افغانستان نے رحمت اللہ گرباز(۷۶) اور ابراہیم زدران (۷۰) کی شاندار اننگز کی بدولت فضل الحق فاروقی اور ۹؍ رن کے عوض ۵؍ وکٹ کی جارح گیند بازی کی بدولت افغانستان نے ٹی۲۰؍ عالمی کپ کے ۵؍ویں میچ میں یوگانڈا کو ریکارڈ۱۲۵؍ رن کے بڑے فرق سے شکست دی۔

 افغانستان نے رحمت اللہ گرباز(۷۶) اور ابراہیم زدران (۷۰) کی شاندار اننگز کی بدولت فضل الحق فاروقی اور ۹؍ رن کے عوض ۵؍ وکٹ کی جارح گیند بازی کی بدولت افغانستان نے ٹی۲۰؍ عالمی کپ کے ۵؍ویں میچ میں یوگانڈا کو ریکارڈ۱۲۵؍ رن کے بڑے فرق سے شکست دی۔ منگل کو گروپ سی کے میچ میں یوگانڈا نے ٹاس جیت کر پہلے گیند بازی کا فیصلہ کیا۔ افغانستان کی جانب سے بیٹنگ کیلئے آنے والے رحمت اللہ گرباز اور ابراہیم زدران کی اوپننگ جوڑی نے شاندار آغاز کیا اور پہلے وکٹ کیلئے ۱۵۴؍ رن کی ریکارڈ شراکت قائم کی۔  ۱۵؍ویں اوور میں مسابا نے ابراہیم زدران کو بولڈ کر کے یوگانڈا کو پہلی کامیابی دلائی۔ ابراہیم زدران نے۴۶؍ گیندوں پر۹؍ چوکے اور ایک چھکا لگا کر ۷۰؍ رن کی اننگز کھیلی۔ اگلے ہی اوور میں الپیش رامجنی نے رحمت اللہ گرباز کو پویلین بھیج دیا۔ رحمت اللہ نے۴۵؍ گیندوں پر ۴؍ چوکے اور ۴؍ چھکے لگا کر۷۶؍ رن بنائے۔ نجیب اللہ زدران ۲، گلبدین ۴، عظمت اللہ عمرزئی ۵؍ رن بنانے کے بعد آؤٹ ہوئے۔ محمد نبی ۱۴؍رن اور راشد خان ۲؍ رن بنانے کے بعد ناٹ آؤٹ رہے۔ افغانستان نے مقررہ۲۰؍ اوورس میں ۵؍ وکٹوں پر۱۸۳؍ رن بنائے۔ یوگانڈا کی جانب سے برائن مسابا اور کوسماس کیوٹا نے ۲۔ ۲؍ وکٹ حاصل کئے جبکہ الپیش رامجنی نے ایک بلے باز کو آؤٹ کیا۔ ۱۸۴؍رن کے ہدف کے تعاقب میں یوگانڈا کی شروعات انتہائی خراب رہی اور وہ افغانستان کے بولنگ اٹیک کے سامنے دم توڑ گئی۔ یوگانڈا کے ۹؍ بلے باز ڈبل فیگر میں بھی نہ پہنچ سکے۔ یوگانڈا کو پہلے ہی اوور میں ۲؍ جھٹکے لگے۔ فضل الحق فاروقی نے رونق پٹیل ۴؍رن اور راجر مکاسا صفر کو لگاتار ۲؍ گیندوں پر پویلین بھیجا۔ سائمن سیساجی (۴) دوسرے اوور میں آؤٹ ہوئے، ۵؍ویں اوور میں دنیش نکرانی ۶؍رن بنانے کے بعد آؤٹ ہوئے۔ اسی اوور میں الپیش رامجنی کھاتہ کھولے بغیر ہی پویلین لوٹ گئے۔ چھٹے وکٹ ۱۳؍ویں اوور میں ریاست علی(۱۱) کی، اگلی ہی گیند پر کپتان برائن مسابا (صفر)، ۸؍ویں وکٹ رابنسن اوبیا (۱۴؍رن)، ۱۶؍ویں اوور میں بلال حسن (۸؍رن) اور ہنری سینسینڈو (صفر) کو آؤٹ کر کے یوگانڈا کی اننگز کو۵۸؍ رن کے اسکور پر سمیٹ کر افغانستان نے۱۲۵؍ رن سے میچ جیت لیا۔