ہندوستان کی ٹیم بنگلہ دیش کیخلاف ٹیسٹ میچ جیتنے میں کامیاب رہتی ہے تو یہ فتح اس کی شکست کی تعداد سے زیادہ ہوگی۔

جب کپتان روہت شرما کی قیادت میں ہندوستانی ٹیم ۱۹؍ ستمبر کو بنگلہ دیش کے خلاف پہلا ٹیسٹ میچ کھیلے گی تو اسے ایک منفرد ریکارڈ بنانے کا موقع ملے گا۔ اگر ٹیم انڈیا بنگلہ دیش کے خلاف جیتنے میں کامیاب رہتی ہے، تو یہ۹۲؍ سال کی ٹیسٹ تاریخ میں پہلا موقع ہو گا جب ہندوستانی ٹیم کے جیتنے والے میچوں کی تعداد شکست کی تعداد سے زیادہ ہوگی۔ 
ٹیسٹ میں چوتھی کامیاب ترین ٹیم بننے کا موقع
ہندوستانی ٹیم اب تک کل۵۷۹؍ ٹیسٹ میچ کھیل چکی ہے۔ ان میں سے ٹیم انڈیا نے۱۷۸؍ جیتے ہیں اور اتنے ہی ہارے ہیں جبکہ ۲۲۲؍ ​​ٹیسٹ ڈرا ہوئے ہیں ۔ ساتھ ہی ایک ٹیسٹ میچ بھی برابر ہو گیا ہے۔ ایسے میں بنگلہ دیش کی شکست کے ساتھ ہی ہندوستانی ٹیم کی ٹیسٹ جیت۱۷۹؍ ہو جائے گی جو ایک نیا ریکارڈ ہو گا۔ آسٹریلیا۴۱۴؍ فتح کے ساتھ پہلے، انگلینڈ ۳۹۷؍ جیت کیساتھ دوسرے اور ونڈیز۱۸۳؍ جیت کے ساتھ تیسرے نمبر پر ہے۔ 
پہلا ٹیسٹ۱۹۳۲ء میں کھیلا گیا 
 ہندوستانی ٹیم نے اپنا پہلا ٹیسٹ میچ ۹۲؍ سال قبل ۱۹۳۲ء میں لارڈس میں انگلینڈ کے خلاف کھیلا تھا۔ ۲۵؍ سے۲۸؍ جون تک کھیلے جانے والے اس ٹیسٹ میچ میں ہندوستانی ٹیم سی کے نائیڈو کی کپتانی میں کھیلی تھی۔ اس میچ میں ہندوستانی ٹیم کو۱۵۸؍ رن سے شکست کا منہ دیکھنا پڑا۔ 
پہلی جیت کیلئے ۲۰؍ سال انتظار کیا
 ٹیسٹ میں قدم رکھنے کے بعد ہندوستانی ٹیم کو پہلی کامیابی کیلئے ۲۰؍ سال انتظار کرنا پڑا۔ دلچسپ بات یہ ہے کہ ہندوستان کو یہ جیت صرف چنئی میں ملی۔ کپتان وجے ہزارے کی قیادت میں ٹیم انڈیا نے فروری۱۹۵۲ء میں چنئی ٹیسٹ میں انگلینڈ کو اننگز اور ۸؍ رن سے شکست دی تھی۔ 
پاکستان سے زیادہ بار بنگلہ دیش کو ہرانے کا موقع 
 ہندوستان نے بنگلہ دیش کے خلاف۱۳؍ میں سے۱۱؍ ٹیسٹ جیتے ہیں جبکہ۲؍ میچ ڈرا ہوئے ہیں ۔ اگر ہندوستان یہ سیریز۰۔ ۲؍گول سے جیتتا ہے تو اس کے پاس جنوبی افریقہ اور پاکستان کے مقابلے بنگلہ دیش کے خلاف ٹیسٹ جیتنے کے زیادہ امکانات ہیں ۔ دونوں ممالک نے بنگلہ دیش کو۱۲۔ ۱۲؍ ٹیسٹ میں شکست دی ہے۔ سری لنکا نے بنگلہ دیش کو سب سے زیادہ ۲۰؍ ٹیسٹ میں شکست دی ہے۔ 
اسٹار بلے بازوراٹ کوہلی ۳؍ ریکارڈ توڑ سکتے ہیں 
وراٹ اس بڑے ریکارڈ کو چھو سکتے ہیں 
 ہندوستان کے سابق کپتان وراٹ کوہلی ۹؍ہزار ٹیسٹ رن کے قریب ہیں۔ اب تک وہ۱۱۳؍ ٹیسٹ میچوں میں ۴۹ء۱۵؍ کے اوسط سے ۸۸۴۸؍ رن بنا چکے ہیں۔ وہ بنگلہ دیش کے خلاف۱۵۲؍ رن بنا کر۹؍ہزاررن کا ہندسہ عبور کر سکتے ہیں۔ وہ ایسا کرنے والے صرف چوتھے ہندوستانی ہوں گے، ان سے پہلے مایہ نازسچن تینڈولکر، راہل دراوڑ اور سنیل گاوسکر ایسا کر چکے ہیں۔ 
کوہلی بریڈمین کو پیچھے چھوڑ سکتے ہیں 
 وراٹ کوہلی اب تک۱۱۳؍ ٹیسٹ میچوں میں ۲۹؍ سنچریاں بنا چکے ہیں۔ اگر وہ بنگلہ دیش کے خلاف سنچری بھی بنا لیتے ہیں تو وہ آسٹریلیا کے عظیم سر ڈونالڈ بریڈمین کو پیچھے چھوڑ دیں گے۔ بریڈمین کے نام ۵۲؍ٹیسٹ میچوں میں ۲۹؍ سنچریاں ہیں۔ ہندوستان کیلئے سب سے زیادہ سنچریاں بنانے والے بلے بازوں کی فہرست میں کوہلی چوتھے نمبر پر ہیں۔ سچن تینڈولکر، راہل دراوڑ اور سنیل گاوسکر نے ان سے زیادہ سنچریاں اسکور کی ہیں۔ 
کوہلی ۲۷؍ہزار بین الاقوامی رن کے قریب ہیں 
 وراٹ کوہلی اس ٹیسٹ سیریز میں ایک اور بڑا ریکارڈ اپنے نام کر سکتے ہیں ۔ ٹیسٹ، ون ڈے اور ٹی ۲۰؍ فارمیٹس سمیت، کوہلی نے اب تک۵۳۳؍ میچوں میں ۲۶۹۴۲؍ رن بنائے ہیں۔ بنگلہ دیش کے خلاف صرف۵۸؍ رن بنانے کے بعد وہ ۲۷؍ ہزار بین الاقوامی رن بنا لیں گے۔ وہ ایسا کرنے والے دنیا کے چوتھے کھلاڑی بن جائیں گے۔ ان سے پہلے سچن تینڈولکر، سری لنکا کے کمار سنگاکارا اور آسٹریلیا کے رکی پونٹنگ یہ کارنامہ انجام دے چکے ہیں۔