ہندوستانی خواتین کرکٹ ٹیم کی نائب کپتان اسمرتی مندھانا کو منگل کو جاری ہونے والی ٹائم میگزین کی۲۰۲۶ء کی کھیلوں کی دنیا کی ۱۰۰؍ ممتاز شخصیات کی فہرست میں شامل کیا گیا ہے۔

ہندوستانی خواتین کرکٹ ٹیم کی نائب کپتان اسمرتی مندھانا کو منگل کو جاری ہونے والی ٹائم میگزین کی۲۰۲۶ء کی کھیلوں کی دنیا کی ۱۰۰؍ ممتاز شخصیات کی فہرست میں شامل کیا گیا ہے۔۲۹؍سالہ اسمرتی مندھانا اس سال اس فہرست میں شامل ہونے والی واحد ہندوستانی کھلاڑی ہیں۔ یہ فہرست ان کھلاڑیوں، کوچز، لیڈروں اور کھیلوں کے فروغ کے لیے سرگرم افراد کی عزت افزائی کرتی ہے جو عالمی کھیلوں کے منظرنامے کو نئی شکل دے رہے ہیں۔
اس سال اسمرتی مندھانا کا نام عالمی کھیلوں کی نامور شخصیات، بشمول باسکٹ بال لیجنڈ لیبرون جیمز، فٹبال کے عظیم ستاروں لیونل میسی اور کرسٹیانو رونالڈو، ٹینس اسٹار کارلوس الکاراز اور جنوبی افریقی کرکٹ ٹیم کے کپتان ٹیمبا باووما کے ساتھ شامل کیا گیا ہے۔یہ اعزاز مندھانا کے کریئر کے ایک اور شاندار دور میں شامل ہوگیا ہے۔ رواں سال وہ مرد و خواتین دونوں ہندوستانی کرکٹرز میں ٹی۲۰؍ انٹرنیشنل کرکٹ کی سب سے زیادہ رنز بنانے والی کھلاڑی بن گئی ہیں۔

Smriti Mandhana and Temba Bavuma are the only cricketers to feature in "The 100 Most Influential People in Sports 2026" list published by TIME magazine pic.twitter.com/WmeVYi7OeQ

— ESPNcricinfo (@ESPNcricinfo) June 16, 2026

۲۰۱۳ء میں بین الاقوامی کرکٹ میں قدم رکھنے والی مندھانا اب تک ۱۶۷؍ ٹی۲۰؍ انٹرنیشنل میچوں میں ۴۴۰۱؍ رنز بنا چکی ہیں، جن میں ایک سنچری اور۳۴؍ نصف سنچریاں شامل ہیں۔ٹائم میگزین نے اپنی پروفائل میں مندھانا کی متعدد اہم کامیابیوں کا ذکر کرتے ہوئے لکھا’’مندھانا کو انفرادی ریکارڈز سے زیادہ ٹیم کو ملنے والے ان اعزازات پر فخر ہے جو وہ مسلسل اپنے نام کر رہی ہیں۔ انہوں نے رائل چیلنجرز بنگلور کی قیادت کرتے ہوئے ۲۰۲۴ء اور۲۰۲۶ء میں ویمنز پریمیئر لیگ کے ٹائٹل جتائے، جبکہ گزشتہ برس ہندوستان کی آئی سی سی ویمنز ورلڈ کپ فتح میں نائب کپتان کی حیثیت سے اہم کردار ادا کیا۔‘‘

یہ بھی پڑھئے:فیفا ورلڈ کپ ۲۰۲۶ء: اسپین اوربلجیم سمیت بڑی ٹیموں کے چاروں میچ ڈرا

میگزین کے مطابق۲۰۲۴ءمیں مندھانا نے ایک خاتون کرکٹر کے طور پر بین الاقوامی کرکٹ کی تمام فارمیٹس میں ایک سال کے دوران سب سے زیادہ رنز بنانے کا ریکارڈ قائم کیا، جسے انہوں نے اگلے سال خود ہی بہتر بنا دیا۔ اسی شاندار کارکردگی کے باعث انہیں بی بی سی انڈین اسپورٹس وومن آف دی ایئر ۲۰۲۵ء کا اعزاز بھی ملا۔

یہ بھی پڑھئے:فلسطین: محمود عباس نے صدارتی انتخابات کا اعلان کردیا

۲۰۲۵ء کے ویمنز ون ڈے ورلڈ کپ میں مندھانا ہندوستان کی سب سے کامیاب بلے باز رہیں۔ انہوں نے نو میچوں میں ۴۳۴؍ رنز بنائے، جن میں ایک سنچری اور دو نصف سنچریاں شامل تھیں۔یہ کسی ایک ویمنز ورلڈ کپ ایڈیشن میں کسی ہندوستانی بلے باز کی جانب سے سب سے زیادہ رنز بنانے کا ریکارڈ بھی ہے، جس کے ذریعے انہوں نے میتھالی راج کے ۲۰۱۷ء میں قائم کردہ ۴۰۹؍ رنز کے ریکارڈ کو پیچھے چھوڑ دیا۔ خواتین کرکٹ کی بہترین بلے بازوں میں شمار کی جانے والی اسمرتی مندھانا دو مرتبہ آئی سی سی ویمنز کرکٹر آف دی ایئر کا اعزاز بھی اپنے نام کر چکی ہیں۔