ایلک ایتھنز کی ۹۲؍ رن کی جدوجہد سے پر اننگز کی بدولت ویسٹ انڈیز نے دوسری اننگز میں ۵؍ وکٹوں پر ۲۰۱؍ رن  بناکرجنوبی افریقہ کے ساتھ کھیلا گیا پہلا ٹیسٹ میچ ڈرا کروادیا۔

ایلک ایتھنز کی ۹۲؍ رن کی جدوجہد سے پر اننگز کی بدولت ویسٹ انڈیز نے دوسری اننگز میں ۵؍ وکٹوں پر ۲۰۱؍ رن  بناکرجنوبی افریقہ کے ساتھ کھیلا گیا پہلا ٹیسٹ میچ ڈرا کروادیا۔
 پانچویں روز جنوبی افریقہ نے دوسری اننگز ۱۷۳؍ رن ۳؍ کھلاڑی آؤٹ پر ڈکلیئر کر دیا اور ویسٹ انڈیز کو جیت کیلئے ۲۹۸؍ رن کا ہدف دیا۔ اس کے جواب میں دوسری اننگز میں بیٹنگ کیلئے اتری ویسٹ انڈیز کی شروعات خراب رہی اور ایک موقع پر اس نے ۶۴؍رن پر ۳؍ وکٹ گنوا دیئے۔ ایسا لگ رہا تھا کہ جنوبی افریقہ کے گیند باز کیشو مہاراج جلد ہی ویسٹ انڈیز کی دوسری اننگز سمیٹ دیں گے۔ کپتان کریگ بریتھویٹ (صفر)، میکائیل لوئس۹؍ رن بنانے کے بعد آؤٹ ہوئے۔ ایسے بحران کے وقت ایلک ایتھنز نے پہلے کے سی کارٹی کے ساتھ چوتھے وکٹ کیلئے  ۶۳؍ رن کی شراکت کی۔ کے سی کارٹی  ۳۲؍ اور پھر کیویم ہوج  ۲۹؍ رن بنانے کے بعد آؤٹ ہوئے۔ ایلک نے۹۲؍ رن کی شاندار اننگز کھیلی۔ جیسن ہولڈر ۳۱؍رن بناکرناٹ آؤٹ رہے۔ ویسٹ انڈیز نے۵۶ء۲؍ اوورس میں ۵؍ وکٹ پر۲۰۱؍ رن  بنائے۔
 جنوبی افریقہ کی جانب سے کیشو مہاراج نے ۴؍ وکٹ حاصل کئے۔ کگیسو ربادا نے ایک بلے باز کو آؤٹ کیا۔ اس سے قبل جنوبی افریقہ نے دوسری اننگز میں بغیر کسی نقصان کے۳۰؍ رن سے آگے کھیلنا شروع کیا۔ ٹونی ڈی جارج۴۵؍ رن اور ایڈن مارکرم ۳۸؍ رن بنانے کے بعد آؤٹ ہوئے۔ دونوں بلے بازوں کو جومل واریکن نے آؤٹ کیا۔ ٹرسٹن اسٹبس نے۶۸؍ رن کی شاندار اننگز کھیلی۔ انہیں کیمر روچ نے بولڈ آؤٹ کیا۔ اسٹبس کے آؤٹ ہونے کے بعد جنوبی افریقہ نے ۳؍ وکٹ پر۱۷۳؍ رن پر اننگز ڈکلیئر کر دی اور ویسٹ انڈیز کو پہلی اننگز کی۱۲۴؍ رن کی برتری اور دوسری کے۱۷۳؍ رن کی بنیاد پر جیت کے لئے۲۹۸؍ رن کا ہدف دیا۔ ویسٹ انڈیز کی جانب سے جومل واریکن نے ۲؍ وکٹ لئے۔ کیمر روچ نے ایک بلے باز کو آؤٹ کیا۔اس سے قبل جنوبی افریقہ کے کیشو مہاراج اور کگیسو ربادا نے عمدہ بولنگ کا مظاہرہ کرتے ہوئے ویسٹ انڈیز کو پہلی اننگز میں۲۳۳؍ رن پر سمیٹ دیا تھا۔ جنوبی افریقہ کو پہلی اننگز کی بنیاد پر۱۲۴؍ رن کی برتری حاصل تھی۔