پاکستان ٹیسٹ کرکٹ ٹیم کے کپتان شان مسعود کا کہنا ہے کہ آسٹریلیا میں ایسا کرکٹ کھیلنے آئے ہیں جو دونوں ممالک کے کرکٹ مداحوں کو پرجوش کرے۔

 پاکستان ٹیسٹ کرکٹ ٹیم کے کپتان شان مسعود کا کہنا ہے کہ آسٹریلیا میں ایسا کرکٹ کھیلنے آئے ہیں جو دونوں ممالک کے کرکٹ مداحوں کو پرجوش کرے۔ کینبرا میں پرائم منسٹر الیون کیخلاف میچ سے قبل میڈیا ٹاک کرتے ہوئے ٹیسٹ ٹیم کے کپتان شان مسعود کا کہنا تھا کہ ہمیں رن بنانے کی رفتار تیز کرنی ہوگی، گیندباز۲۰؍ وکٹ لیں گے تو ہمارے لئے منصوبوں پر عملدر آمد کرنا آسان ہو جائے گا۔
انہوں نے کہا کہ ہمارے پاس بولنگ میں بہت متبادل موجود ہیں ، سڈنی میں گیند ریورس ہوتا ہے، وسیم جونیئر کو اس لئے ساتھ لائے ہیں ، خرم شہزاد اور میر حمزہ دونوں ڈومیسٹک کے پرفارمر ہیں ۔ شان مسعود نے بتایا کہ آسٹریلیا کے خلاف ٹیسٹ سیریز میں عبداللہ شفیق اور امام الحق اوپننگ کریں گے، بابراعظم نمبر۴؍ پر کھیلیں گے جبکہ سرفراز احمد کو محمد رضوان پر ترجیح دیں گے۔ ان کا کہنا تھا کہ ڈیوڈ وارنر دنیائے کرکٹ کے بہترین ایمبیسڈر ہیں ، یہ سیریز ان کیلئے ایک جذباتی سیریز ہوگی، کوشش کریں گے کہ ان کی آخری سیریز میں وارنر کے لئے مختلف چیلنجز لائیں۔
شان مسعود نے کہا کہ ہم یہاں آسٹریلیا میں کرکٹ کھیلنے آئے ہیں ہمیں کسی کا منہ بند نہیں کرنا، ہم اپنی بہترین صلاحیتوں کے مطابق کرکٹ کھیلیں گے، ہم ایسا کرکٹ کھیلیں گے جو کہ مداحوں کو پسند آئے۔ان کا کہنا تھا کہ نتائج ہمارے ہاتھ میں نہیں ہیں لیکن ہم مثبت انداز میں کھیلیں گے، ہمارے بارے میں رائے رکھنا ہر کسی کا حق ہے۔ میں نے زندگی میں ہمیشہ چیلنجز قبول کئے ہیں ، یہ ایک چیلنج ہے اور ایک اچھا موقع ہے۔