آئی سی سی مینز ٹی ۲۰؍ ورلڈ کپ ۲۰۲۶ء سے باہر ہونے کے بعد ویسٹ انڈیز کی سینئر کرکٹ ٹیم کی ہندوستان سے روانگی بین الاقوامی فضائی حدود کی بندش کے باعث تاخیر کا شکار ہو گئی ہے۔

آئی سی سی مینز ٹی ۲۰؍ ورلڈ کپ ۲۰۲۶ء سے باہر ہونے کے بعد ویسٹ انڈیز کی سینئر کرکٹ ٹیم کی  ہندوستان سے روانگی بین الاقوامی فضائی حدود کی بندش کے باعث تاخیر کا شکار ہو گئی ہے۔ کرکٹ ویسٹ انڈیز  نے پیر کے روز جاری کردہ ایک باضابطہ بیان میں اس صورتحال کی تصدیق کی ہے۔
ویسٹ انڈیز کرکٹ بورڈ کے مطابق، خلیجی خطے میں جاری حالیہ فوجی کارروائیوں اور سیکوریٹی خطرات کی وجہ سے بین الاقوامی پروازوں کے روٹس شدید متاثر ہوئے ہیں۔ فضائی کمپنیوں نے مسافروں کی حفاظت کو مدنظر رکھتے ہوئے اپنی پروازیں منسوخ یا تبدیل کر دی ہیں، جس کے نتیجے میں کیریبین ٹیم کی واپسی کا شیڈول متاثر ہوا ہے۔
ترجمان کرکٹ ویسٹ انڈیز نے واضح کیا کہ ’’کھلاڑیوں، کوچز اور آفیشلز کی حفاظت اور بہتری ہماری اولین ترجیح ہے۔ ٹیم اس وقت  ہندوستان میں قیام پذیر ہے اور تمام ممبران مکمل طور پر محفوظ ہیں۔‘‘ بورڈ نے مزید کہا کہ وہ انٹرنیشنل کرکٹ کونسل (آئی سی سی )، متعلقہ حکام اور ایئر لائن پارٹنرز کے ساتھ مسلسل رابطے میں ہے تاکہ اسکواڈ کی جلد اور محفوظ واپسی کے لیے متبادل سفری انتظامات کیے جا سکیں۔
واضح رہے کہ ویسٹ انڈیز کی ٹیم اتوار کو کے ایڈن گارڈنز میں کھیلے گئے سپر ایٹ مرحلے کے اپنے آخری میچ میں ہندوستان کے ہاتھوں ۵؍وکٹوں سے شکست کھا کر ٹورنامنٹ سے باہر ہو گئی تھی۔ اس میچ میں شکست کے بعد ٹیم کی وطن واپسی طے تھی، تاہم مشرق وسطیٰ کی صورتحال نے کھلاڑیوں کو فی الحال ہندوستان میں ہی رکنے پر مجبور کر دیا ہے۔

یہ بھی پڑھئے:’’وارانسی‘‘ انٹارکٹکا میں شوٹ ہونے والی پہلی ہندوستانی فلم: پرینکا چوپڑہ کی تصدیق

زمبابوے کرکٹ ٹیم کی وطن واپسی میں تاخیر، متبادل پروازوں کے لیے آئی سی سی سے رابطہ
زمبابوے کرکٹ نے تصدیق کی ہے کہ آئی سی سی مینز ٹی ۲۰؍ ورلڈ کپ ۲۰۲۶ء کی مہم ختم ہونے کے بعد زمبابوے کی سینئر مردوں کی ٹیم ہندوستان میں قیام پذیر ہے اور بین الاقوامی سفری تعطل کی وجہ سے ان کی وطن واپسی میں تاخیر ہوئی ہے۔زمبابوے کرکٹ کی جانب سے پیر کو جاری کردہ ایک بیان میں کہا گیا ہے کہ’’انٹرنیشنل کرکٹ کونسل  نے ہنگامی اقدامات کو فعال کر دیا ہے اور ٹیم کے لیے متبادل سفری انتظامات کو یقینی بنانے کے لیے بین الاقوامی فضائی کمپنیوں کے ساتھ مل کر کام کر رہی ہے۔

یہ بھی پڑھئے:جنوبی افریقہ تاریخ بدلنے کے لیے پرعزم، پہلے سیمی فائنل میں کل نیوزی لینڈ سے مقابلہ

بورڈ نے مزید کہا کہ وہ کھلاڑیوں اور سپورٹ اسٹاف کی جلد اور محفوظ واپسی کے لیے آئی سی سی اور  ہندوستان میں موجود ٹیم مینجمنٹ کے ساتھ مسلسل رابطے میں ہے۔
زمبابوے کی ٹیم نے اتوار کے روز جنوبی افریقہ کے خلاف اپنا آخری میچ کھیلا تھا۔ شیڈول کے مطابق اسکواڈ کو دہلی سے ایمریٹس کی پروازوں کے ذریعے دبئی اور پھر وہاں سے ہرارے روانہ ہونا تھا۔ تاہم، مشرقِ وسطیٰ کی ابھرتی ہوئی صورتحال اور ٹرانزٹ روٹس میں خلل کے باعث ان کے سفری منصوبے متاثر ہوئے ہیں۔زمبابوے کرکٹ بورڈ نے واضح کیا ہے کہ تمام کھلاڑی اور آفیشلز نئی دہلی میں محفوظ ہیں اور جیسے ہی نئے سفری پلان کو حتمی شکل دی جائے گی، اس حوالے سے مزید اپ ڈیٹ جاری کی جائے گی۔