مردوں اور خواتین کے زمرے کے سرفہرست کھلاڑی جینک سنر اور آریانا سبالینکا فرینچ اوپن ۲۰۲۶ءکے دوسرے راؤنڈ میں آسانی سے پہنچ گئے ہیں۔

 مردوں اور خواتین کے زمرے کے سرفہرست کھلاڑی جینک سنر اور آریانا سبالینکا فرینچ اوپن ۲۰۲۶ءکے دوسرے راؤنڈ میں آسانی سے پہنچ گئے ہیں، جبکہ ڈینیل  میدویدیف اور جیسیکا پیگولا کو پہلے ہی راؤنڈ میں حیران کن شکست کا سامنا کرنا پڑا ہے۔

Back on Chatrier and back with a win ✅#RolandGarros pic.twitter.com/FMOo6AkMQG

— Roland-Garros (@rolandgarros) May 26, 2026

یانک سنرنے فرانس کے وائلڈ کارڈ یافتہ کھلاڑی کلیمینٹ ٹیبر کو۱۔۶، ۳۔۶، ۴۔۶؍ سے یکطرفہ مقابلے میں شکست دی، جس کے ساتھ ہی ان کی فتوحات کا تسلسل (وننگ اسٹریک)۳۰؍ میچوں تک پہنچ گیا ہے۔ موجودہ چمپئن کارلوس الکاراز کے زخمی ہونے کی وجہ سے ٹورنامنٹ سے باہر ہونے کے بعد، یہ اطالوی کھلاڑی اب ٹائٹل کا سب سے مضبوط دعویدار بن گیا ہے۔

یہ بھی پڑھئے:’’ڈان ۳‘‘ میں رنویر سنگھ کی جگہ کون لے گا؟ دو ناموں کی بازگشت

سنر نے کورٹ پر دیے گئے اپنے انٹرویو میں کہا’’میں یہاں واپس آکر بہت خوش ہوں۔ یہ ایک بہت ہی خاص جگہ ہے اور یہاں سے میری بہت اچھی یادیں جڑی ہیں۔ پہلے راؤنڈ کے میچز کبھی بھی آسان نہیں ہوتے، لیکن نائٹ سیشن (رات کے سیشن) میں ٹورنامنٹ کا آغاز کرنا اور بھی خاص ہوتا ہے، اس لیے آپ سبھی کا یہاں رکنے کے لیے شکریہ۔‘‘
دوسری طرف، چھٹی سیڈ میدویدیف کو ٹورنامنٹ کا اب تک کا سب سے بڑا جھٹکا لگا، جب آسٹریلیا کے وائلڈ کارڈ یافتہ کھلاڑی ایڈم والٹن نے انہیں پانچ سیٹ کے ایک سنسنی خیز مقابلے میں۶۔۲، ۱۔۶، ۶۔۱، ۱۔۶، ۶۔۴؍سے ہرا کر ٹورنامنٹ سے باہر کر دیا۔ اس کے علاوہ،۱۷؍ سالہ فرانسیسی وائلڈ کارڈ ہولڈر موئز کومے نے سابق یو ایس اوپن چمپئن مارین سلچ کو۶۔۷، ۲۔۶، ۱۔۶؍ سے ہرا کر مقامی تماشائیوں میں زبردست جوش و خروش بھر دیا۔ چین کے ژانگ ژیزین کو ارجنٹائن کے کوالیفائر فاکنڈو ڈیاز اکوسٹا کے ہاتھوں ۱۔۶، ۴۔۶، ۳۔۶؍ سے ہار کا سامنا کرنا پڑا۔
خواتین کے زمرے (ویمنز سیکشن) میں، دنیا کی نمبر وَن  کھلاڑی آریانا سبالینکا نے جیسیکا بوزاس منیرو کو۴۔۶، ۲۔۶؍سے شکست دی، جبکہ موجودہ چیمپئن کوکو گوف نے اپنی ہم وطن امریکی کھلاڑی ٹیلر ٹاؤن سینڈ پر۰۔۶، ۴۔۶؍ سے شاندار کامیابی حاصل کر کے اپنے ٹائٹل کے دفاع کا آغاز کیا۔

یہ بھی پڑھئے:آرسی بی نے گجرات کو ۹۲؍ رن سے شکست دی

دنیا کی سابق نمبر وَن  کھلاڑی ناؤمی اوساکا بھی اگلے راؤنڈ میں پہنچنے میں کامیاب رہیں۔ انہوں نے لورا سیجمونڈ کو ۳۔۶، ۶۔۷؍ سے ہرایا اور کلے کورٹ پر اپنی بہترین فارم میں واپسی کا سلسلہ جاری رکھا۔ تاہم، پانچویں سیڈ جیسیکا پیگولا کو آسٹریلیا کی کمبرلی باریل کے ہاتھوں تین سیٹوں کے مقابلے میں شکست کا سامنا کرنا پڑا۔ اس ہار کے ساتھ ہی، پیگولا کو گزشتہ چھ سال میں پہلی بار فرینچ اوپن کے ابتدائی راؤنڈ میں باہر ہونا پڑا ہے۔