جنوبی افریقہ کے ۳۰۱؍رنوں کے جواب میں سری لنکا نے ۳۰۵؍رن بناکر میچ جیت لیا۔بڑے ہدف کا کامیاب تعاقب کرنے والی پہلی ٹیم بن گئی۔
EPAPER
Updated: April 19, 2024, 1:09 PM IST | Agency | Potchefstroom
جنوبی افریقہ کے ۳۰۱؍رنوں کے جواب میں سری لنکا نے ۳۰۵؍رن بناکر میچ جیت لیا۔بڑے ہدف کا کامیاب تعاقب کرنے والی پہلی ٹیم بن گئی۔
سری لنکا اور جنوبی افریقہ کی خواتین ٹیم کے درمیان کھیلے گئے یک روزہ بین الاقوامی میچ میں کئی ریکارڈ بنائے گئے۔ یہ میچ جیت کر سری لنکا پہلی ٹیم بن گئی ہے جس نے تعاقب کرتے ہوئے ۳۰۰؍سے زائد کا ہدف حاصل کیا۔ اس سے قبل یہ ریکارڈ آسٹریلیا کے نام تھا۔ آسٹریلیا نے ایسا کارنامہ ۲۰۱۲ءمیں نیوزی لینڈ کے خلاف ۲۸۹؍رنوں کا تعاقب کرتے ہوئے کیا تھا۔ سری لنکا کا ۴؍ وکٹوں پر ۳۰۵؍ اور جنوبی افریقہ کا ۵؍ وکٹوں پر ۳۰۱؍کا اسکور خواتین کے ون ڈے میں تعاقب کے دوران دونوں ٹیموں کا مشترکہ سب سے بڑا سکور ہے۔ اس سے قبل ۲۰۱۷ءکے ورلڈ کپ کے دوران انگلینڈ کے ۳۷۴؍رنوں کے جواب میں جنوبی افریقہ نے ۹؍ وکٹوں پر ۳۰۵؍رن بنائے تھے۔
چمری اٹاپٹو اور لاراو ولفرٹ نے مردوں اور خواتین کے یک روزہ میچوں کی تاریخ میں پہلی جوڑی ہے جس نے ایک میچ میں ۱۷۵؍سے زیادہ رن بنائے۔ مجموعی طور پر ۳۹۰؍ رنوں کے ساتھ ان دونوں نے ون ڈے میں ۲؍ کپتانوں کے سب سے زیادہ رن بنانے کے معاملہ میں وراٹ کوہلی اور اینجلو میتھیوز کو پیچھے چھوڑ دیا ہے۔ رانچی میں ۲۰۱۴ءمیں دونوں نے ۱۳۹؍ رنوں کی ناقابل شکست اننگز کھیلی تھی۔
چمری کا ۱۹۵؍ ناٹ آؤٹ کا اسکور خواتین کے ون ڈے میں تعاقب کرتے ہوئے سب سے بڑا انفرادی اسکور ہے۔ اس سے قبل یہ ریکارڈ میگ لیننگ کے نام تھا جنہوں نے ۲۰۱۷ءمیں سری لنکا کے خلاف ۱۵۲؍رنوں کی ناقابل شکست اننگز کھیلی تھی۔ چمری کا یہ اسکور تیسرا سب سے بڑا ناقابل شکست انفرادی اسکور بھی ہے۔ اب وہ پہلی خاتون کھلاڑی بھی ہیں جنہوں نے ایک سے زیادہ مرتبہ ۱۷۵؍ سے زیادہ رن بنائے ہیں ۔
سری لنکا کی خواتین ٹیم نے اب تک ون ڈے میچوں میں کل ۹؍ سنچریاں اسکور کی ہیں اور یہ تمام سنچریاں چمری کے بلے سے بنی ہیں ۔ اب تک صرف ۲؍ خواتین کھلاڑی ون ڈے میں چمری سے زیادہ سنچریاں اسکور کر پائی ہیں ۔
وولفرٹ کا ناٹ آؤٹ ۱۸۴؍ رن خواتین کی ون ڈے تاریخ کا پانچواں سب سے بڑا انفرادی اسکور ہے جبکہ یہ ہارنے والی ٹیم کا سب سے بڑا انفرادی اسکور بھی ہے۔ اس سے قبل چمری نے ۲۰۱۷ءمیں آسٹریلیا کے خلاف ۱۷۸؍ رنوں کی ناقابل شکست اننگز کھیلی تھی حالانکہ ان کی ٹیم یہ میچ ہار گئی تھی۔
چمری اور نیلاکشکا سلوا کے درمیان ۱۷۹؍ رنوں کی شراکت خواتین کے ون ڈے میں پانچویں یا اس سے کم وکٹ کیلئے دوسری سب سے بڑی شراکت ہے۔ یہ سری لنکا کی خواتین ٹیم کے لئے ون ڈے میں دوسری سب سے بڑی شراکت داری بھی ہے۔ اس سے قبل ۲۰۲۳ء میں نیوزی لینڈ کے خلاف ان دونوں کھلاڑیوں نے تیسری وکٹ کیلئے ۱۹۰؍ رنوں کی ناقابل شکست شراکت داری کی تھی۔