہ اب مسلمان ہو گیا ہے؟‘‘ ایک صارف نے سوال کیا، جبکہ دوسرے نے مذاقاً لکھا، ’’جب بھی وہ عوامی طور پر ان شاء اللہ کہتا ہے، اسے سعودی عرب سے ایک ملین یورو بونس ملتا ہے۔‘‘
ایک اور صارف نے تالیاں بجاتے ہوئے لکھا، ’’واقعی، ان شاء اللہ‘‘۔