ٹی۲۰؍سیریز میں ۰۔۲؍ کی ناقابل تسخیر برتری حاصل کرنے کے بعد ہندوستانی ٹیم بدھ کو آئرلینڈ کے خلاف تیسرے اور آخری ٹی۲۰؍میں نئے کھلاڑیوں کو آزما سکتی ہے۔

ٹی۲۰؍سیریز میں ۰۔۲؍ کی ناقابل تسخیر برتری حاصل کرنے کے بعد ہندوستانی ٹیم بدھ کو آئرلینڈ کے خلاف تیسرے اور آخری ٹی۲۰؍میں نئے کھلاڑیوں کو آزما سکتی ہے۔
 دوسرے ٹی ۲۰؍ میں ہندوستان کی جانب سے پہلی بار بلے بازی کا موقع ملنے پر رِنکو سنگھ نے ۲۱؍گیندوں پر۳۸؍ رن کی شاندار اننگز کھیلی تھی جس کیلئے انہیں مین آف دی میچ کا ایوارڈ بھی دیا گیا۔ رِنکوسنگھ ۲۳؍ اکتوبر سے چین کے شہر ہانگزو میں ہونے والے ایشین گیمز کے لئے تیار ہیں ، حالانکہ کپتان جسپریت بمراہ ہانگزو جانے والے دیگر کھلاڑیوں کو بھی میدان میں اترنے کا موقع دینا چاہیں گے۔
 اویس خان، جیتیش شرما اور شہباز احمد وہ کھلاڑی ہیں جو ایشین گیمز میں ہندوستان کی نمائندگی کریں گے اس کے باوجود انہیں اس سیریز کے ۲؍ میچوں میں کھیلنے کا موقع نہیں ملا ہے۔ اویس کو ہندوستان اور ویسٹ انڈیز کے درمیان کھیلی جانے والی ۵؍ میچوں کی ٹی۲۰؍ سیریز کے لئے بھی منتخب کیا گیا تھا لیکن انہیں پلیئنگ الیون میں شامل نہیں کیا گیا۔
 میچ میں ڈیتھ اوورس میں ناقص کارکردگی کی وجہ سے ارشدیپ سنگھ تیسرے ٹی۲۰؍ سے باہر ہو سکتے ہیں اور ان کی جگہ اویس کو موقع دیا جا سکتا ہے۔ شہباز اس میچ میں بطور اسپن بولنگ آل راؤنڈر واشنگٹن سندر کی جگہ لے سکتے ہیں ۔
 جیتیش کو الیون میں لانے کیلئے ٹیم مینجمنٹ کو سنجو سیمسن کو باہر کرنا پڑ سکتا ہے۔ تاہم سنجو سیمسن نے دوسرے ٹی۲۰؍ میں ۲۶؍ گیندوں پر۴۰؍ رن بنائے تھے اور ایشیا کپ کے اسکواڈ میں اضافی کھلاڑی ہونے کی وجہ سے وہ تیسرے میچ میں بھی اپنے فارم کو برقرار رکھنے کی کوشش کریں گے۔ جیتیش کو جگہ دینے کے لئے تلک ورما کو بھی آرام دیاجاسکتا ہے، جنہیں ایشیا کپ کے لئے ۱۷؍ رکنی ٹیم میں شامل کیا گیا ہے۔
 رتوراج گائیکواڑ نصف سنچری بناکر رنگ میں آچکے ہیں اور وہ ایشین گیمز میں ہندوستان کی کپتانی کرنے سے پہلے سیریز کا اختتام ایک مثبت انداز سے کرنا چاہیں گے۔ ہندوستان کی اگلی ٹی۲۰؍ سیریز ون ڈے ورلڈ کپ کے بعد ہوگی، اس لئے یشسوی جیسوال اور رِنکو سنگھ جیسے نوجوان کھلاڑی دورۂ آئرلینڈ کے آخری میچ کا بھرپور لطف اٹھانا چاہیں گے۔
 کپتان جسپریت بمراہ نے پہلے ۲؍ میچوں میں اپنے رنگ میں واپسی کے اشارے دیئے ہیں تاہم تیسرے میچ میں جاتے ہوئے انہیں اپنے کام کے بوجھ کے انتظام پر غور کرنا ہوگا۔
 ہندوستانی ٹیم اس طرح ہے: رتوراج گائیکواڑ، یشسوی جیسوال، سنجو سیمسن، تلک ورما، رِنکو سنگھ، شیوم دوبے، واشنگٹن سندر، پرسدھ کرشنا، ارشدیپ سنگھ، جسپریت بمراہ، روی بشنوئی، مکیش کمار، اویس خان، جیتیش شرما اور شہباز احمد۔
 آئرلینڈ کا اسکواڈ: پال اسٹرلنگ (کپتان)، اینڈریو بالبرنی، لورکان ٹکر، ہیری ٹیکٹر، کرٹس کیمفر، جارج ڈوکریل، مارک ایڈیر، بیری میک کارتھی، کریگ ینگ، جوشوا لٹل، بنجامن وائٹ، گیرتھ ڈیلانی، فیون ہینڈ، تھیو وان وورکوم، راس ایڈیر۔