ہندوستان کی مردوں کی ڈبلز کی اسٹار جوڑی ساتوِک سائی راج رینکی ریڈی اور چِراغ شیٹّی جمعہ کو انڈونیشیا کے محمد شہیب فکری اور فجر الفیان سے ہار کر آسٹریلین اوپن ۲۰۲۵ء بیڈمنٹن ٹورنامنٹ سے باہر ہو گئی۔

ہندوستان کی مردوں کی ڈبلز کی اسٹار جوڑی ساتوِک سائی راج رینکی ریڈی اور چِراغ شیٹّی جمعہ کو انڈونیشیا کے محمد شہیب فکری اور فجر الفیان سے ہار کر آسٹریلین اوپن ۲۰۲۵ء بیڈمنٹن ٹورنامنٹ سے باہر ہو گئی۔ اس جوڑی کے باہر ہونے کے بعد بی ڈبلیو ایف سپر ۵۰۰؍بیڈمنٹن ایونٹ میں اب صرف لکشیا سین ہی واحد ہندوستانی کھلاڑی ہیں۔ سڈنی کے اولمپک بلیوارڈ میں واقع کویسینٹر میں وہ اپنے ہم وطن آیوش شیٹّی کے چیلنج سے بچتے ہوئے سیمی فائنل تک پہنچ گئے۔
 مردوں کی ڈبلز رینکنگ میں تیسرے نمبر اور ٹاپ سیڈ ساتوک-چِراغ، ۱۳؍ویں رینک کی انڈونیشیائی جوڑی سے ۵۰؍ منٹ میں۱۵۔۲۱، ۱۹۔۲۱؍ سے شکست کھا گئے۔ نئی جوڑی ہونے کے باوجود، الفیان، جو محمد ریان  کے ساتھ دو مرتبہ ورلڈ چیمپئن شپ میں کانسہ کا تمغہ جیت چکے ہیں  اور فکری نے اس سال جولائی میں جاپان اوپن کے لیے ٹیم بنانے کے بعد تیزی سے ترقی کی ہے۔
انڈونیشیائی جوڑی نے مل کر چائنا اوپن سُپر۱۰۰۰؍ جیت لیا اور مختصر عرصے میں ڈنمارک، کوریا اور فرنچ اوپن میں رنر اپ بھی رہے۔ فارم میں کھیلنے والی اس ٹیم کے خلاف  ، جو عالمی سطح پر ۱۳؍ویں نمبر تک پہنچ گئی ، ساتوک-چِراغ نے تیز شروعات کی کوشش کی اور پہلے گیم میں ۲۔۷؍ کی برتری حاصل کی  تاہم انڈونیشیا کے کھلاڑیوں نے  اچھا مقابلہ کرتے ہوئے اسکور۱۶۔۱۶؍ برابر کر دیا۔
ہندوستانی جوڑی۱۷۔۱۹؍ کی برتری کے ساتھ بہتر پوزیشن میں نظر آ رہی تھی، مگر الفیان  اور فکری نے اہم لمحات میں لگاتار چار پوائنٹس لے کر پہلا گیم جیت لیا۔ دوسرے گیم میں ایشیائی کھیلوں کے موجودہ چیمپئن ساتوک -چِراغ نے وقفے تک ایک پوائنٹ کی برتری رکھی، لیکن پانچویں سیڈیڈ انڈونیشیائی جوڑی نے ری اسٹارٹ کے بعد بہتر کھیل پیش کرتے ہوئے گیم اور میچ دونوں اپنے نام کر لیے۔ یہ دونوں ٹیموں کے درمیان پہلا مقابلہ تھا۔

یہ بھی پڑھئے:فرانس: پیرس کی عدالت نے قدیم ترین کیلکولیٹر کی نیلامی روک دی

یہ مسلسل دوسرا ۲۰۲۵ء بی ڈبلیو ایف ورلڈ ٹور ایونٹ ہے جس میں ساتوک-چِراغ کو انڈونیشیائی جوڑی نے باہر کیا ہے۔ الفیان  کے دیرینہ ساتھی اردیانتو اور رحمت ہدایت نے اکتوبر میں فرنچ اوپن کے پہلے راؤنڈ میں انہیں ناک آؤٹ کیا تھا۔

یہ بھی پڑھئے:۵۱؍ ممالک کی اقوام متحدہ کے نیوکلیئر واچ ڈاگ سے فلسطین کی امداد میں مدد کی اپیل

مردوں کے سنگلز میں لکشیا سین ، جو پیرس ۲۰۲۴ء کے سیمی فائنلسٹ، عالمی رینکنگ میں ۱۴؍ویں اور اس ایونٹ میں ۷؍ویں سیڈ ہیں ، نے۵۲؍ منٹ کے کوارٹر فائنل میں دنیا کے ۳۲؍ویں نمبر کے آیوش شیٹّی کو۲۱۔۲۳، ۱۱۔۲۱؍ سے شکست دے دی۔ پہلے گیم میں دونوں کھلاڑیوں نے مختلف مراحل میں برتری حاصل کی اور لکشیا نے گیم جیتنے سے قبل ایک ایک گیم پوائنٹ بچایا۔ اس کے برعکس دوسرا گیم یکطرفہ ثابت ہوا اور لکشیا نے شیٹّی کے خلاف اپنا ہیڈ ٹو ہیڈ ریکارڈ ۰۔۲؍ کر لیا۔ یو ایس اوپن جیتنے والے آیوش شیٹّی اس سال بی ڈبلیو ایف ٹور ٹائٹل جیتنے والے واحد ہندوستانی بیڈمنٹن کھلاڑی ہیں۔