ہندوستانی شٹلرایچ ایس پرنئے اور پی وی سندھو نے منگل کو ایشیائی کھیلوں کے بیڈمنٹن مقابلے میں اپنے اپنے حریفوں کے خلاف میچ جیت کر مردوں اور خواتین کے سنگلز کے پری کوارٹر فائنل میں داخلہ حاصل کر لیا ہے۔

ہندوستانی شٹلرایچ ایس پرنئے اور پی وی سندھو نے منگل کو ایشیائی کھیلوں کے بیڈمنٹن مقابلے میں اپنے اپنے حریفوں کے خلاف میچ جیت کر مردوں اور خواتین کے سنگلز کے پری کوارٹر فائنل میں داخلہ حاصل کر لیا ہے۔
چین میں جاری۱۹؍ویں ایشیائی کھیلوں میں آج ۲؍ باراولمپک تمغہ جیتنے والی پی وی سندھو نے بیڈمنٹن میں منگل کو اپنے راؤنڈ آف ۳۲؍ کے میچ میں چائنیز تائپے کی سو وین چی کوہراکر خواتین کے سنگلز میچ میں جیت کے ساتھ اپنے مہم کی شروعات کی۔ ہندوستانی بیڈمنٹن کھلاڑی گزشتہ سال دولت مشترکہ کھیلوں میں گولڈ میڈل جیتنے کے بعد سے چوٹ سے لڑ رہی ہیں لیکن منگل کو میچ میں وہ اچھے فارم میں نظر آئیں ۔ پی وی سندھو نے ۴۲؍ منٹ تک جاری رہنے والے میچ میں سو وین چی کو سیدھے گیمز میں ۱۰۔۲۱، ۱۵۔۲۱؍ سے شکست دی۔ ہندوستان کے ٹاپ مینس سنگلز بیڈمنٹن کھلاڑی ایچ ایس پرنئے نے بھی اگلے راؤنڈ میں جگہ بنا لی ہے۔
 پہلے گیم کی شروعات میں شاندار برتری بنانے کے بعد سندھو نے پیچھے مڑ کر نہیں دیکھا اوربریک تک پر ۵؍ پوائنٹ کی مضبوط برتری حاصل کی۔۲۸؍ سالہ ہندوستانی شٹلر نے صرف ۱۸؍ منٹ کا وقت لے کر ۱۰۔۲۱؍سے پہلا گیم اپنے نام کیا۔ دوسرے گیم میں جیت کے سلسلے کو برقرار رکھتے ہوئےسندھو نے چائنیز تائپے کی کھلاڑی کو سخت مقابلہ دیا۔وہیں سو وین چی نے میچ میں واپسی کی پوری کوشش کی۔ اس دوران سو وین چی نے پی وی سندھو کو پریشان کرنے کیلئے کچھ ڈراپ شاٹس بھی کھیلے۔ سندھو نے ۲۰۱۸ء کے ایشیائی کھیلوں میں تمغہ جیتا تھا۔